Varome 4

Abrahamu nkyaaso kyeelola

1Naasany, kya Abrahamu lukaamba-ki, nde yeto weeru wa mwiiliny? 2Mashika kwakooya Abrahamu aleekennywa usumanu kimaruma kya mashora akwe, we atiri kyirumannyo. Lyoony, nshi mbee ya Iruva-fo. 3Mashika mareiyo mmbo aamba inda? Abrahamu mmbo aleirikya Iruva, kyiikava nkyo kyamwekennya usumanu. 4Kwa nndu mwirunda mashora, weesi lwakwe llweekenwaa sheelyi ni isarya-fo, ni siye. 5Kyaindi lyo kwa nndu nalarundaa mashora, lyo kakusirya yeto ashemwekennyaa usumanu nalatannyi mesha, kikusiryo kya nndu yeto mmbo kyaekenwa ni usumanu. 6Shaasa na Davidi nawe arera kya pule ya nndu yeto Iruva amwekennya iva na usumanu nalatiri mesha atannyi,

7Ngoma ni yewo vakee vasarye maravi awo,

na ngyulyamari tawo tikasikyo.

8Ngoma ni ya nndu yeto Nndumi nalamwekennyaa ulyamari.

9A le ndesa, pule yeyo ni ya yewo vakee varini-da a ni ando amwi na yewo valakee varini? Mashika mmbo lwaamba sheelyi kimaruma kya kikusiryo Abrahamu mmbo aleekennywa usumanu. 10A mmbo aleekennywa inda? Nkyeeri alemaa irinwa a nkulaore anrinwa? Nshi ammaa irinwa-fo nkuvie, nkulaore enrinwa. 11Nawe mmbo alewarya kyaasa ekyo kya irinwa, luve wende lwa usumanu lwa kikusiryo ekee nakyo nalanderinwa, naambo nave ndeye wa woose yewo vasheirikyaa, na kikava mbalerinwa, naambo nawo vekennywa usumanu. 12Na lyingyi nave nde wa veerinwa nave nde wa alakee nrini, kwa valya woose nshi valya vakee varini-da-fo, na kwa valya vakeelatya ngyayo ta kikusiryo kya nde weeru Abrahamu ekee nakyo uka llya nalanderinwa.

Kyaasa kya Iruva na Kikusiryo

13Mashika kyaasa kilya kyeamba mmbo eshevaa muya ding'u wa ulana, Abrahamu mmbo alekiniingwa na vana vakwe, nshi na mavavaso-fo kyaindi kwa usumanu aleekenywa kyuuka na iirikyo. 14Mashika kwakooya valya va mavavaso mmbo verwaa ding'u, iirikyo mmbo lyevaa ruu, na kyaasa kifwe mmwasi. 15Mashika uvavaso llo lweendee unyafi, mashika uvavaso lulaiyo, ukasha llulolywa-fo. 16Kweekyo kyaasa mmbo kilesha na iirikyo, kishe na shia yeesarya, naambo kyaasa ekyo kikooye ivanga efo vaniny va kyaasa. Nshi kwa valya va uvavaso-da-fo, lyo ni kwa valya va kikusiryo kya Abrahamu, nawe ni nde weeru loose. 17(Shaasa kyikee kireiye, “Mmbo shilekuvika kuve Nde wa ngyuufyari shiingyi.”) Usanguny lwa yeto alekusirya Iruva, yeto mwiiviirya vafu muu. Yeto aidima ivaanga filya filandekaa-fo kimwi sheelyi mmbo fiifo. 18Nawe mmbo aleirikya evereyaa filya filavaa ivika nsia, naambo nave nde wa ngyufyari shiingyi, shaasa kileambawa, “Niindo ufyari lwafo lushevaa.” 19Yeto nalakee mfwafwa wa iirikyo, mmbo alekusara kya mwiili wakwe wemmaa ifwa, (kyeeri kilya emmaa myaaka sha iyana), na ngata yeyo ya ifwa ya nsanga wa Sara. 20Llyo llya alelollya kyaasa kya Iruva, nnyaletirwa nnyinyira nare nalairikya-fo, kyaindi mmbo kikusiryo kilemmbika finya, kaarafuma Iruva; 21nawe eishi deny sheelyi Iruva asheinutya fyaasa fyakwe. 22Kekeennywa we sheelyi ni usumanu. 23Kyaindi lyo mfilereiyo kimaruma kyakwe muni-fo sheelyi mmbo aleekennywa muni. 24Kyaindi na yese lusheekenywaa usumanu indo-da, yese lukusirye yeto aleruta Yesu Nndumi weeru nooke kwa vafu. 25Nawe mmbo alerambikywa kimaruma kya uravi lweru, nawe karutwa naambo neese lweekennywa usumanu.

Currently Selected:

Varome 4: MASNT00

Highlight

Copy