Luka 5

Yesu avaanga vakiloshyony vakwe va mbee

(Mat 4:18-22; Mar 1:16-20)

1Kyikava elyi vandu valya vakuumbye-fo veefo vansisiraa veshaaranyaa ndera ya Iruva, nawe asalalyi yoo mbai ya yeeve ilya ya Genesareti. 2Kalollya ngalava ivii tikee shiirikise yoo mbai ya yeeve ilya. Na valya veereiya makunga vambuka-fo veefo vasangyaa mireiyo yaawo ya nruu. 3Naasa ngalava tilya kaalukya ilya imwi, nayo ikee ya Simon Petro. Kantereva naisembere yuuke yoo kwaarutu yeende neefo kimureny kinnywa. Kakaa-u rembo, kalosha. 4Ammanda irera kavia Simion, “Enderwaa ngalava yeyo efo nnang'ani ya mura, moolote-fo mireiyo yaany mureiye makunga.” 5Simon kaalwa kammbia, “Ale Llori! Lweelele rembo taa lwiivinaa, lulatire nta kindo. Indi kwammbika-u ulumi lwafo yewe, nsheendaau yoolota mireiyo yakwa efo mureny.” 6Vakatana indo vakareiya kyilula kya makunga. Mireiyo ilya yaawo ikatana yasia iranduka. 7Vakasinnya wooroye valya vawo vakee ngalaveny ilya ingyi, vashe ivatarama yaalutya wambeu. Vakavesha vakaishura ngalava tilya tiivii, tikatana takunda idovya na si. 8Naasa Simon Petro alolya kive indo, kakutuula si yoo marendeny a Yesu, kaamba, “Nndumi uka yaa shikai, mashika shikee nndu llyamari.” 9Nyeli asongololo na valya akee nawo woose kimaruma kya kilula kilya kya makunga vareiya. 10Na vana valya va Sebedayo, we Yakobo na Yohane, wo ni kiwo da. Yesu kavia Simon, “Nta kulairyee! Uka ulaalu kushaalukaa mwireiya vandu.” 11Vakanderwaa ngalava tilya alya kwaarutu, vakaisityo-u findo fyoose vakallatya.

Yesu eeremuta nndu atirwa ni ivave

(Mat 8:1-4; Mar 1:40-45)

12Nalyo kyikava elyi amfika muriny ilya umwi wa vayo, akakau nndu nsero asiiye ni ivave deny. Nawe alolya Yesu kamoolokya si kantereva kaamba, “Woi Nndumi kwankunda kushiidimaa isheremuta.” 13Nalo kaorwa woko kampaana, kammbia, “Shankunda eremukany!” Nalyo yeni ivave llya lyikammbuka. 14Nawe kammbavasa nalendekivya nndu. Kaamba, “Mmbo kusheendaa ikoora kulya kwa nkohani, kuvevika na kindo kyeniinga Iruva kya elyi kwammeeremuka, shaasa Mose avavasye kive nkyo ukureekyi lwa efo kwawo.” 15Naasa mbony yeto takwe tikeengera ikwaana. Na vandu vakava vekuumbya-u misemu miingyi vashe imwaaranya na ishiiswa ndwari tawo. 16Nawe muni kandekoovisa kundo kulalelwa katerevya-fo Iruva.

Yesu ashiisa nndu muumu malungo

(Mat 9:1-8; Mar 2:1-12)

17Nalyo kyikava mikonu ilya elyi lyimwi eefo aloshaa, na Vafarisayo vakee-fo rembo vasangyi na veelosha mavavaso, nawo vasheye vauka wo kimuri kya kulya Galilaya na Yudaya na kulya Yerusalemu. Na wiidimi lwa Nndumi lwinkaye nakooye ishiisa vandu. 18Nalyo akakava vasoro vansha nang'u varie nndu na kitara akee muumu malungo. Vakasia mwaanya wemwiita na mmba na immbika yoo usumanu nawe. 19Valaoni shia yemwiita nafo kimaruma kya nsemu ulya wa vandu vakuumbye-u. Vakasaama na efo mmbeeu. Matofari alya maale vakauta-fo maata, vakamwoolota nang'u ando amwi na kitara kyilya kafika si yoo Yesu akai. 20Nawe elyi allolya shaasa vakusirya-u indo, kaamba, “Nndu wakwa kwammefwaaywa ngyulyamari tafo!” 21Nalyo veelosha va mavavaso veefo na Vafarisayo vakapooka itirwa mmakusaro vakaamba, “Ni nndu kyi yeu arera indo kyikee kya iruma Iruva?” Mmbi ashiidimaa ifwaaya vandu kya ngyulyamari tawo kuloore ni Iruva muni? 22Naasa Yesu kamanya makusaro alya awo kaalwa kavavia, “A ekyo mukusarye efo nriminy ni kya ngata ingai? 23A kyaangu ni kyingakyi? Ndesa ni yaamba, ‘Kwammefwaaywa ngyulyamari tafo,’ ao ni yaamba, ‘Salala kurue-rue?’ 24Naasa manyin-te Mwana yeto wa nndu mmbo atiri mumu-da kunu urukeny wefwaaya vandu kya ngyulyamari tawo.” Naasa kavia nndu ulya muumu malungo, “Salala, kwepoo kitara kyafo, kweende na kyeny kwafo.” 25Na kyaangu naakyo kasalala velollye woose. Kakurika kitara, keenda kulya kyeny kwakwe esharafumaa Iruva. 26Na vandu vaiyo vakaising'ang'a woose, vakava vaarafumany Iruva. Vakatirwa mmbwerei. Vakaamba, “Inu lwalolya findo fya wende.”

Uvaango lwa Levi

(Mat 9:9-13; Mar 2:13-17)

27Nalyo ekyo kinsia kakwipoo-fo kalolya nndu n-dedemi, avaangwaa Levi, ekee rembo efo mmba yeededemya. Kammbia, “Shilatya!” 28Nawe keesityo-u fyoose, kakwipoo, kallatya. 29Nalyo Levi kavika suku-kuu niini, kukasha nafo nseemu mwiingyi wa vadedemi na vandu vengyi vasasangyi nawo. Vakakaa-fo rembo vakalya shoonga. 30Nalyo Vafarisayo vasangyi na veelosha mavavaso vakakunung'una veereraa na valya vakiloshyony vakwe vakaamba, “A kimaruma nkyikyi elyi mwalya na ina indo amwi na vadedemi yewo valyamari?” 31Na Yesu kaallwa kavavia, “Nshi yewo vakee na finya vatinnyo mmwaanga-fo, ni yewo valwee. 32Nta nshisheye ivaanga yewo va usumanu-fo, kulaore ni yewo valyamari naambo vakooye yaalashika efo nriminy.”

Ekyo kya ikootoya

(Mat 9:14-17; Mar 2:18-22)

33Nawo vakammbia, “A elyi vakiloshyony kya Yohane vakootoyaa keengyi na ivika fiterewo, na vakiloshyony kya Vafarisayo vakavetana kiwo, indi yewo vafo wo valya na ina.” 34Naasa Yesu kavavia, “A mwaamba mushiidimaa iitikya vandu va walyi vakootoye elyi muni walyi akee nawo? 35Indi kwikaa kushe mikonu elyi vasokwaa muni walyi. Llyo kyeeri vashekootoyaany.”

36Naasa kaveera kyaaso ekyi. “Nkwiifo nndu asaara kirami efo sooriny shiiya kakifummya efo sooriny shikuu-fo. Kakyifummya-u mmbo asheniingaa na soori ilya shiiya iranduke. Na kirami ekyo kya efo sooriny shiiya nta nkyishiishivanaa na yeyo shikuu-fo. 37Nta nkwiifo nndu asuruma mfinyo mwiiya efo mbolokony ta masara makuu-fo. Kasuruma-fo mfinyo yeto mwiiya mmbo uriita mboloko yeto. Nato mweni upusuke, na mboloko nato tikavelyamarika. 38Indi mfinyo eto mwiiya kuti undesurumwa mbolokony shiiya. 39Nta nkwiifoo nndu ammaa ina mfinyo nkuu kakunda yeto mwiiya-fo. Mmbo ashambaa, yeto nkuu nto utiri muye.”

Currently Selected:

Luka 5: MASNT00

Highlight

Copy