Marko 9
9
1Giri báy, “Án a kah, baraá tla/ángw mukwihe múk gwa'ara ga araaká i deer, ay dír ki ari gídaabá waawuti'iimár Mungú naa hardát ar /uuru.”
Slaqsoó Yesu aa warqáy
(Mt 17:1-13; Lk 9:28-36)
2Tam alaá deelór lahhoó' iwa waaráhh, Yesu ginara tláy Petro nee Yakobo nee Yohana, girira tláy ay gawaá tloomár tleer inooín kilooín. Slaqsaywós iri warqáy dír ilaaín wa ale. 3Tlabaawós nay /awakukuyé' ló'wa ale, niri miririi/iyé' adoodá' hee baraá yaamuuwo ngir aleeslayká /awakeesaro timngi hhuúnts. 4Eliya nee Musa niri didaádá' wa ti'iitiyé', naxés ta axwees nee Yesu. 5Petro Yesu guri báy, “Intsaahhatusúmo, atén a diirí diriiaán, ka hhoóeéke isleeraá tám bira tleehhaán, oo wák a kók, kuquú Musa, kuquú Eliya.” 6Asma sleémeero niwa da'ayuutiyé', tam Petro iwa axweesi gár i kaahi ga xuuiiká.
7Naxés hunki nina ti'ít, giri geehhantés. Afoo nay baraá hunkidá' wa ilawáts i kat, “Kwí a Garmaaeé', sla'aarusmooeé', inós iiár i qaasaak.” 8Nee hamtidár kilae tawa qaytsiít, naxés heé dir'ín i dirií' i kaahh, aqo har Yesu kilós.
9Niwa gawaá tloomár wa awditiya' gina báy, “Tidá' taa aandé' ma heé i ooara' ay dír Garmoó Hee ni baraá /aantár wa waaslee/i.”
10Tidá' ngaa báy kari gawaá sager'ín i óh tiwa kilooín yaahamisiya', ta kaahi, “Gídaabárós a milá tiqá' iwa kaahi, ‘Garmoó Hee ni baraá /aantár wa waaslee/?’” 11Kuri yaahaás ta kaahi, “Ahaá baré intsaahhatuusér hara'ayár Musa ta kaahi, ‘Eliya ni ala geerí hardah?’”
12Giri báy, “A ló' gídaabá Eliya ni ala geerí hardah, nee mura' sleémeero nguwa /abeemaá i ki/isi. Ala tam adoorihe, adór taa gooín a adoomá gawaá daanduú Garmoó Heewo gídaabá, slahhe'eemisuú yaariír gu sláy nee kuwa waaqaqai? 13Án a kah, Eliya naa qaro hardáh, inooín adoodá' ta slai sleémeero kari inós i tleéhh, adoodá' Gooi i kat.”
Hungu/usár garmoó neetlaamér koóm
(Mt 17:14-21; Lk 9:37-43a)
14Tawa dír eeharuusér i hardáh, taxés ti tlaampamisiyá' ar axweesani nee intsaahhatuusér hara'ayár Musa, boo/oó yaariír oo muu inooín gaa harweér. 15Boo/aay sleémeero nguwa ár, tari waa/oó/ tari amoorós i ta'aín sleémeero, kuri taaqweés. 16Giri yaahaás, “Gár tiwa tlaampa'amisa' nee inooín a umós?”
17Heeko wák baraá boo/aydane Yesu guri i ilawaáts iri oó', “Intsaahhatusúmo, garmaaeé' ngwa dirók i huúw, neetlaame gwa afa qwaarés. 18Nee umuúqo neetlaame burngwa eér, gun yaamúr sláhh, slooro nay afkós wa ti'ít, nee i sihhinaá qirirtliimiis, nee inós sleeme i kaahakah. Eeharuuseerók ana ádbáw as neetlaameedá' ngiwa hinges, ala kaa aslayká.”
19Giri báy, “Kuungá' múk de'emaaká' oo haratlintaao wásl, án nee kuungá' ta al hotaatimaan ay xaylá? Nee nu hubaabiim ay xaylá? Garmaasíng amor'eé' huware'.” 20Kuri dirós i huúw.
Neetlaameedá' Yesu nguwa aán, garma guri /araamís guri yaamí dáhh, iri gwangwara'amiít yaamuú wa ale, slooro i gawaá afkós wa ti'imít. 21Yesu baabuú garmaadá' guri yaahaás, “Gaarí ngwa eér a iimír xaylá?”
Iri oó', “Iimír tawa na/aay. 22Nee daqtá yaarire gu dararáhh baraá asla, nee baraá ma'aay, as ngwa gaasár wa sla'. Adór ta aleesleer bir deer, ti gurtleer nee ti alee/is.”
23Yesu guri báy, “Mas kat, Bar aleesleér! Umuúqo gaaro i ya/aán dír kudá' haratlintaaór kooma.”
24Baabuú garmaadá' iri gáwtí tseé' iri oó', “Aga haratlintií', alee/isáng asma haratlintaaor'eé' ka niina.”
25Yesu ngiwa ár gídaabá boo/oó muu aa tlaáhh didae, neetlaameedá' gari iigahhaát gari báy, “Neetlaamér afa wasli nar iia wasli, án a kah, quutlé' dír heewihe, slám mu baloó i ki/ara'.”
26Neetlaameedá' iri /á/, guri ak pungahhamuú úr ar eér, iri qútl, inós naxés a ád heé aa gwaa' daxta. Múk yaariír tariqo oó', “Aa gwaá'.” 27Ala Yesu guri dawa óh guri tleés, iri sihhiít.
28Iwa baraá doó i dáh, eeharuuseerós guri yaahás qoomár nee inós tawa kilooín, “Ahaá, atén neetlaameedá' hingeesaro masa aleeslawaniiká?”
29Giri báy, “Neetlaamér adoorí taworo quutlma gi ya/aandaaká, gár ga aleeslaw a har /uuruú firo#9:29 Firo Baraá gooír Grikiro bahh'alé gár taa gooín a “firo nee gwawito.”.”
Yesu gwa'araarós ngaa geerí oó' malé ale
(Mt 17:22-23; Lk 9:43b-45)
30Tari tláy, Galilaya kanara waaraáhh, nee inós gaa slaiiká amór ta kay hee ngiwa xui, 31asma inós i eeharuuseerós intsaahhatimis. Gana báy, “Garmoó Hee ku qaas gawaá dabaá múk xoordaá hatlá', inooín kway gaas. Bar gaasaro kwa hhe'eés, deelór tám bira waaráhh i waaslee/.”
32Eeharuuseerós intsaahhastí gaa tsahhiká, ala kuri da'ayuút yaahasto.
Heé ak úr a heemá?
(Mt 18:1-5; Lk 9:46-48)
33Tari hardáh Kapernaumu. Tawa baraá doó i dáh, giri yaahaás, “Gadaádá' a milá ta kaangaanusa' baraá loohiro?”
34Tari xasliít, asma tawa hi'iiti gár ta kaangaanuusi a gídaabá, heé úr a heemá dir'ine. 35Iri yaamí iwiít, kudá' mibá nee tsár giri ateét giri báy, “Heé dirhunge uroó slaá', gár kuwa hariím tin niinawees muu sleémeero ba/a, nee muu sleémeero nguwa sagadiyuusi.” 36Na/oó niiná guri dír tla/angw'ín i huúw, guri slaqwtós i óh, giri báy, 37“Hee bar na/oó wák oo adór kwí gwa ilaóh ar umuueé', aníng iga ilaóh. Nee hee bar aníng iga ilaóh, a gídaabaheeká án kilooeé' ina ilaóh, nee kudá' aníng iga ya/aaw guna ilaóh sleeme.”
Heé nee atén ti tlaampa'amisa'aaká i gayuurén
(Lk 9:49-50)
38Yohana iri Yesú i ilawaáts, “Intsaahhatusúmo, heé neetlaamér hingeemiís ar /uuruú umuuwók una araán. Kuri iigahhataán asma inós nee atén ti koomanaaká.”
39Yesu giri báy, “Mu iigahhamitara', asma hee oo muruú xuawásl gu tleéhh ar umuueé' i kaahh, aluuwo iwa malé muruú tlákw daanduueén i axweesi. 40Asma heé atén ti tlaampa'amiisaaká i gayuurén i dirii'. 41Án a kah, umuúqo heewo oo kuungá' na wahaas ar ma'aay asma tawa múk Kristo, xuaak, hariímarós ga sláy.”
Paslimisuú lohaá ganaa'á'
(Mt 18:6-9; Lk 17:1-2)
42“Heé na/oó wák gwa paslis baraá loohír ganaa'a baraá na/'iiká' ninakwe, kuká' án iga haratlinti'ii'i, a tsiní inose tlaa/ár xoosliingw kawa gawaá istós i tseegi, kway kwaahh baraá tlawi. 43Dakók bar kuúng u paslimis baraá loohír ganaa'a, tsateek. A tsiní slafiingw kuwa sleer dakók tawa wak, ta tawa baraá asltá baloó gwaa'aaká keer ar dabaá tsár. [ 44Baraadaádane naanaga#9:44 Naanaga Gídaabá /itseemi. i qatlká, asla sleeme i gwa'aká baloó ale.] 45Yaaeerók bar kuúng u paslimís baraá loohír ganaa'a, tsateek. A tsiní slafiingw kuwa sleer yaaeerók tawa wak, ta tuwa kwahhi baraá asltí alé tawa ya'aawók koon tsaraawo. [ 46Baraadaádane naanaga i qatlká, asla sleeme i gwa'aká baloó ale.] 47Iltók bar kuúng u paslimís baraá loohír ganaa'a, tu/eek ka kwáhh. A tsiní tawa dat baraá waawuti'iimár Mungú tawa heé ila wák, ta tuwa kwahhi baraá asltí alé tawa ilaawók koon tsaraawo. 48Baraadaádane naanaga i qatlká, asla sleeme i gwa'aká baloó ale.
49“Asma umuú heewo ku asltí qaas hariímár diwtá wa ale.
50“Diwi ka hhoo'. Ala diwi bar maamahhaywós aa faák, a sangw diwtooká. Gár ki qasa' a milá maamahhaywós iwa ki/i.
“Adór diwi tleehhité' kuungá' baraá munerhunge, kuungá' kiloohúng ta waydúr hotá'.”
Currently Selected:
Marko 9: IQWNT
Highlight
Share
Copy
Want to have your highlights saved across all your devices? Sign up or sign in
Iraqw New Testament © Bible Society of Tanzania, 1977.
