Matayo 15

Miindye ya vakuu veru

(Mar 7:1-13)

1Nalyo Yesu kasheywa ni Vafarisayo na velosha va mavavaso vauka kulya Yerusalemu. Vakaamba, 2A nkikyi elyi vakiloshyony kyafo vava veimmbwa ngyufundo ta vakuu? Mashika vara valasangya maako elyi valya shoonga. 3Nawe kaallwa kavavia, “Nkyiki elyi yeni mwava veimmbwa ivavaso lya Iruva kimaruma kya ngyufundo yeto tany? 4Shamashika Iruva mmbo avavasye kaamba, ‘Indya ndoo na mau. Na yeto aruma ndeye ao maye iwaawa nawaawa.’ 5Na yeni mukaamba-le, ‘Kwakooya nndu amina ndeye ao maye, Kavavia efyo mweewarya kwakwa fyeemulela, akakafyo shammefivika five waavi lwa mmba ya Iruva! Naasa, nndu yeto nalakiindye-se nta ndeye nta maye-fo.’ 6Na yeni mukaniinga ivavaso elyo lya Iruva lyikarewa mutewa ni ngyufundo yeto tany. 7Mmbo mukee vakunang'ari, Yesaya kamuronga ninsha elyi aleawuya kisuku kilya kaamba,

8‘Vandu yeva ni firomu fyawo vashiinndya nafyo,

indi ngoo tawo tikakaa kwaasha neeny.

9Mmbo vashiinndya kikee kya ruu deny,

mashika miloshye yaawo valosha

ni mavavaso a kivandu.’ ”

Findo fyatefusa nndu

(Mar 7:14-23)

10Naasa kavaanga mamwiingyi ulya wa vandu naambo vashekuummbya yoo akai. Kavavia, “Aranyiny mwiitumuso! 11Kindo kireveesa nndu nshi yekyo kishangaa na kaniny-fo, ni yekyo kishuukaa kaniny, nkyo kindo kireveesa nndu.” 12Naasa valya vakiloshyony vakasha na yoo akai, vakaamba, “A ndesa kwamanya Vafarisayo vamiita kirero ekyo vakauta-u nsindara?” 13Nawe kavavia, “Wo kindo kivaakye kiiyo kulaore kyammbaaywa ni Nde-yaakwa wa efo iruveeu mmbo kishiiluwaa. 14Vakureeyeny-te! Mmbo vasongoye vafu miso shia vavekee vafu miso wo veni. Na kwakooya mfu miso asongoya mfu miso uroye shia, mmbo vashoolokaa irininy vee vavii.” 15Naasa Petro kaallwa kammbia, “Lukapye nsuka wa kyaaso ekyo, mbee!” 16Nawe kaamba, “Na yeni-da fika ulaalu nta mulandeipuye kindo? 17A mmbo mulandeitumuso sheelyi wo kindo kishangaa na efo kaniny, mmbo kishoolokaa na ndewuny kikauka-fo kikaenda irininy? 18Indi efyo fishuukaa efo kaniny mmbo fisomukaa fyuuka efo nriminy. Nafyo mfyo fireveesaa nndu. 19Shamashika efo ngoony mfo kundo kushuukaa makusaro meesi, na fya uwai, na fya utuusi, na wiivi, na fya urui, na fya ukureekyi lwa wongo, na fyaararo. 20Mfyo efyo fireveesaa nndu. Indi nndu kalya shoonga na maako alakee masangye nshikyo kireveesaa nndu-fo.”

Kikusiryo kya nka umwi

(Mar 7:24-30)

21Naasa Yesu kakwiipoo warya kooka-u, kafika kulya myuungony ya Tiro na Sidoni. 22Nalyo akau nndu nka wa Kikanaani ansha nau, auka urukeny lwa kufii-fii. Kaonisa unyanga, kaamba, “Woi Nndumi kukee mwana wa Davidi, shisarya ukiva lwakwa! Mmbo shitiri mwana wa kyeny atirwa mmumuyo nkasha ukamwaaruva kyuumu.” 23Nawe nalanndouwe nta kirero. Naasa, vakiloshyony kyakwe vakanserikya, vakantereva, vakaamba, “Ntauwe mbee, mmbo afua nnu yoo numa yeeru.” 24Nawe kaallwa kaamba, “Nshilerumwa kundo-fo, kulaore ni kwa vandu va Israeli varekye sha moonri.” 25Nawe kasha nau kamoolokya si, kaamba, “Woi Nndumi sheekya kima kyakwa-te!” 26Nawe kaallwa kaamba, “Nshi kisha nndu nasoke fivana shoonga yaawo neerye fite-fo.” 27Nawe kaamba, “Ee-da Nndumi. Indi naakwa ni fite fikulyiiyaa fipereshu fishaangaraa fyuuka efo meseny a vanndumi va vayo.” 28Nalyo Yesu kaallwa, “Ee nka, kwankusirya-u kiniini-dwa. Kivekuviiyany indo shaasa kwakukunndya!” Nalyo mwana ulya wakwe kashia kyeeri kilya kyeni.

Yesu ashiisa vandu veengyi

29Naasa Yesu kakwiipoo-fo kandefika kulya waambeu lwa yeeve ilya ya Galilaya. Kasaama na kulya ifumbuny kakaa-fo rembo. 30Naasa vandu vakamweengya matorito meengyi varie yewo vakee miketekete, na vafu miso, na mbimbi, na fitongororo, na va ngata ingyi veengyi, vakaveera yoo marendeny akwe. Nawe kavakira. 31Vandu valya vakuummbye-u vakasongololo elyi valollya valya fitongororo veshiaa, na valya vakee miketekete vesheendaa, na valya vafu miso velolaa. Nawo vakauta-u ing'anisa Iruva wa Israeli.

Yesu awutisa vandu mmwasi ya fiku fiina

(Mar 8:1-10)

32Naasa Yesu kavaanga valya vakiloshyony kyakwe vakuummbye yoo akai, kaamba, “Mmbo shavavyo mmuu kya nsemu yeu wa vandu. Mashika kwammiira-u mikonu iraru sele vesisirye yaa kwakwa, nta valatiri kindo kyeelya. Nta nshikunndye ivasama indo valakomba kindo-fo, mmbo valemmywaa efo shia.” 33Valya vakiloshyony vakammbia, “A yaa kasa lukai, nkwi lushuutaa mikate miingyi indo yeewuutisa vandu yeva vamiingifwa indo?” 34Na Yesu kavavia, “Mikate mutiri ni iinga?” Vakammbia, “Ni mfungare, na fikunga fiifo fyaangu.” 35Naasa kavavasya vandu valya vakuummbye-fo mamwiingyi vakee rembo. 36Naasa kawarya mikate ilya mfungare na makunga alya. Kaarafuma Iruva kafisha-fisha fyenga, kaniingya vakiloshyony. Valya vakiloshyony vakandeavya mamwiingyi ulya. 37Vakalya woose vakawuura vakaveipoo na fipereshu filya fyasaa, mikusha ikaishwa mfungare. 38Na vandu valelya vafye womi fiku fiina kwauta-fo vaka na vana. 39Naasa kasama mamwiingyi ulya wa vandu. Kandesaama na efo ngalaveny. Kandefika kulya myuungony ya kulya Magadani.

Currently Selected:

Matayo 15: MASNT00

Highlight

Copy