Mapookyony 9
9
Kyaasa kya Iruva Amwi na Noe
1Iruva kavikya Noe mbora na vana vakwe, kavavia, “Fumbukeny mwishure uruka. 2Wo ifisi lyiiyo lyishemwereyaa neemureremya, na wo ndeye yeefo ngini-u, neefyo fyoose fiishwe efo si, makunga moose a efo yeeveny, mmbo fyambikwa maakony any. 3Efyo fyoose fikeenda fikee na muu nshoonga yaany, shasa shilemuninga mare a nyany ni indo-da shavemuniinga efi fyoose. 4Lyo samu, mulasheina-fo. 5Ni dede wo nndu apuswa samu ya nndu ungyi mmbo shimmbesaa. Na wo ifisi lyiwaa nndu mmbo shilyiwaa. 6Yeto ashepuswaa samu ya nndu nawe samu yakwe ishepusuwaa, mashika Iruva mmbo aleumba nndu wa fwana kyakwe. 7Neeni fwarikeny, mufumbuke, ngyeeri taany tiishure uruka!”
8Iruva kavia Noe, ando amwi na vana vakwe. 9“Lola-te yeny shikee ivika kyaasa neeni; na ngyeeri tafo ta numa. 10Na wo kyuumbe kyikee ando amwi neeni, ndeye, findo fyevikkya mmba, na wo ifisi lya ngoroshony yaa ulaniny lyikee neeni, fyoose efyo filesomuka isandukuny, na fyoose fikee na muu ulaniny. 11Na kyaasa kyakwa shikeekyikaarisa kwany, ni indi, nta ekyo kyoose kitiri muu nkikyilyamarwaa-se na mura-fo; nta nkukyikaa-fo mura, nta mura yo numa ilyamara uruka-fo.” 12Iruva kaamba, “Elu llo wende lwa kyaasa ekyi shavika neeni, na wokindo kyuumbe kikee neeni, na ngyufyari toose fika llung'anu; 13Yeny shavika ukova lwa mmbwa mafishiny, llo lushevaa wende lwa kyaasa kyakwa nnang'ani yakwa na ulana. 14Neelyi nsheendee mafishi urukeny arandave, na ukova elo lushelollywa-u, 15Neeny mmbo nshekummbwa kyaasa kyakwa, ekyo kyikee nnang'ani yakwa neeni, na wo kiumbe kiiyo kitiri muu, nta mura mbushekifumbuka ilyamara fyoose fitiri muu-fo. 16Naasa ukova elo lushelollywaa mafishiny; neen nshelullaa, shikumbwe kyaasa kilya kya Iruva na vandu kya llung'anu na wo kyuumbe kiiyo kitiri muu kikee ulaniny.” 17Iruva kavia Noe, “Elu llo wende lushoora mma nnang'ani yakwa na findo fyoose fitiri muu kunu urukeny”.
Noe na Vana Vakwe va Kyuumi
18Vana va Noe valeuka isandukuny ni Semu, Hamu na Yafeti; na Hamu mmbwe ndeye wa Kanaani. 19Eva vararu mmbo vana va Noe, na ngyeeri yaawo nnyo ileishura ulana.
20Noe kava nremi wa mbee, kavaaya irema lya misabibu. 21Kana mfinyu kanangwa kakaa-fo mbereto efo yeemeny lyakwe. 22Hamu, ndeye wa Kanaani, kalolya ndeye eefo mbereto, kandevia vana va maye vavii vekee poo, 23Semu na Yafeti vakaipoo soori ya nkorori vakailambara meeveny, wo ve vavii vakaenda venkapye mungo, valasheelollya usutu lwa ndeyaawo vakansikkya. 24Noe kamarukya unangweny lwakwe kamanya kilya mwana wakwe n-du alentannya. 25Kaamba,
“Kanaani nave nndenge!
Nasheva ishinga lya mashinga a vana va maye.”
26Kaamba-se,
“Semu avikywa mbora ni Nndumi Iruva, Iruva wakwa;
Na Kanaani nawe ishinga lyakwe.
27Iruva nang'anise Yafeti,
Nakae meeminy a Semu.
Na Kanaani nave ishinga lyakwe.”
28Na Noe numa ya mura ulya kakaany myaaka mayana araaru na makumi araanu. 29Myaaka myoose ya Noe ni mayana kyeenda na makumi araanu, kafwaany.
Currently Selected:
Mapookyony 9: MAS2
Highlight
Share
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
