Matayo 3
3
Yohane Mmbatisi aamba mbony
(Mar 1:1-8; Luk 3:1-18; Yoh 1:19-28)
1Naasa fyeeri fikee filya-da nalyo Yohane Mmbatisi kafummya vandu akapaa weele kulya kasa ka Yuda kaamba, 2“Kuryeny ngyulyamari tany, kimmba umangyi lwa Iruva lwammaafukya.” 3Shamashika mmbwe eambaywa na kana ka nkisuku ulya Isaya eeshaambaa,
“Akalu unyanga lwa nndu akapaa weele efo kasa eeshaambaa,
‘Songosyeny shia ya Nndumi!’
Sumaniseny miko yakwe.”
4Nawe Yohane muni eraa soori tikee shooke; ta mafwaa a ngamula, kakufinga na ukova lwa shony efo mwiniiny. Na shoonga takwe ni nrie na ukyi wa mbakony. 5Nalyo vandu vakamweengya va kulya Yerusalemu na kulya Yudaya koose na va muungo wa Yordani woose. 6Vakandebatiswa mmbwe efo mureny wa Yordani veparaa ngyulyamari tawo. 7Kyasia kalollya Vafarisayo veengyi na Vasadukayo vensheyaa naambo vabatiswa mmbwe, “Nawe kavavia yeni ufyari lwa shoka, a ni vi alemwiikimba shaasa musheturuunyaa unyafi lwa Iruva yelo lukaa luwoye ulana? 8Oreny kyuuka na mashora any mwalashike mirima! 9Nta mulakusare mwaambe, Nde weeru luntiri ni Abrahamu! Mmbo shamuvia, Iruva ashiidimaa iparya Abrahamu vana navaute naakwa kunu maweny. 10Na kyaara mmbo kyammaa ivikwa sindeny ya miri. Naasa wo nri wiiyo ulavikaa ndunda shisha mmbo umanywaa undeerwa murony. 11Kyakwa yeny shamubatisa na mura mukooye yaalashika efo nriminy. Indi yeto ashaa numa yakwa mmbo atiri finya kashiilanya. Na yeny nshimaa nta shintare fyaaru fyakwe-fo. Mmbwe ashemubatisaa na Mumuyo Mweele na muro. 12Nawe arie nndeeva na woko lwakwe na efo muunguny wakwe asheaiyaa-fo kwiile peru. Na nganu yeto nataallye efo mbesheny yakwe na muulu yeto nandeuvivya murony ularumikaa.”
Yesu abatiswa
(Mar 1:9-11; Luk 3:21-22)
13Nalyo Yesu kasha auka Galilaya kafika kulya Yordani kwa Yohane nandebatiswa mmbwe. 14Nawe kakunda imwiima kammbia, “Yeny mmbo shisumani ibatiso ni yewe, na yewe kwasha na kwakwa?” 15Yesu kammbia, “Ra! Ulaalu kikuviiyeny indo! Mashika ni indo kilusumanyi; naambo lwiinutye efyo Iruva akundye fyoose.” 16Naasa elyi Yesu ammebatiswa kauka efo mureny. Nalyo efo iruveeu kukanraukya kalollya Mumuyo wa Iruva ashoolokaa akee sha mbeta kasha inkaya. 17Nalyo akakalu unyanga lureraa luuka iruveeu lukaamba, “Yeu mmbwe mwana wakwa nkunde, mmbwe shilensauwa.”
Currently Selected:
Matayo 3: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.