Marko 8

Yesu awuutisa vandu fiku fiina

(Mat 15:32-39)

1Naasa mikonu ilya kweekuumbye-fo lyingyi nsemu nniini wa vandu, nawo valatiri kindo kyeelya. Nawe kavaanga valya vakiloshyony kyakwe. Kavavia, 2“Shatinnywa vandu yewo vakuummbye-fo nkuka, mashika vansisirya kunu kwakwa ando a mikonu iraru sele, valatiri kindo kyeelya. 3Na kwakooya shavatauwa indi veende kyeny valakomba kindo mmbo vasherovywaa efo shia. Na yewo maata ni kwaasha vaukye.”

4Na valya vakiloshyony vakanndouwa, “A ni inda nndu ashiidimaa iwuutisa vandu yeva kunu kasa?” 5Nawe kavavesa, “Ni mikate iinga mutiri?” Vakammbia, “Ni mfungare.”

6Nawe kavia mamwiingyi ulya wa vandu vakee rembo. Kawarya mikate ilya mfungare, kaana Iruva. Kafisha fyenga fyenga. Kaniingya valya vakiloshyony kyakwe vandeavya vandu. Vakandeavya vandu vakuummbye-fo. 7Vavetiri na fikunga fyaangu. Kafivikya mbora kaamba, nafyo-da vandefyaava. 8Vakalya vakauura. Vakaveipoo na nsaaro wa fipereshu, mikusha mfungare. 9Na vandu veeiyo vafye sha fiku fiina. Naasa, kavatauwa. 10Nalyo yeni kasaama na efo ngalaveny aryani na vakiloshyony vakwe, Kafika kulya myuungony ya Dalmanuta.

Vafarisayo vakundye yoorwa wende

(Mat 16:1-4)

11Naasa Vafarisayo vakansheya vakapooka illya nawe ulai, Vakammbia nawoore wende luuka iruveeu vemweesaa. 12Nawe katirwa ni unyafi kaamba, “Naambo-kyi irika elyi lyasia wende?” Nkya dede shamuvia, “Irika elyi llyisheniingwaa wende nta-fo!” 13Nalyo kavara-u, kawuya kasaama na efo ngalaveny, kawara shia, kafika kulya kwakulya.

Ntarang'o wa Vafarisayo na Herode

(Mat 16:5-12)

14Naasa vakakooya vanrekywa ikamara mikate ya kishau. Na efo ngalaveny nta valarye-fo kindo kulaore ni nkate umwi nsi. 15Nawe kavavavasany ashaambaa, “Manyiny mukwiise ntarang'o wa Vafarisayo na wa Herode.” 16Naasa, vakaumburanaany wo veni na veni, “Ni elyi lulariye mikate ya kishau.” 17Nawe kamanya kavavia, “A kimaruma nkikyi mukaumburana elyi mulariye mikate? A mmbo mulandeipuye nta kindo nta iranngwa. Na mirima yaany ikava ishi? 18Mmbo mutiri miso mulalollye. Mukavetira maarwi mulaitye, nta mulakummbwa kindo! 19Llya shileavya vandu valya fiku firaanu mikate ilya iraanu, a mikusha iishwe fipereshu ni iinga muleipoo-ro? Vakammbia, ‘Ni ikumi na ivii.’ 20A llya shileavya valya fiku fiina mikate ilya mfungare ni mikusha iinga iishwe fipereshu muleipoo? Vakaamba, ‘Ni mfungare.’ 21Nawe kavavia, ‘A mmbo mulandeitumuso?’ ”

Yesu ashiisa nndu mfu miso kulya Betisaida

22Naasa vakafika kulya Betisaida. Vandu vakamweenngye nndu mfu miso. Vakamooshora nampaani. 23Nawe katira nndu ulya mfu miso woko. Kanrwaa kulya poo ya muri. Kafishya miso alya akwe maare. Kamweekerya maako, kammbesa, kwakooya alollye kindo. 24Nndu ulya katarammbwa miso kaamba, “Shilollye vandu-da, lyo mmbo vakee sha miri isheendaa.” 25Nalyo kamweekerya maako lyingyi efo misony, kaambuka miso, kashia kapooka ilollya findo fyoose fikamanyika paa. 26Nawe kansama neende kyeny kwakwe, kammbia, “Nta kulaire neefo muriny-fo.”

Petro aamba Yesu ni Mesiya

(Mat 16:13-20; Luk 9:18-21)

27Nalyo Yesu kakwiipoo-fo kawara shia aryani na vakiloshyony vakwe. Vakafika kulya fimiriny fikee kufii na kulya Kaisaria ya Filipo. Na elyi varie indo shia kavesa valya vakiloshyony vakwe, kaamba, “A vandu vaamba kyakwa, yeny mmbo shikee viiny?” 28Nawo vakamoongoya vakaamba, “Kwiifo vaamba yewe ni Yohane Mmbatisi, na vengyi ni Elia. Na vengyi vakaamba, yewe ni umwi wa vakisuku.” 29Nawe kavavesa, “A yeni mwaamba inda kyakwa, yeny mmbo shikee viiny?” Petro karouwa kammbia, “Yewe ni Kristo!” 30Nawe kavaima valasheerera na nndu ekyo kyakwe.

Yesu arera kya makiva akwe, na kya iruka lyakwe

(Mat 16:21-28; Luk 9:22-27)

31Nalyo kapooka ivalosha mmbo kikee kideerye kya Mwana yeto wa Nndu nandeliswa ukiva wiingyi mmbandu na indeminwa mmasiingo a vandu na veelosha mavavaso, na iwaawa nawaawa, na mikonu ikamiira-u iraru nawuye iruka-ny. 32Kavavia kirero ekyo areraa paa. Nalyo Petro kanrwaa na mbai. Kapooka inkeemmya. 33Nawe kainduka kalola valya vakiloshyony vakwe. Kakeemmya Petro, kaamba, “Kwiipoo wuya numa yakwa Satana! Ekyo kukusarye nshi kya Iruva-fo, nkya kivandu!”

34Nalyo kavaanga valya vakuummbye-fo sanda na vakiloshyony vakwe vashesangya yoo akai. Kavavia, “Nndu akunda ishilatya kuti nasue mwili vakwe muni vavekurika nsalaba wakwe, naveshilatya-ny. 35Mashika wo nndu ankunda ikira muu wakwe akaa naurete. Na wo nndu areta muu wakwe kwakooya ni kimaruma kyakwa na Nrumi yeyo ya Nsia, we akaa naukire. 36Mashika iviri nndu ashuutaa-u llyo kyi kwakooya ashewonisaa ulana loose luve mbusha yakwe, kawuya iretya-u muu wakwe? 37A kindo nndu avikaa kyeewouwa muu wakwe nkyo kyi? 38Na kunu nnang'ani ya irika elyi lyiraiye utuusi na ulyamari wo nndu aifo amiira sony kyakwa na kya marero akwa, na Mwana yeto wa Nndu asheveiraa sony kyakwe-da elyi meendi ashaa aree itumbe lya Ndeye aryani na vasu yewo veele va Iruva.”

Currently Selected:

Marko 8: MASNT00

Highlight

Copy