Marko 13

Yesu aamba kya “Isammbwa” lya mmba ya Iruva

(Mat 24:1-2; Luk 21:5-6)

1Na elyi asomuka efo poo ya mmba ya Iruva, nalyo umwi wa vakiloshyony kyakwe kammbia, “Llori lla-te mawe yoo shaasa asenyi, na mmba yeto shaasa titiri usuri.” 2Na Yesu kamwallwa kammbia, “Kulollye mmba yeto shiniini indo-ro? Nkwiifo iwe lyisaa uwe ya lyingyi lyilasambuwaa-fo.”

Mapookyony a makiva na ngatara niini

(Mat 24:3-14; Luk 21:7-19)

3Naasa nawe kandekaa rembo alya ifumbuny lya miri ya mafura alya asumani na mmba ya Iruva. Na Petro kasanga na Yakobo na Yohane na Andrea vakammbesa kyaanya kyawo. 4“Luvie-te mbee, meendi kindo ekyo kikaa kyuutike! Na wende lweemanya meendi yoo elyi findo efyo fyoose fishiinukya ni indii ndesa?” 5Naasa Yesu kapooka ivavia, “Kwiiseny nndu nalakooye imureta shia. 6Kukaa kushe vandu veengyi varie irina lyakwa vashaambaa mmbwe yeny. Nawo varete vandu veengyi. 7Na elyi meendi mushiitaa fira na fyuulaalu fya fira, nta muleereve, mmbo kikee kirummbwe kyeende indo-da. Indi yoo masiiyony nalandefike-fo. 8Mashika uruka lushekwiipoo lundekapa lungyi, na umangyi lundekapa umangyi yelo lungyi, na kuveira-fo na fidinasi kundo kungyi na kungyi, kuvesha na shaa. Nalyo llyo fipooka fyuure efyo fyeefurumya. 9Kya indi kwiiseny mu veni! Mmbo vashemurambikyaa efo maakony a masiingo awe eerummbwa myaandu, neeni mundekapwa na mbiiri efo mmba teeterevya, na indeseleswa efo fisanguny fya vashilyi vaniini na vamangyi kimaruma kyakwa, kive nkyo ukureekyi lwa efo kwawo. 10Na vandu va masanga moose kuti valave mbele indeongoywa nrumi ya Iruva ya nsia. 11Na elyi meendi vemurwaa vandemurambikya efo maakony a vandu valya, nta mulapooke isaukwa kya kindo mundeambaa-fo. Indi kindo mushaambaa-fo ni ekyo mukooyaa mwankiniingwa kyeeri ekyo kyeni. Mashika veerera-u nshi yeni-fo, ni Mumuyo yeto Mweele. 12Na mwanamaye wa nndu anderambikya-fo mwanamaye nandewaawa, na ndeye wa nndu nanderambikya-fo mwana. Na fivana fya nndu fishekwiipoo kya isua vamiku vawo vandewaawa.”

Ukiva uniini

(Mat 24:15-28; Luk 21:20-24)

13“Neeni muve veesuwa mmbandu woose kimaruma kya irina lyakwa. Indi yeto asisirya-u nafike yoo mafurumyony, mmbwe akooya ikirwa.” 14Indi usutu lyulya lwa yaallwa-u irama elyi meendi mushelollyaa lwamfika alya lulasumani ifika-u na yeto mwiisoma-u nakummbwe llyo yewo vakooyaa valele kunu Yudaya vanderisha vapare mafumbu-u. 15Na yeto akooyaa akee efo mmbee-u nalaoloke nandeanga nefo nandeipoo kindo kya efo mmba kwakwe-fo. 16Na yeto akooyaa akee ireminy nalawuye na numa nandeipoo soori yakwe ya yeerya. 17Indi yewo vakooyaa vakufinngye na yoota vana fyeeri efyo, oshiny lwawo! 18Kyaindi mmbo musheterevaa Iruva efyo filasheshaa kyeeri kya mbeo. 19Shamashika fyeeri efyo kushekaa-fo fyuure, nafyo shaasa fikai, filandelollyo fing'ani indo-fo kupookya mapookyony a findo fyuumbe efyo Iruva alefitana kufike ulaalu, nta meendi a numa mfishevaa-se indo-fo. 20Na kwee fyeeri efyo kulaore fyeefiiswaa nkweekaa-fo nndu ekooya ikya-fo. Indi kimaruma kya yewo vasauwe nkyo kimaruma fyeeri efyo fishefiiswaa. 21Nalyo kwakooya nndu ashemuviaa, “Kristo akakau yaa ao akakato efo nta mulairikye-fo! 22Indi kukaa kukwiipoo Makristo wongo, na veauya fisuku va wongo. Nawo vatani fyeora wende na filandelollyo lyingyi, vakooye ireta naakwa ni yewo vasauwe, kukooye kyeevaa. 23Kevekwiiseny muveni! Akakafyo, shalava imuvia fyoose.”

Isha lya Mwana wa Nndu

(Mat 24:29-31; Luk 21:25-28)

24“Indi fyuure efyo fya fyeeri efyo fikamiira-u, llyo mwi ushaalukaa ireema na mwiiri mbusheendee-se sa ya vayo-fo. 25Na nyinyiri yeto tikooywa tishoolokaa tyuuka efo iruveeu, na finya yeto ta efo iruveeu tiverinyiswa-rinyiswaa. 26Nalyo llyo vashelolyaa Mwana yeto wa Nndu ashaa ariwa mmafishi akee na finya niini na itumbe. 27Nalyo llyo asherumaa vasu va iruveeu vandeumbya yewo vasauwe ando amwi vavaute taari yeto iinya kundo ngyuraato tauka nafo vapooke masiiyony a ulana vafike masiiyony a ngina.”

Kiloshyo kya nri wa nkuu

(Mat 24:32-35; Luk 21:29-33)

28“Naasa efo nriny wa nkuu uteny-fo ufundo lweekulosha! Iramba lya vayo lyikammaa ifumbisa na yoora maru neeni mukamanya iilula lyamfika kufii. 29Na yeni ni kiwo-da. Elyi mushelollyaa findo efyo fyutika kevemanyiny, mmbo Nndumi amfika kufii, ni yoo mwaangony akai. 30Nkya dede shamuvia, irika elyi lyishiiraa kulaore findo efyo fyainukya indo fyoose-fo. 31Kya efo iruveeu kukaa kurumake na ulana, indi kilarumakaa ni marero yoo akwa.”

Nkwiifo nndu eeshi nkonu nta saa-fo

(Mat 24:36-44)

32“Kya indi kya nkonu yeto mweni na kya saa yeyo sheni, nkwiifoo nndu afiishi-fo, nta vasu va efo iruveeu, nta Mwana-fo, kulaore ni Nde muni. 33Naasa kwiiseny muvelala shoovi! Mashika mulaishi kyeeri ekyo meendi kifikaa. 34Mmbo kyikee sheelyi nndu eenda kyaaro, kara mmba yakwe, kavikya mashinga alya akwe mumu wekallya findo fyakwe wo nndu kamwaavya ishora lyakwe. Na nringyi yeto wa poo kammbavasa nalale shoovi. 35Naasa neeni kevelaleny shoovi, kimmba mulaishi kyeeri muni kyeny ashaa, kwakooya ni nkwaany, ao ni kio nnang'ani kavii, ao ni kyeeri nguku yakapa, ao ni ngama. 36Kilave asha tiny nakooye mulele rony. 37Indi kindo shamuvia yeni, nakyo shakyivia woose, Laleny shoovi!”

Currently Selected:

Marko 13: MASNT00

Highlight

Copy