Mapookyony 22

Iruva Avia Abrahamu Arase Isaki

1Naasa kyikava numa ya mbony yeto Iruva kaesa Abrahamu, kammbia, “Yewe Abrahamu,” Nawe kammbia, “Akau shikee yaa.” 2Kammbia, “Ipoo mwana wafo, mwana wafo wa ngitany Isaki kunkundye, kweende fika urukeeny lwa Moria, kundenningya-fo kiraso kya ikora na muro yoo uwe ya ifumbu nshekooraa.” 3Abrahamu kakwiipoo ngama shuru, kaala nshungu wakwe, kaipoo na vasero vavii ando amwi nawe, na Isaki mwana wakwe, kapapara ngwi kyimaruma kya kiraso ekyo kya ikora na muro, kakwiipoo, keenda kafika ando alya alevio ni Iruva. 4Kufike nkonu wa kararu Abrahamu kalollya ando kukee kwaasha, 5Abrahamu kavia vasero valya, “Yeni keeny yaandi ando amwi na nshungu, na yeny na mwana lweende alya, lundeinndya Iruva, lumuwuiya lyingyi.” 6Naasa Abrahamu kaipoo ngwi ta, kiraso ekyo, karika mwana wakwe Isaki, kaipoo muro na kyaandu wokony lwakwe, vakeenda veriani ve vavii. 7Isaki karera na ndeye Abrahamu kammbia, “Ndeyaakwa,” nawe kammbia, “Ekau yeny mwanakwa”, kammbia, “Lola, muro uiyo; na ngwi tiiyo, lyoony ngurana ya irasa ikee kwi?” 8Abrahamu kammbia, “Iruva ashekuwonisyaa muni ngurana ya kiraso, mwanakwa.” Naasa vakaengera yeenda woose ve vavii.

9Vakakooya ando alya alevio ni Iruva, Abrahamu katannya-u kitara kyerasya, kadeesya-u ngwi, kafinga Isaki mwana ulya wakwe, kantuula yoo kitareny, kyerasya, yoo uwe ya ngwi tilya.

10Abrahamu kaipoo woko lwakwe, katira kyaandu naambo narummbwe mwana ulya wakwe. 11Naasa nsu wa Nndumi Iruva kammbaanga auka iruveeu kaamba, “Abrahamu! Abrahamu!” Nawe kaamba, “Ekau yeny.” 12Kaamba, “Kulaoroye mwana woko lwafo-fo, nta kulampaani; mashika ulaalu shammanya kwiirikye Iruva, kwanra kulashiima mwana yeto wafo, mwana wafo wa ngitany.” 13Abrahamu kaipoo miso akwe kalola, kalollya, ate kuiyo suva numa yakwe ikee shaavike mbembe yoo ngoroshony. Naasa Abrahamu keenda kaipoo suva yeyo, kayuuta ive kyiraso kyeekora na muro ando a mwana ulya wakwe. 14Abrahamu kavaanga ando alya Yehova-yire, ni shaasa vandu vaamba fika inu, “Yoo ifumbuny lya Nndumi Iruva lusheonisaa.”

15Nsu wa Nndumi Iruva kavaanga Abrahamu lya kavii kuuka iruveeu. 16Kaamba, “Shalya mboo yeny shimuni, yeny Nndumi Iruva, mashika elyi kwatana indo, nta kulashiimi mwana wafo, mwana-fo wa ngitany.” 17Ikuvikya mbora nshekuvikya, na ikufumbuta nshekufumbutaa, ufyari lwafo luve sha nyinyiri ta nginii-u, na lyingyi sha nsanga wa mbai ya nruva; na ufyari lwafo vashevingaa vakiduva vafo. 18Na yoo kwafo ng'u ngyufyari toose ta ulana tishevikywa mbora; mashika elyi kuleirikya unyanga lwakwa. 19Naasa Abrahamu kawuiya vasero valya vakwe, vakauka-u, vakawuya kimwi fika Beer-sheba, Abrahamu kandekaa efo.

Ngyeeri ya Nahori

20Naasa kyikava numa ya mbony yeto, Abrahamu kavio sheelyi Milka nawe ammirya mwanamau Nahori vana. 21Mmbo Usi, mmbee wakwe, na Busi mwanao, na Kemueli, ndeye wa Aramu; 22na Kesedi, na Hazo, na Pildashi, na Yidlafu, na Betueli. 23Betueli kaira Rebeka. Yewo nyanya mmbo ewo Milka aleirya Nahori mwanamaye wa Abrahamu. 24Na kishinga Kya Reuma nawe kaira Teba na Gahamu na Tahashi na Maaka.

Currently Selected:

Mapookyony 22: MAS2

Highlight

Copy