Matayo 17

Yesu aalashika fwana

(Mar 9:2-13; Luk 9:28-36)

1Nalyo kukaira-u mikonu irindaru, Yesu kaipoo Petro na Yakobo na Yohane we mwanamaye wa Yakobo, kavasaamisa kundo kwa ifumbuny yaasha vakee kyaanya kyawo veni. 2Nalyo kaalashika fwana yakwe valollye. Kisangu kyakwe kikamika sha mwi mweni. Na soori takwe tikava shaa pyai sha sa sheni. 3Nalyo akakava Mose na Elia vansha nau ikoora nawo, vakarera nawe. 4Naasa Petro karouwa kavia Yesu, “Nndumi nkisha elyi yese lukee kunu! Kwakunda ntanaa matengo araru, lyimwi lyafo, na lya Mose lyimwi, na lya Elia lyimwi.” 5Arera indo nalandesyado akalyi ifishi lyitiri sa lyikavavikya kirishe. Akalu na unyanga luvaangaa luuka efo ifishiny lukaamba, “Akakau Mwana wakwa nkunde, yeto shilensauwa, mmbwe mushemwaarannyaa!” 6Naasa valya vakiloshyony vaita kiireraa indo vakawa si na fisangu vakairyaa nnu. 7Yesu kaserikya nau kavapaana, kaamba, “Kwiipony-te! Nta mulairyae-fo!” 8Vakainuya miso na uwe valakilollye-se nndu, kuuta Yesu muni. 9Naasa elyi veefo vashoolokaa kulya ifumbuny, Yesu kavavavasa kaamba, “Kindo ekyo mwamoorwa nta mulandeekivia nndu, na mutani mwafika kyeeri ekyo Mwana yeto wa nndu annduka auka kwa vafu.” 10Naasa yewo vakiloshyony vakammbesa, vakaamba, “Mmbo kyikee inda elyi vaarya va fitabu vaammbaye, ‘Elia kuti napooke isha mbele.’ ” 11Nawe kaallwa kaamba, “Elia isha ashaa-da navauwe findo fyoose fishie sha elyo mbee.” 12Indi yeny shamuvia, “Elia alemmeesha nta valammanyi. Vakantannya shaasa vekundye. Na Mwana yeto wa nndu ni kiwo-da, we kuti navelyiswa ukiva mmbo.” 13Nalyo vakiloshyony vakamanya mmbo arera nawo kya Yohane Mmbatisi.

Yesu ashiisa mwana nsukwa

(Mar 9:14-29; Luk 9:37-43a)

14Na elyi vansha na efo kundo vandu vakuumbye-fo nkuka kasheyo ni nndu kashemoolokya ng'undeny. 15Kaamba, “Woi Nndumi! Sarya mwana yeu wakwa ukiva. Mmbo atirwa ni usukwa, kava mwiivavyo kyuumu. Mashika keengyi awa murony na keengyi kavewa efo mureny. 16Na yeny shamweengye yewo vakiloshyony kyafo, nta valaidimi inshiisa.” 17Na Yesu kaallwa kaamba, “Apaa irika lyilemmyi ikusirya-u lyikaenda mbai. A shikae neeni shifike kwi? Mweende na yaa shikai-te!” 18Naasa Yesu kankeemmya, nalyo mumuyo ulya nkasha ukamuuka. Na mwana ulya kashia kipookya sa ilya sheni. 19Nalyo vakiloshyony vakakuumbya yoo Yesu akai vekee kyaanya kyawo, vakaamba, “A elyi yese kulaore luleidima iwaanta nkikyi?” 20Nawe kavavia, “Neelyi kikusiryo kyany kyava kyaangu! Ni kya dede shamuvia, ‘Kwakooya mwatira kikusiryo na kikava kyaangu sha mbekye imwi ya karadali, mmbo musheviaa ifumbu yelyi, kwiipoo yaa kuteshuke-u, nalyo lyiteshukaa-da.’ Nta nkwiifo kindo kilashiidimikaa kwany-fo. [ 21Ngata yei nnyishuukaa kulaore ni elyi kwatereva Iruva ando amwi na ikootoya-fo.]”

Yesu arera lyingyi kya ufu na iruka lyakwe

(Mar 9:30-32; Luk 9:43b-45)

22Naasa elyi veefo vashiira-iraa kulya Galilaya, nalyo Yesu kavavia, “Mwana yeto wa Nndu eefo anderambikyoo maakony a vandu. 23Nawo vashemmbwaa. Na elyi lya nkonu wa kararu asherukaa. Nawo vakasokywa mfyoova nnu.”

Itaa ukamba lwa mmba ya Iruva

24Naasa elyi vamfika kulya Kapernaumu, valya veesana ukamba lwa mmba ya Iruva vakasheya Petro, vakaamba, “A llori yeto waany aniingyaa fesa ya mmba ya Iruva? Petro kavavia, ‘Avikaa-da!’ ” 25Naasa kaanga na efo mmba. Yesu kalava irera nawe, kaamba, “A mmbo kukusarye inda Simion? Vamangyi va masanga mmbo vashuutaa udedemi na ukamba kwa vandu vangava? Ndesa ni efo kwa vana vawo, ao ni efo kwa yewo vengyi?” 26Nawe kaamba, “Ni efo kwa vengyi-te!” Yesu kammbia, “Naasany vana yewo mmbo vakee vaute-fo-sho. 27Indi yese nta lulavateve vaute nsindara kweru. Naasa enda efo yeeveny kundeolota kiminya ekyo kya ngorori kyeereiya makunga. Na ikunga yelyo kulavaa ilyuuta-fo mmbo kushelyiipoo kulyitarammbwe kana. Llyo kushekooyaa-fo fesa imwi. Yuute-fo kundevaniinga ando akwa na afo.”

Currently Selected:

Matayo 17: MASNT00

Highlight

Copy