Marko 10

Ilakana mmi na nka

(Mat 19:1-12; Luk 16:18)

1Nalyo kakwiipoo-fo kafika kulya myuungony ya Yudaya na kulya kwakulya ya Yordani. Vandu vakasha-se ikuummbya kulya akai nseemu mwiingyi. Nawe kava mwiivalosha shaasa eishivie. 2Nalyo Vafarisayo vakansheya, vakammbesa vemweesaa, “A ndesa nndu nndumi atiri mumu weelakana na nka wakwe?” 3Nawe kaallwa kavavia, “A Mose amuvavasye inda?” 4Nawo vakaamba, “Mose mmbo aluvikye mumu nndu nareiye barua ya ilakana nakulakannyiiny nawe.”

5Naasa Yesu kavavia, “Ni kimaruma kya mirima yaany ikee myuumu indo, nkyo kilenniinga kamureiya ivavaso elyo. 6Kya indi uka elyo mapookyony a findo fyuumbe, mmbo alevaumba vakee nndu nndumi na nndu nka. 7Kimmba ni indo, nndu mmbo asheraa ndeye na maye nandekutira na nka wakwe. 8Nawo vee vavii vandeva mwiili umwi nsi. Kikavaany nshi vakee-se vavii-fo, mmbo vava mwiili umwi nsi. 9Naasany kindo Iruva we muni allunga nndu nalakirauwe-fo.” 10Naasa elyi vakee efo mmba valya vakiloshyony vakwe vakammbesa lya kavii kya mbony yeto. 11Nawe kaamba, “Wo nndu allakana na nka wakwe kaalyika ungyi, mmbo atana kindo kya utuusi. 12Nawe nka yeto alakana na mmi, kandealyikwa ni ungyi, mmbo avetana kindo kya utuusi.”

Yesu avikya vana mbora

(Mat 19:13-15; Luk 18:15-17)

13Nalyo vakamweenngye fivana naambo nafipaani, na valya vakiloshyony vakakeemmya valya vafyeende. 14Naasa Yesu alollya indo kasua, kavavia, “Reny fivana efyo fikusheye na kwakwa, nta mulafiimi. Mashika umangyi lwa Iruva lwava lwa yewo vafwanani nawo. 15Ni kya dede shamuvia, nndu ara nalawarya umangyi lwa Iruva eetiri ngata ya kimwana, nnaonaa yaanga-fo-fo.” 16Nalyo kafishukura kafivikya mbora afyeekerye maako.

Nndu isimba

(Mat 19:16-30; Luk 18:18-30)

17Naasa elyi ansomuka na poo neende, nndu umwi kasha nau eerishaa, kamfiirya-ndi kammbesa, “Yewe Llosha nsha, a shitani inda shiwonise muu wa llung'anu uwe nto ding'u yakwa?” 18Naasa Yesu kammbia, “A nkyokyi kwashivaangya nsha? Nkwiifo akee nsha-fo kulaore ni umwi tupu, mmbwe Iruva. 19Mmbo kwiishi mavavaso yoo, ‘Kulawae, kulatuuse nta ituuswa, kulaive, kulavike ukureekyi lwa wongo. Kulasoke nndu kindo. Indya ndoo na mau.’ ” 20Nawe kammbia, “Efo fyoose mmbo shileva mwiivallya nafyo uka elyo shikee mwana n-du.” 21Naasa Yesu kammbikya miso, kankunda, kammbia, “Kindo kwasaara-u ni kimwi, enda kundekumba fyoose kutiri kwaavye vakiva, llyony kushekuwonisyaa masaa efo iruveeu. Kwammaa oshoony, kusheshilatya!” 22Nawe kakusha maviri kya ekyo avio. Keenda eesuuye mashika akee nndu atiri findo fiingyi.

23Nalyo Yesu kalola taari toose ellaa vakiloshyony vakwe, kavavia, “A paa ngatara iifo ya yewo veni masaa vakooye yaanga umanginy lwa Iruva!” 24Naasa valya vakiloshyony vakwe vakaising'ang'a elyi arera indo. Naasa Yesu kaallwa lyingyi kavavia, “Nyira fivana! A paa ngatara iifo ya vandu vakooye yaanga na efo umanginy lwa Iruva! 25Mmbo kyava kyaangu ngamula iire efo mmbweny ya sindanu ngeta nndu muni masaa nakooye yaanga efo umanginy lwa Iruva.” 26Naasa vakeengera ising'ang'a. Vakarera wo veni na veni. A nndu akooya ikirwa ni viiny? 27Yesu kavalola swaa kaamba, “Kunu vanduny ekyo nkishiidimikaa-fo, kulaore ni efo kwa Iruva. Mashika efo kwa Iruva fyoose mmbo fishiidimikaa.” 28Nalyo Petro kammbia, “Lla-te, mbee, yeese lureeye findo fyoose lukakulatya.” 29Yesu kaamba, “Nkwiifo nndu areeye mmba ao mwanamaye, ao vamfwamaye, ao maye, ao ndeye, ao fivana, ao minda, kwakooya ni kimaruma kyakwa na Nrumi yeyo ya Nsia, 30nare nalawarya ka iyana, meendi a muu yeu nawarye mmba na vanavamaye, na fivana, na minda, naakwa ni elyi aifo arishiswaa, na efo ulaniny yelo lwiishaa, nawarye muu wa llung'anu. 31Indi yewo vakee va mbee veengyi vakaa vave va numa, na yewo wa numa vakaa vave va mbee.”

Yesu aamba lya kararu kya ufu na iruka lyakwe

(Mat 20:17-19; Luk 18:31-34)

32Naasa elyi varie shia yeenda irwa na kulya Yerusalemu, na Yesu eefo avasongoyaa, nawo vakasavaa. Na vandu yewo vallatye vakatirwa mmbweerei. Nalyo kaummbya-se valya ikumi na vavii yoo akai kapooka iwoongoya efyo fikaa finsheye. 33Kaamba, “Llen-te lwiifo lurwaa na kulya Yerusalemu na Mwana yeto wa nndu nanderambikywa efo maakony a vakohani vaniini na vaarya va fitabu, nawo vamweekerye uvingo lweewaawa, vandenrambinkya efo maakony a vandu va masanga. 34Nawo vashentatalaa na imweesellya minyiri na inkapa na ngova na immbwaa vavemmbwaa, nawe namae mikonu iraru narukeny.”

Kiterewo kya Yakobo na Yohane

(Mat 20:20-28)

35Nalyo Yakobo na Yohane vakanserikya, wo vana va Sebedayo, vakammbia, “Llosha mmbo lutiri kindo lukunndye ikutereva kulutannyi!” 36Nawe kavavia, “A kindo ekyo mwakunda shimutannyi nkyokyi ndesa?” 37Nawo vakammbia, “Luniinge ando eekaa rembo umwi yoo wokony lwafo usha, na ungyi yoo woko lwafo umuso elyi kukee usuriny lwafo.” 38Naasa Yesu kavavia, “Mmwiishi nta kindo mwatereva-fo. A ndesa mushiidimaa ina upata yelo shinaa, ao ibatiswa ubatiso yelo yeny shibatiswaa?” 39Nawo vakammbia, “Lushidimaa-da!” Naasa Yesu kavavia, “Upata yelu yeny shinaa muvelunaa, na ubatiso yeny shabatiswa muvebatiswa. 40Kya indi iniinga nndu eekaa rembo yoo woko lwakwa usha na umuso, ekyo nshi kindo kyakwa yeny-fo, mmbo akee a yewo vandeesywa.” 41Naasa valya ikumi vekiita indo, vakaswa na Yakobo na Yohane. 42Nalyo Yesu kavavaanga na yoo akai. Kavavia, “Mmbo mwiishi yewo valollywa ni veshilya vandu va masanga, mmbo vavaafinyi. Na yewo vaniini vawo vakavalammya. 43Indi kunu nnang'ani yaany nshi indo kivaa-fo. Indi kunu kwany, wo nndu aiyo akunda iva nniini waany, we kuti nave nndundi waany. 44Na wo nndu akunda iva wa mbee, we kuti nave kishinga kya woose. 45Mashika naakwa na Mwana yeto wa Nndu nshi asheye ishefurukannywa-fo, ni ishefurukannya-u, na ivika-u muu wakwe uve kiraso yeewouwa veengyi.”

Yesu ashiisa Bartimayo mfu miso

(Mat 20:29-34; Luk 18:35-43)

46Nalyo vakafika kulya Yeriko. Na elyi eefo akapaa muri ulya wa Yeriko mungo aryani na vakiloshyony vakwe na vandu mamwiingyi nkuka, nalyo vakakooya mwana ulya wa Timayo, we Bartimayo, akee mfu miso akee rembo yoo mbaambaa ya shia asheereryaa vandu kyeelya. 47Kaita mmbwe Yesu wa kulya Nasareti akeeiira. Nalyo kapooka ifua na yaamba, “Woi Yesu kukee mwana wa Davidi shisarya ukiva lwakwa!” 48Vandu veengyi vakankeemmya namalallye. Nawe keengera ifua kilanya, “Woi Yesu mwana wa Davidi, shisarya ukiva lwakwa-te!” 49Nalyo Yesu kairisha kaamba, “Mmbaangeny!” Vakambaanga vakambia, “Wuiyo mmuu! Mmbo akuvaanga!” 50Nawe keera soori takwe mbai, tilya ta yeerya. Karumbuka kasalala, kasha na yoo Yesu akai. 51Nalyo Yesu kammbia, “A nkyokyi kukundye shikutannyi?” Mfu miso kammbia, “Llosha, ni ishaallwa shive nndu alollye!” 52Naasa Yesu kammbia, “Kweenngye, kwankusirya-u indo, nkyo kyakukyira!” Nalyo yeni kava nndu alollye, keenda ellatyaa efo shia.

Currently Selected:

Marko 10: MASNT00

Highlight

Copy