Varome 12

Ngaa ya Varundi va Iruva

1Naasany vanavama vakwa, mmbo shamutereva kikee kya isarya lya Iruva niingyeny miili yaany ive kiraso kyeele kitiri muu, kive nkyo mwiindye wa dede. 2Nta mulasore mikaaye ya ulana yelu-fo, mmbo mushaalashikaa mikaaye yaany, mwiimanyaa nkyoki Iruva akunndye kwany naambo munsenyi neeva vasongovisi. 3Kimaruma kyeelyimyo isarya lya Iruva mmbo shaidima imuvia yeni moose, kulave nndu alanga ikurosa mwasi ngota elyi akai. Veny vandu va mwiina, shaasa Iruva aavye wo nndu mwiina wakwe wa kikusiryo. 4Mashika shaasa mwiili utiri filungo fiingyi nafyo filarundaa ishora lyimwi nsi. 5Niindo neese mmbo lukee filungo fya mwiili wa Kristo wo nndu kalungwa neeto ungyi. 6Naasany kimmba lukee valyimye simbo tikwaavye-avye, kiinani na isarya lya Iruva, kwakooya ni ukisuku, lurere kikee kya iirikyo. 7Kwakooya ni yaambya veny lurunde nisha, neeto mwiilosha, naverunda nisha. 8Neeto ashiikimbaa vengi, navaikimbe kyikee kya usha. Neeto mwiiwarya veny navawarye na nrima nkesi. Na mwiisalallya vengyi navasalallye nalashaaraa. Na mwiilyillya vengyi navalyillye na ifura. 9Ukundi lwany lulatire ukunang'ari-fo. Taniny findo fisha mulakani neefyo fikasha. 10Kundaniny muveni sha vana va nka, kikee kya wiindi na ilekeiya vengyi mwaanya. 11Veny vandu vasasari mulasheelelekaa, muve vakaari miriminy yaany irundya Iruva (Nndumi) 12mwiivikaa nsia na ifura, mutire usisiryo kyeeri kya ngatara, mukutire efo kiterewony. 13Muvetira maako irundya vandu va Iruva, muveambya veny na usau. 14Vemutannya makasha vakunndyeny mbora nta mulavadenge-fo. 15Fureny neewo vafuraa, muveiya neewo vaiyaa. 16Veny va nrwe umwi nsi moose, nta mulave vandu vakurosaa. Indi irikyeny yaatarwa naakwa mfindo fifwafwa. Nta mulave vandu vekushopa na urango mutiri. 17Mulataiye ukasha na ukasha-fo. Latyeny yefyo fisennyaa vandu woose. 18Llyo mushekaa na ufoo na vandu woose. 19Vakunde vakwa, loleny mulataiyane fiduva naambo mulasheesheyo ni unyafi lwa Iruva, kimmba kikee kireiye indi, “Itaiya kiduva llyakwa yeny Nndumi.” 20Lyo nkiduva wafo eetirwa nshaa nniinge shoonga. Eetirwa nnyura nrite. Kwantana indo llyo ashewonaa ngapo imfye. 21Ukasha lulakuvinge-fo, mmbo kutanaa mesha kuvinge sha.

Currently Selected:

Varome 12: MASNT00

Highlight

Copy