Luka 21

Kiraso kya nka wa ding'u

(Mar 12:41-44)

1Naasa Yesu kalolya vandu masimba shaasa vavika firaso fyawo efo isandukuny lyeesanyirya fesa ta mmba ya Iruva. 2Naasa kalollya nka wa ding'u akee nkiva avika-fo senti ivii. 3Nalyo kaamba, “Nkya dede shamuvia, ‘Nka yeu wa ding'u akee nkiva indo mmbo avika kiniini ngota woose. 4Mashika yewo woose ni efo findony fyawo fya mmwasi vauta efyo vavika fya pya.’ Indi we ni efo findony fyakwe fyerorwa aleuta kavika kyoose atiri kyeelela muu wakwe.”

Yesu aamba kya iwunduwa lya mmba ya Iruva

(Mat 24:1-2; Mar 13:1-2)

5Nalyo kakooya vandu vereraa kya mmba ya Iruva elyi ikee shishope indo na mawe a utore na findo vandu vavikye fya iishopa, nawe kaamba, 6“Kya efyo mulollye kukaa kushe fyeeri kulasherewaa-u iwe lyikweekyerye iwe lyingyi lyire lyilawunduyo si-fo.”

Makiva ashaa na irishiswa

(Mat 24:3-14; Mar 13:3-13)

7Naasa vakammbesa vakaamba, “Llosha a meendi kisheutikaa indo ni indii? Na elyi findo efyo fyamfika isha, wende lwavayo llokyi?”

8Naasa kaamba, “Kwiiseny mulasheelembwa mashika veengi vasheshaa na irina lyakwa vashambaa, ‘Mmbwe yeu!’ vaveamba-se, kyeeri ekyo kyikee kufii kyifike. Neeni nta muleende ivalatya-fo. 9Indi meendi mushitaa kwiikapaa fira na myaalukoluko ya vandu iifo, neeni nta mulairyee! Mmbo kyikee kirummbwe kisongwe yeenda indo, indi yoo masiiyony nshilyo yeni ammba isha-fo.” 10Keengera ivavia, “Uruka lushekwiipoo lukape uruka lungyi, na umangyi luvekapa umangyi lungyi. 11Kushiraa-u na fidinasi finiini, na shaa na ndwari wo ando, na ngyende teeresye tivelolyo tuuka neefo iruveeu. 12Indi kindo kipokaa itanyika kulaore findo yefyo fyansha, mmbo veshemutiraa na imurishisa vandemurwaa efo mmba tawo teeterevya, na mmba ta vafinge, mundevefitwa na efo fisanguny fya vamangyi na vashilyi yewo va Kaisari kimaruma kya irina lyakwa. 13Nakyo nkyo kishemwengyee mwaanya weevika ukureeki lwany. 14Naasa nng'u mushefishyaa shila tapa efo nriminy mure mulakusara-saraa kindo musherouwaa ewo vamukumba. 15Mashika ni yeny nshemuniingaa kana na urango usha, na vakiduva yewo vany woose nta valashiidimaa ifilyimba na ifyaallwa. 16Indi naakwa ni vamiku vany, na vanavamaye vany, na woofyari vany, na vambuya vany, mmbo mushendaa irambikyo mmbo efo maakony a vakiduva, nawo vamwiite na ufuny yeni maata. 17Muveva na veesuwa mmbandu woose kimaruma kya irina lyakwa. 18Manyiny naakwa ni ufii lwa efo nrweny wany nta llusherekaa-u-fo. 19Kwakooya mushesisirya-u llyo mushekirwaa.”

Yesu aamba kya muri wa Yerusalemu ilyamarwa

(Mat 24:15-21; Mar 13:14-19)

20“Indi meendi mushelolyaa kunu Yerusalemu kushingilyo mmatorito a fira nalyo manyiny, mmbo kwamfika kyeeri kya vayo kyealuka irama. 21Nalyo yewo vakooyaa vakee kunu Yudaya varishe vandepara na mafumbu-u. Na yewo vakooya vakee mareminy, wo valawuye na numa vandeanga nafo-fo. 22Mashika fyeeri efyo mfyo fyeetaiya naambo efyo fikee fireiye fikooye indeinukya-u fyoose. 23Indi yewo vakooyaa vakufingye na yoota vana fyeeri efyo, oshiny lwawo! Mashika llyo uruka lushewoywaa ni ngatara shiniini, na vandu va uruka yelu vakooye iwoywa ni ngapo shinyaasi. 24Nalyo vashewawaa noosu na inderawa mifungwa efo vanduny va masanga na usu. Na kunu Yerusalemu kuve kundo vandu va masanga vavavara kutani fyeeri fyawo fyafika.”

Masheyony a Mwana wa Nndu

(Mat 24:29-31; Mar 13:24-27)

25“Nalyo kushelolyoo ngyende efo ngini-u na efo mwiiriny na efo nyinyiriny. Na kunu urukeny vandu va masanga vasheerevee vatambwa ni yeeve yeyo shiniini ishonaa na irosa matundulu maniini. 26Na vandu vashumaa mwaangaya kimaruma kya weerei na ivereya kindo kikaa kiwoye ulana elu, mashika vekooyaa na finya yeto ta efo iruveeu tirinyiswaa-rinyiswaa. 27Nalyo llyo vashelolyaa paa Mwana yeto wa nndu ashaa ariwa ni ifishi atiri finya shiniini na itumbe. 28Na yeni meendi mukooyaa findo yefyo fipookaa itanyika, kwipoony shu muveinwa mirwe yaany, mashika kwamfika kufii na mawoweny any.”

Kyaaso kya nkuu

(Mat 24:32-35; Mar 13:28-31)

29Nawe kaveera kyaaso, “Loleny nkuu na miri ingyi myoose. 30Kwakooya yamfumbisa mmbo mwamanya kwamfika kufii na iilula. 31Na yeni ni kiwo-da, meendi mulolyaa findo efyo fiifo fishutikaa, kyevemanyiny ni umangyi lwa Iruva lwamfika kufii lulolyo paa. 32Nkya dede shamuvia, irika elyi llyishesiaa kulaore findo efyo fyamiinukya indo fyoose-fo. 33Ngina na ulana firumakaa, kilarumakaa ni marero akwa.”

Laleny shoovi

34“Kya indi kwiiseny muveni, mirima yaany ilakooye irovyo mwiitalauwaa ndeu na inangwa mmbwari na yaafuka kya findo fya muu yeu, na nkonu yeto umuwoye tiny sha nsoori. 35Shamashika ushesheyaa vandu vakee yaa ulaniny ukooye vakweekye. 36Naasany, laleny shoovi wo kyeeri mwiiterevaa Iruva mwiidimi ikyia findo efyo fyoose fikee fiteerye fishe, muverewa mwiisalalyi yoo mbee ya Mwana yeto wa Nndu.” 37Naasa, fyeeri fya nsanyiny kava mwiilosha efo mmba ya Iruva, na kyio kandelala kulya ifumbuny lya Miri ya mafura. 38Na ironda llya lya vandu lyoose lyikava lyilavaa insheya ngama efo mmba ya Iruva lyishemwaaranya.

Currently Selected:

Luka 21: MASNT00

Highlight

Copy