Matayo 7
7
Yuutya vengyi uvingo
(Luk 6:37-38, 41-42)
1“Nta mulautye vengyi uvingo, naambo mulashyeyuutywa muveni. 2Shamashika mirumbuye yaany mwanrumbuya vandu, nnyo musherumbuywaa. Na myeesye yaany mwameesya vengyi, nnyo musheesyoo. 3A yewe nkyikyi elyi kwalola kinaana kikee irisony lya mwanamau na ikongo lyikee irisony lyafo yewe kulalyimanyi? 4A ni inda kushevia mwanamau, ‘Ra nkweekye yuuta kinaana yekyo kikee efo irisony lyafo, na efo irisony lyafo kumuni ni ikongo wiifo?’ 5Yewe nkunang'ari pooka mbele yuuta ikongo yelyo efo irisony lyafo, llyo kushelolya nisha kwiidimi yuuta kinaana ekyo kikee efo irisony lya mwanamau. 6Nta mulasheeniinga fite ekyo kikee kyeele, nta samana tany mulateerye nguvefo, naambo tilasheeitivavara na imwiindukya timuratwe.”
Tereveny
(Luk 11:9-13)
7“Tereveny, neeni musheniingwa, syeny neeni musheonaa, kakapeny mwaango neeni musheruywaa. 8Shamashika wo nndu atereva mmbo aniingwa, na yeto mwisia asheonaa na yeto mwikakapa mwaango mmbo asheruywaa. 9A ni vi nndu wa kunu kwany mwana wakwe akooya intereva nkate nawe nanniinge iwe? 10Ao katereva ikunga nawe nanniinge shoka? 11Naasany yeni mukee varavi kwakooya mwaidima iniinga vana vany simbo shisha, a Nde yeto waany wa efo iruveeu nshi asheengeraa isimba yewo vatereva mesha? 12Naasa findo fyoose shaasa mukunndye itanywa mmbandu neeni veny vetana indo kimwi shawo, mashika ni indo ivavaso lyikai amwi na veawuya fisuku.”
Mwaango nsiise
(Luk 13:24)
13“Angeny ngiriny mwilatya shia yeyo shisiise, kimmba ngiri nshilandari na shia iifo itiri mwaanya nniini ni yeyo ishemufitaa uretiny na yewo vailatya vakava veengyi. 14Mashika ngiri ii-fo ikee shisiise na shia iifo nshisiise yeyo imufitaa muuny, na yewo vailatya vakava vaangu.”
Nri nndunda ta vayo
(Luk 6:43-44)
15“Kwiiseny na veawuya fisuku va wongo, mashika wo mmbo vafika kwany varee masara a moonri na efo kimmba vakava mafite eerutwarutwa. 16Ndunda tawo vavikaa nto tishevaparaa sengye muvamanyi nato. A ndesa vandu vayaya ndunda ta misabibu efo miingeny ao marwaa efo nrueny? 17Niindi kikai; wo nri nsha mmbo uvikaa ndunda shisha na nri nkasha ukavika ndunda shikasha. 18Nta nkwiifo nri nsha ushiidimaa ivika ndunda shikasha-fo, nta nri nkasha ushiidimaa ivika ndunda shisha-fo. 19Na wo nri ulavikaa ndunda shisha mmbo ushemanywaa na yeerwa murony. 20Naasany ni ndunda tawo vavikaany nto tishevaparaa sengye muvamanyi nato.”
Yeni nshimwiishi-fo
(Luk 13:25-27)
21“Nshi wo nndu ashivia, ‘Woi Nndumi, Woi Nndumi!’ Ashekooya yaanga yefo umangyi ny lwa iruveeu-fo, kulaore ni yeto atannyi efyo fikundyo ni Nde yeto wakwa wa efo iruveeu.” 22Nkonu yeto ukamfika, vengyi vasheshiviaa, “Woi Nndumi! Woi Nndumi! A nshi lweefo lweshaauyaa fisuku na irina lyafo? A nshi lweefo lweshaanta mimuyo mikasha na irina lyafo? A nshi lweefo lwetanaa fya wiidimi fiingyi na irina lyafo?” 23Llyo nshevaviaa paa, “Yeni nshimwiishi-fo. Kwiipony yaa shikai yeni vetana fya kiila!”
Vetana mmba va ngata ivii
(Luk 6:47-49)
24“Kyasiany wo nndu mwiirannya marero yoo akwa na yaatana kaatana mmbo ashevaa sha nndu nndango aletana mmba yakwe kaiveiya ando a iweny. 25Nalyo mmbwa ikakapa na mifu ikasoka na ngyuraato tikadina, tikakapa mmba ilya, nayo ilawunduke. Mashika uvasha lwavayo lukee uveiye iweny. 26Na wo nndu mwiirannya marero yoo akwa kara nalaatana mmbo ashevaa sha nndu itondo aletana mmba yakwe, kaiveiya nsangeny. 27Nalyo mmbwa ikakapa, na mifu ikasoka, na ngyuraato tikadina tikakapa mmba ilya, nayo ikawunduka. Na mmbundukye wa vayo ikawa pu.”
Wiidimi lwa Nndumi Yesu
28Naasa kikava elyi Yesu ammanda irera marero yoo, nkuka ulya wa vandu vekuumbye-u vakeesing'ang'a kya ufundo lwakwe. 29Neelyi aleva mwiifunda sha nndu atiri ushilyi nalaloshe sha velosha valya vawo va mavavaso.
Currently Selected:
Matayo 7: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.
