Varome 2

Ngapo ya Iruva

1Naasany, yewe nndu mmbo kwava vi, kushuutyaa ungyi uvingo, nta nkutiri kyeekuuta-fo. Shamashika efyo kukeeyuutya nafyo vengyi uvingo, mfyo fyeni kukeekuutya nafyo uvingo kumuni kyeyaamba kukee nrekwa, mashika yewe kukeeyuutya uvingo mmbo kwatana efyo fyeni. 2Lyo yese lwiishi sheelyi ni mirumbuye ya Iruva myeni ikee ya dede kwa yewo vetana efyo. 3Yewe nndu wa vandu kurumbuyaa vengyi newe kumuni kwatana efyo fyeni. A ndesa mmbo kusheidimaa inda ikyia unyafi lwa Iruva? 4A ndesa mmbo kukeemina wiingyi lwa isarya lyakwe na usisiryo kulamanyi sheelyi usha lwa Iruva mmbo lwakoomwa naambo kufikye ikurya? 5Kyaindi kyeendwa ni uumu lwafo, na nrima wafo ulatiri ngata ya ikurya, mmbo kwakudeesya unyafi kufike nkonu ulya wa unyafi na yaanduyo lyaorwa paa yoo usumanuny lwa Iruva, 6yeto ashetaa wo umwi kiinani na mitannyi yakwe; 7valya veefo vesisiryaa neetana mesha veruuya itumbe na nnduma na ira kulalyamarika, wo vasheningwaa muu wa llung'anu. 8Na valya veerenga, valalatyaa dede, lyo vakairikya uravi, vashewonisaa unyafi na yuumisyo ngoo. 9Ukiva na ngatara nkwa wo nndu mwitana meesi, kava Myuda ao Mgriki. 10Itumbe na wiindi na ufooni kwa yeto mwitana mesha, Myuda mbele na Mgriki-da. 11Mashika kwa Iruva nkwiifo ikunndyo-fo. 12Shamashika yewo valyamarye kulaiyo uvavaso, neewo valelyamara vetiri uvavaso, woose mmbo vasheutyoo uvingo ni mavavaso. 13Lyoony nshi valya veeta mavavaso vatiri usumanu mbee ya Iruva-fo, kuuta ni valya veevallya na mavavaso mmbo vasheekenyoo usumanu. 14Mashika kyeeri vandu va masanga vatana kiinani na mikae yaawo filya fikee efo mavavasony, valya valatiri mavavaso mmbo vammeva mavavaso wo veni. 15Mmbo vaora mashora a mavavaso akee mareiye efo miriminy yaawo, ngoo tawo tiivakureekyaa, na makusaro awo, wo veni, eevautyaa uvingo ao evaletaa, 16kufike nkonu ulya Iruva ashesukwaa fyama fya vandu fyoose vaanduyo, kiinani na Nrumi ya Nsia yei yakwa, kwi Kristo Yesu.

Vayuda na uvavaso lwawo

17Lyo yewe kwakooya kukee Myuda kwavevika mavavaso nsia, na irumana na Iruva, 18na imanya filya akundye, na ikunda findo fisha, neewe mmbo kurangusyo efo mavavasony, 19na ikumanya kumuni sheelyi mmbo kukee nteteri wa vafu miso, na sa ya yewo vakee ireeminy, 20mwilosha wa matondo na llori wa vana vadu, atiri ngata ya urango, na wa dede efo mavavasony. 21Naasany yewe kukeelosha vengyi, a mmbo kuraa kulakulosha kumuni? 22Yewe kushambaa nndu nalatuuse, na yewe kumuni mmbo kutuusaa? Yewe kusuuye maruva a wongo, mmbo kutiraa mmba ta vayo? 23A yewe kwarumana na mavavaso, mmbo kuturaa wiindi kwa Iruva kwiifishaa mavavaso yoo? 24Mashika irina lya Iruva mmbo lyikee yaararwa efo kwa vandu va masanga kimaruma kyany, shaasa lya kikee kireiye. 25Mashika irinwa mmbo lyisheekyaa tupu elyi kukee mwiindya mavavaso, kyaindi kwankooya kukee mwifisha mavavaso, irinwa lyafo mmbo lyikee sheelyi kulakee nrini tusu. 26Naasany kwankooya yeto nalakee nrini antira ufundo lwa mavavaso, ra elyi nalakee nrini we nnyasheekenwa-se sheelyi mmbo akee nrini? 27Na yeto nalakee nrini uka efo nkuu-kuu, kaindya mavavaso, a yeto nnyakuutya-se uvingo yewe kukee nrini lyo kwawuya ifisha mavavaso! 28Kimmba we nshi Myuda akee Myuda kyipoo tupu-fo, nta urini nshi llwa lwa kyapoo tupu yoo mwiliny-fo. 29Ni elyi akee Myuda akee Myuda auka efo nnang'ani na irinwa lyakwe llya efo nriminy, lya ngoony, nshi lya mareiyony-fo. Na nnduma wa vayo nshi wooka kwa vandu-fo, nkwa Iruva muni wooka.

Currently Selected:

Varome 2: MASNT00

Highlight

Copy