Marko 11

Yesu aanga Yerusalemu na ifura

(Mat 21:1-11; Luk 19:28-40; Yoh 12:12-19)

1Na elyi veefo vaparikyaa kulya Yerusalemu vamfika kulya Betifage na Betania nng'u ifumbuny lya miri ya mafura, nalyo karuma vakiloshyony vakwe vavii. 2Kavavia, “Endeny efo kimuriny ekyo kisumani na yaa mukai. Mukamfika-fo nalyo yeni mushekooya ngashe ya nshungu ikee shaavike. Yaauweny musheenngye! 3Na kwakooya nndu amuvia, a nkikyi elyi mwatana indo? Mbieny ni Nndumi atiri kindo aikunndye! Nawe asheirikaa-se na kyaangu iwuye na yaa.” 4Vakeenda vakavekooya ngashe ilya ya nshungu ikee shaavikye yoo mwaangony wa mmba yoo kipoo yoo ilemmyony lya shia. 5Na vandu vasalali-u maata vakavia, “A nkikyi elyi mwauwa ngashe yeyo?” 6Nawo vakavavia indo-da shaasa Yesu aamba. Vakavara. 7Vakarwaa ngashe ilya na kulya Yesu akai. Vakaala soori tawo ta yeerya efo mungony wa vayo. Nawe kasaama-u, kakaa-u rembo. 8Na vandu veefo vengyi vakaala soori tawo ta yeerya efo shia. Veengyi-se vakaala-u maramba vamanya efo mareminy. 9Nalyo valya vasongwa vakasanga na valya vasha numa, vakaonisa ngyunyanga vashaambaa, “Kundearafumwa yeto asha arumwa ni Nndumi! 10Kundearafumwa umangyi lwa nde weeru Davidi lwiifo lushaa! Hosiana efo uuwe iruveeu!” 11Nalyo kafika kulya Yerusalemu alya poo ya mmba ya Iruva. Kalola-fo findo fiiyo fyoose, kakwaanisa kakooya kwameenda nnu kwishiilaa. Kakwiipoo-fo keenda kulya Betania aryani na valya ikumi na vavii.

Yesu adenga nri wa nkuu

(Mat 21:18-19)

12Na elyi lya ndesi ngama, elyi veefo vashuukaa kulya Betania katirwa nshaa. 13Nalyo kalollya nkuu wa nndeny ukee kwaasha wamoora maru. Kasha nau kaamba kulakooye alollya-u kindo. Ashe na yoo ukai, nta nalakooye-u kindo kulaore ni maru meni. Mashika kulandefika kyeeri kya ndunda-fo. 14Nawe kauvia, “Kulakikae-se nndu alya ndunda kunu kwafo na kufike llung'anu-fo.” Na valya vakiloshyony vakwe vakakiita.

Yesu aanga mmba ya Iruva

(Mat 21:12-17; Luk 19:45-48; Yoh 2:13-22)

15Naasa vakafika kulya Yerusalemu. Nawe kaira na efo poo ya mmba ya Iruva. Kapooka yaanta-fo valya veefo veekumbaa na yuura findo efo poo ya mmba ya Iruva. Kavefullwa na mesa ya valya vealasha fesa na firi fyeekaya fya valya veekumba mbeta. 16Nta nalalekeye nndu kaira na efo poo ya mmba ya Iruva arie kindo. 17Kavalosha kavavia, “A mmbo kilakee kireiye kyeamba, ‘Mmba yakwa mmbo ivaangwaa mmba yeeterevya ya vandu va masanga moose?’ Neeni mukawuya iyaallwa mbanga ya veala shia.” 18Nalyo vakohani valya vaniini na veelosha mavavaso vakeeta. Vakasia mwaanya shaasa vemmbwaa. Nyelyi vamweereiye, mashika vandu valya vakuummbye-u mamwiingyi woose vatirwa nntamba kya kiloshyo kilya kyakwe. 19Na wo nkonu elyi kwafika iila kaveuka kulya muriny.

Kya nkuu ulya uleuma

(Mat 21:20-22)

20Naasa elyi lya ndesi ngama vashiiraa efo shia vakakooya nkuu ulya wamuuma upookya miraariiny. 21Na Petro kakummbwa kammbia, “Llosha llate nkuu yeto kuleudenga, ekakato wamuuma.” 22Na Yesu kaallwa kavavia, “Veny vekusirya Iruva! 23Nkya dede shamuvia, wo nndu avia ifumbu yelyi, ‘Ipowa yaa kukai kundeerwa efo yeeveny,’ kara nalatirwa nnyimyira efo nriminy, kakusirya-u deny, mmbo kishevaa indo-da shaasa amaamba, naasa ni indo ashewonisaa.” 24Kimmba niindo, neeny shamuvia, “Findo fyoose muterevaa efo kwa Iruva na ifyooshora, kevekusiryeny-ng'u mmbo mwammeefiwarya, nalyo mushefiwonisaa tupu. 25Na kyeeri musalalyi-u mwiiterevaa, kwakooya mutiri mwaandu na nndu, mfwaayeny, naambo na Nde waany wa efo iruveeu navemufwaaya yeni kya efyo mulyamarye. [ 26Indi kwakooya kulaore yeni mwafwaaya vandu, nta Nde yeto waany wa efo iruveeu nnashemufwaayaa yeni kya ngyulyamari tany-fo.]”

Wiidimi lwa Yesu

(Mat 21:23-27; Luk 20:1-8)

27Nalyo vakafika lyingyi kulya Yerusalemu. Naasa elyi eefo arua-ruaa efo poo ya mmba ya Iruva, kasheywa ni vakohani vaniini na vaarya va fitabu na masiingo a vandu. 28Vakashemmbia, “A ni wiidimi lwa ngata-kyi kwatana nalo findo efi?” 29Naasa Yesu kavavia, “Reny shimuvese kindo kimwi, neeny mushaallwe, llyo na yeny nshemuviaa kya mumu yeto shitiri shatana nato indo mmbwa ngata ingai. 30A ubatiso lulya lwa Yohane kundo luukye nkwi, ni efo iruveeu, ao ni kunu vanduny ndesa? Shirouweny ekyo.” 31Nawo vakaumburana wo veni na veni, vakaamba, “Kwakooya lwaamba, ‘Ni lwa efo iruveeu’, mmbo asheluviaa, ‘Naambo kyi mulamwiirikyeeny?’ 32Na kwakooya lwaamba, ‘Ni lwa kunu vanduny’, nkivaa-fo, mashika vandu woose veeshi Yohane mmbo akee nndu nkisuku dede.” 33Naasa vakarouwa Yesu vakaambia, “Llwiishi-fo.” Nalyo Yesu kavavia, “Nta yeny nshimuviaa kya mumu shitiri shatana nato indo mmbwa ngata ingai-fo.”

Currently Selected:

Marko 11: MASNT00

Highlight

Copy