Mashora 19

Paulo alosha kulya Efeso

1Naasa kyeeri Apolo ekee Korinto na Paulo ekimaa iira ngyuruka eto ta taari ya ndoo, kafika Efeso, kakwaanannya-fo na vakiloshyo vaangu, 2kavavesa, “A mulewarya Mumuyo Mweele kyeeri mulekusiryau?” Vakammbia, “Oode, nta iita sheelyi kukaa-fo Mumuyo Mweele llulemiita-fo.” 3Kavavesa, “A mmbo mulebatisyo ubatiso lungalu?” Vakaamba, “Ni ubatiso lwa Yohane.” 4Paulo kaamba, “Yohane alebatisa ubatiso lwa ikurya ulyamari, eeviaa vandu vakusirye, yeto asheshaa numa, we Yesu.” 5Vekimaa iita efyo vakabatiswa na irina lya Ndumi Yesu. 6Na Kyeeri Paulo alemaa iveekerya maako Mumuyo Mweele kavaolokya; vakapooka irera na fishomu fingyi verumishaa Iruva. 7Woose yewo vekee vomi ikumi na vavii.

8Kaanga kiterevyony kya Vayuda, Karera na ukaari ando a miiri iraru, eereryana nawo, na yoomwa vandu kya mbony ta umangyi lwa Iruva. 9Vengyi vakaumisa ngoo, vakalema ikusirya-u, vakamina shia yei vandu vengyi veiitye. Naasa kauka-u kavara-u, kavika vakiloshyony mbai, kareryana na vandu wo nkonu efo mmba ya ikwaanu ya nndu umwi avaangwaa Tirano. 10Mbony yeti tikaenda indo ando a myaaka ivii, kutani vandu woose va Asia, Vayuda na Vagriki vaita irero lya Nndumi.

Vana va Skewa Vakakyeemya mimuyo mikasha

11Iruva kaora na ngyende shiingyi tiilanyi fyeeso shiingy kwa shia ya maako a Paulo, 12kutani vandu valoe veengyo firami na soori tooka mwiiliny wakwe, ndwari tawo tikavauka, na mimuyo mikasha ikavauka.

13Vayuda maata veraoraa na vengyi ni vaanga va mimuyo mikasha vakeesa isenda irina lya Yesu kweewo vekee valammyi ni mimuyo mikasha, veshambaa, shamulyisa mmboo na irina lya Yesu, ulya akee yambawa ni Paulo. 14Veefo vana mfungare va nndu umwi avangwaa Skewa, Myuda, nkohani nniini, mmbo vetana indo. 15Mumuyo ulya nkasha kavavia, “Yesu shamumanya na Paulo shimwiishi a yeni ni vaki?” 16Na nndu ulya etirwa mmumuyo nkasha karumbukya vavii, kaveedima kavaringa kutani vasomuka mmba ilya veerishaa valaree soori vammbikwa na fyaasha.

17Mbony yei ikamanyika ni Vayuda na Vagriki woose vakee Efeso, weerei lukavatira woose, na irina lya Nndumi Yesu lyikang'aniswa. 18Na veengyi va valya venkusirya-u vakakurya veshoraa paa mashora awo. 19Na vandu vengyi vasavi vakaipoo fitabu fyawo vakafikora na muro mbee ya vandu woose; vakakapa yeekena lya vayo, tikafika fesa fiku makumi araanu. 20Kikavaany niindo irero lya Nndumi lyileengera ivinga na finya.

Ngapanu kulya Efeso

21Mbony yeto tikimaa itanyika, Paulo ekimaa iira nnang'ani ya Makedonia na Akaya, karummbwa shila neende Yerusalemu, eshambaa, “Shammuka-fo shivefika na Rumi nafo.” 22Karuma-u vandu vavii nnang'ani ya valya vemfurukanyaa veende Makedonia, nawo ni Timoteo na Erasto, kyaindi we muni keengera ikaa mbele yoo Asia. 23Kyeeri ekyo kukakaa-fo ngatara ilakee shidu kya mbony ta Shia yei ya Nndumi. 24Mashika nndu umwi evaangwa Demetrio mfuru wa fesa na isongosia mafwanu a fesa a mmba teeterevya ta Artemi (iruva lya Kigriki lya kyika) eewonisyaa vaarya valya vawo fesa shiingyi. 25Yewo kavasanyirya na vengyi se yewo vekee va ishora elyo yeni, kaamba, “Eni vomi, mwishi usimba lweru mmbo luukye kunu ishoreny elyi. 26Na ulaalu mwiitye sheelyi nshi kunu Efeso kweni-da-fo, ni Asia koose Paulo mmbo ammeveta vandu veengyi neevainduta mirima yaawo, eshaambaa yoo akeesongosyo mumaako a vandu nshi maruva-fo. 27Nkyo kyaamba ulaalu ishora elyi lyeru nshi lyikee nrengeny yeeminwa-da-fo; kyaindi na mmba ya iruva lya kika elyo lying'ani, we Artemi, mmbo lyilolyoo nshi kindo-fo, lyisokwa itumbe lya vayo, nalyo Asia shoose na ulana loose-da mmbo valyiinndye.” 28Vekiita indo vakarooyo ni unyafi, vakaongora, veshaambaa, “Artemi wa Efeso ni nniini.”

29Muri moose ukasavaa, vandu woose vakeenda vakandefika ando kwa fitavanu veeriani, vammaa itira Gayo na Aristariko ni vandu va Makedonia veriani na Paulo. 30Paulo mmbo ekundye isanga efo vanduny yewo llyo vakiloshyony vakantira. 31Vasongoru va Asia maata, valya vakee vambuya vakwe, vakaruma vandu kwakwe, vamwikimbe nalashendefika tara alya ando a fitavanu. 32Naasany maata mmbo vekee irorongya indi na vengyi indo, mashika ironda lyilya mmbo lyemmalaluka nnu, na vengyi vawo nta mmbemanya nkyokyi kyatanyika kikaveende alya-fo. 33Vakaipoo Iskanda vakamuuta efo irondeny elyo Vayuda vakammbika yoo mbee ya vandu. Iskanda kavatukya woko ekundye nakukureekye woose veiitye. 34Kyaindi llya valemanya we ni Myuda vakarorongya woose ando amwi ando a saa sha ivii indi, veshambaa, “Artemi wa Efeso ni nniini.”

35Kyeeri karaa ni wa muri alemaa imalalyisa vandu, kavavia, “Yeni vomi va Efeso, ni vi yeto nalaishi sheelyi muri wa Efeso ni nringyi wa mmba yeerasya ya Artemi, yeto ang'ani, na wa kindo kilya kiwoye kyuuka iruveeu?”

36Naasany kimmba mbony yei ilavaa imina, kyimukooye mumalalye, mulatani kindo kya kara kara-fo. 37Mashika mmbo mweende vandu yeva, mmbaleiva findo fya mmba ya iruva lyeru nta yaarara iruva lyeru lya lyikaa-fo. 38Kyasiany, kwakooya Demetrio na vaarya yewo (vetana fesa) vakee nawe vatiri irero na nndu, ando kwa yaanduya kwiiyo, na verumbuya vandu veefo, kyasia vanderingyanafo. 39Kwakooya ni mbony ya kindo kingyi kyoose, mmbo fisongosyoo ikwaanuny lya usumanu. 40Mashika lyo mmbo lukee nrengeny yeendekumbwa kimaruma kya iraanga yelyi lya inu, nalyo nta llyetiri kimaruma-fo; na shaasa kikai nshidimaa ikuuta mwaandu yeu-fo. 41Elyi amaa irera indo fafinga ikwaanu llya.

Currently Selected:

Mashora 19: MASNT00

Highlight

Copy