MATAYO 5

Ufundo lwa ifumbu-u

1Naasa elyi alollya vashe ikuumbya-fo nsemu mwiingyi wa vandu, kandesaama kulya ifumbuny kakaa-fo rembo. Na valya vakiloshyony vakakaa yoo kufii nawe. 2Nawe kapooka ivalosha eshaambaa.

Ifura lya dede

(Luk 6:20-23)

3“Ngoma yewo va mirima mikiva,

mashika mmbo umangyi lwa iruveeu lwava lwavo.

4Ngoma yewo vatirwa mfyoova,

mashika mmbo vakaa vaviirywa muu.

5Ngoma yewo vafoo, mashika mmbo

vakaa vatire uruka luwe ding'u yaawo.

6Ngoma yewo vatirwa nshaa na nyura ya usumanu

mashika mmbo vakaa vawuutiswa.

7Ngoma yewo velyillya vandu

mashika mmbo vakaa valyillywa.

8Ngoma yewo vatiri nrima mwaa

mashika mmbo vakaa valollye Iruva.

9Ngoma yewo veende ufoo

mashika mmbo vakaa vavaangwa vana va Iruva.

10Ngoma yewo varishiswa kimaruma kya usumanu

mashika mmbo umangyi lwa Iruva lwava lwavo.

11“Ngoma yeni kwakooya vandu vamwaarara na imurishisa na imufinngya wo kindo kikasha kyoose kikee kya wongo elyi mukee vakwa. 12Fureny-dwa muvelooka shamashika iviiri lyany mutiri efo iruveeu lyava iniini. Mashika ni indo verishisa vakisuku valya vamusongoye.”

Mmbala na sa

(Mar 9:50; Luk 14:34-35)

13“Yeni mmbo mukee mmbala wa ulana yelu. Indi kwakooya mmbala wammba iturya, a kindo ushewuyaa iroliswa nakyo nkyo ki? Mmbukivaa-se-fo, kulaore ni indeerwa efo poo uvavarwa mmbandu. 14Yeni mmbo mukee sa ya ulana. Muri ukee mmbike ando a ifumbuu-ny mmbushiidimaa ikusuruma-fo. 15Nta nkwiifoo nndu ashataa taa efo mmba kawuya iisikya-fo. Mmbo aivika ando a uwe ikamikya yewo woose vakee efo mmba. 16Veny sa efo usanguny lwa vandu woose, nawo vakooye ilollya efyo fya usha mutanaa, vaute-u ing'anisa Nde waany wa efo iruveeu.”

Mavavaso

17“Nta mulakusare kindo kilesheende ni ishefullwa mavavaso ao vakisuku-fo. Nshisheeye ifullwa-fo ni iinutya. 18Ni kya dede shamuvia, ‘Iruveu na ulana fishiraa indi efyo fikee fireiye nfishiraa-fo, na ikava mbekye imwi nsi, nkuti fiinutyo fyoose.’ 19Naasa nndu akara ifullwa mavavaso yoo naakwa ni elyo lyikee idu ya engyi, kalosha vandu indo, mmbo akaa navaangwa n-du-wa-woose efo umangyi ny lwa iruveeu. Indi yeto atana na yaafunda mmbo akaa navaangwa nniini efo umangyi ny lwa iruveeu. 20Mashika shamuvia kwakooya kulaore usumanu yelo lwany lwiilannyi yelo lwa velosha mavavaso na Vafarisayo mmukooyaa yaanga efo umangyi ny lwa iruveeu-fo.”

Kya unyafi

(Luk 12:57-59)

21“Mmbo mwiitye valya va mbee valevio, ‘Kulawae!’ Na nndu mwiwaa ammba nndu mwiutywa uvingo efo kwa veerumbwa mwaandu.” 22Na yeny shamuvia, “Nndu katirya mwanamaye unyafi ammba nndu mwiutywa uvingo lwakwe efo kwa veerumbwa mwaandu. Na nndu kavia mwanamaye, ‘Yewe ni mbafu, ammba nndu mwiutywa uvingo efo ikwaanuny lya masiingo. Na nndu kavia mwanamaye Iruva akusuuye ammba nndu mwiutywa uvingo lweenda yeerwa murony wa Gehena.’” 23Naasany kwafika yeende kiraso kyeeniinga Iruva, kwakyeende na alya ando eerasya, kwamfikau kwakumbwa mwanamau atiri mwaandu neewe, 24rau kyaanu kilya kyeeningya Iruva kupooke mbele inderera na mwanamau kusange nawe. Naasa kusheny kusheningya Iruva kyaanu kyafo. 25Va nndu mwaanguya yeto atiri mwaandu neewe kyeeri muriani nawe shia. Na nkiduva nalandeekurambikya efo maakony a nniini yeto wa mwaandu, na yeto nniini wa mwaandu nandekurambikya efo maakony a nsero yeto wa poo, kundeerwa kifingyony. 26Ni kya dede shakuvia, “Nta nkushuukaafo-fo kutani kwataa na senti ya kiparwe.”

Kya utuusi

27“Mmbo mwiitye valya va mbee valevio, ‘Kulatuuse nta kulashetuuswa.’ 28Na yeny shamuvia, wo nndu allola nndu nka kya illanga mmbo ammaa ituusa efo nriminy. 29Na kwakooya iriso lyafo lyishekweengyee nsindara lyiillwe kulyeere efo! Mmbo kyakuviiya kisha mmwasi ilungo lyafo lyimwi lyikakurekya, na mwiili wafo moose ukyie yeerwa murony wa Gehena. 30Na kwakooya woko lwafo usha lushekweengye nsindara lurummbwe kulweere efo lukuuke. Mmbo kyakuviiya kisha ilungo lyafo lyimwi lyikakurekya na mwiili wafo moose ukie yeerwa murony wa Gehena.”

Ilakana lya mmi na nka

(Mat 19:9; Mar 10:11-12; Luk 16:18)

31“Mmbo kilererwa-se kyeamba, ‘Nndu kalakana na nka wakwe kuti nanniinge barua ya ilakana.’ 32Na yeny shamuvia, ‘Wo nndu alakana na nka wakwe kwakooya kulaore ni kimaruma kya utuusi, mmbo amwaallwa nave mwituuswa.’ Na nndu arwaa nka mmi allakana nawe mmbo amwaallwa nka ntuusi.”

Ilya mboo

33“Na kingyi-se valya va mbee valevywa, ‘Nta kulalye mboo, mmbo kushefityaa Nndumi ekyo kuteerye kullye mboo.’ 34Na yeny shamuvia, ‘Nta mulakulyise mboo’ mwaambe, ‘Swa iruveeu, mashika nng'u kirembo kya Iruva;’ 35Nta mulalye mboo mwaambe, ‘Swa uruka! Mashika nng'u aekyerya marende akwe. Nta mulaambe swa Yerusalemu! Mashika muni muri ni mangyi nniini.’ 36Nta kulalye mboo kwaambe, ‘Swa nrwe wakwa! Mashika elyi kulashiidimaa yaalwa nta ufii lumwi luve waa ao uu.’ 37Naasany kirero kyany kive, ‘Ee!’ Ao ‘Ode!’ Kyairya efyo ni efo kwa yeto nkasha kyuukye.”

Itaiya kiduva

(Luk 6:29-30)

38“Mmbo mwiitye kilya kileambawa, ‘Iriso lyitawa ni iriso, na iyoo lyitawa ni iyoo.’ 39Na yeny shamuvia, ‘Nta mulasalale na nndu nkasha. Indi nndu kakukapa woi lwa yuundu lya woko usha mwaluye na yelyo lyingi.’ 40Na nndu kakuvaanga mwaanduny nandekusoka soori yafo ya mwiiliny, neewe nreeye na yeyo ya yeerya. 41Na nndu kakwiitikya kweende nawe kyenga kya shia neewe enda nawe ando a fyenga fivii. 42Nndu kakutereva kindo nniinge. Na nndu kasha ikwaakwa nta kulamwiimi.”

Ikunda vakiduva veru

(Luk 6:27-28, 32-36)

43“Mmbo mwiitye kilya kileambawa, ‘Kunda nndu uroo na nkiduva wafo kunsue.’ 44Na yeny shamuvia, ‘Kundeny vakiduva vany, na yewo vemurishisa muvevaterevya efo kwa Iruva.’ 45Naambo mukooye imanyika mmbo mukee vana va nde yeto waany wa efo iruveeu; mashika we ava mwiirosa mwi wakwe ukavaiya yewo varavi na yewo vesha. Kaveva mweende mmbwa yakwe ikakapa kwa yewo va usumanu na kwa yewo va kiila. 46Mashika kwakooya mwakunda yewo vemukunda veni, a isina musheonisaa llyo kyi? A vadedemi nshi indo-da vatanaa? 47Na kwakooya mushiidikiraa vanavamaye vany tupu, a kindo mwatana kya mmwasi nkyo kyi? A vandu va masanga nshi indo-da vatanaa? 48Naasany veny vandu vasongovisi shaasa Nde yeto waany wa efo iruvee-u akee nsongovisi.”

Currently Selected:

MATAYO 5: MAS2

Highlight

Copy