Varome 6

Mmbo luiyoo kyeendo ni Kristo

1Lukaambany inda ulaalu? Lukakusindyany ulyamariny naambo isarya lyiingifwa? 2Oode, A yese lulemmaa ifiiya ulyamari mmbo lukaa inda-se ulyamariny? 3A mulemmanya-se sheelyi yese lulebatiswa na irina lya Yesu Kristo mmbo lulebatiswa kya ufu lwakwe? 4Mmbo lulerikwa nawe sheelyi mmbo lulefwa llya lulebatiswa, naambo shaasa Kristo aleruka kawona itumbe kwa Nde, naasa neese lukae na muu mwiiya. 5Mashika kimmba lulelungwa nawe kya ufu lwakwe, niindo-da lushelungwaa nawe kya iruka lyakwe; 6naasa elyi lwammanyany indo, sheelyi ngata yeeru mmbo ilekapyo nsalabeny ando amwi nawe, naambo mwiili wa ulyamari umirwa, lulakirundye ulyamari-fo; 7shamashika yeto alefwa mmbo allyimyo usumanu kautwa ulyamariny. 8Na kwakooya lulefwa na Kristo mmbo lushekaa na muu ando amwi nawe; 9lwiimanyaa elyi Kristo ammeeruka nnyakifwaa-fo, nta ufu llukimwiidimaa-fo. 10Mashika llya alefwa, mmbo alevinga ulyamari lyimwi kikamaa, lyo elyi akee na muu, nkimaruma kya Iruva. 11Naasany na yeni, kya ulyamari veny sheelyi mufiiye, muveny vandu va Iruva vakee na muu kyeendwa ni Kristo Yesu. 12Naasany, ulyamari lulakishillye efo miiliny yaany yeyo isheywa ni ufu kutani mwasora lango ta vayo-fo. 13Nta mulakyeengere iniingya malungo yoo any ave fisha fya uravi na ulyamari-fo; kyaindi kurambikyeny muveni kwa Iruva sha vandu vemmaa ifwa vakawuya ikaa na muu, na malungo yoo any ave fisha fya usumanu kwa Iruva. 14Nkivaa ulyamari lumushillye yeni-fo, mashika mmukikee vashillye mmavavaso-fo, mmbo mushillyo ni isarya.

Iva wa toki mmbo lyikee inda?

15A niindaany? Lukatanany ulyamari mashika elyi ando a ishillyo mmavavaso lukee vashillye ni isarya? Oode, ntafo! 16A mmbo mulaishi sheelyi yeto mwakuniingya kwakwe mukava mashinga akwe kyeindya yeto mumwiindye mmbo mwammba mashinga akwe, kwakooya ni ushinga lwa ulyamari lusheendee ufu, ao kwakooya ni ushinga lwa wiindi yelo lweende usumanu. 17Lyo Iruva naanwa nnu, mashika yeni mmbo mwekee mashinga a ulyamari, kyaindi mmbo muleirikya na mirima yaany ngata ilya ya urango yeyo ilemushillya; 18na kyeeri mulemaa ilekwa ulyamariny, mukavikwa mashinga erundya usumanu. 19Mmbo sharera kivandu kimaruma kya ufwafwa lweru. Kimmba shaasa muleniingya miili yaany itani fya ukirinda muve filemi, nkyo ulaalu niingyeny miili yaany irunndye usumanu mukooye iilyiswa. 20Shamashika kyeeri mwekee mashinga a ulyamari mmweishi kya usumanu-fo. 21A mmbusha-ki mulewonisa-fo? Mashika kindo mushefurummyaa iwonisa-fo ni ufu. 22Kyaindi ulaalu mukammaa ivikwa valeke mulakirunndyaa ulyamari, mwaaluwa mashinga a Iruva, nnyo mbusha yaany, llyo iilyiswa muute-u iwona muu wa llung'anu. 23Mashika weesi lwa ulyamari ni ufu. Kyaindi simbo ya Iruva mmuu wa llung'anu, kyeendwa ni Yesu Kristo Nndumi weeru.

Currently Selected:

Varome 6: MASNT00

Highlight

Copy