Marko 6

Yesu kuwa Nasaretír wa sií'

(Mt 13:53-58; Lk 4:16-30)

1Yesu nina tláy amoodá' wa ale iri kií/ ayaaín, nee eeharuuseerós ti koná'. 2Bál deelór hungu/umaawo múk yaariír guna intsaahhatimís baraá doó saalíngw wa ale. Inooín intsaahhatimisuuwós kuri waa/oo/amór wa ár, tari oó', “Kwí amór tí sleémeero ngiwa sláy a amá? Sagalooarí taa heewí haniís a sagalooár adoomá? Nee muruú xuawásl kwí i tlehhiiti a milá? 3Kwí a kudá' oo maraá tlehhahhitakáhe? Aayoorós a Mariamu, hhaeewós a Yakobo nee Yose nee Yuda nee Simoni. Hhaeewós awa dasu a kudá' ayaarén i diriiá'áke?” Kuri insareéhh.

4Yesu giri báy, “Aarusmo dír kuwa ilaiwawa/iiká i káhh, aqo har dír ayaawós nee dír mar'eefoowós nee dír múk dooín.”

5Ala inós gár aa tleéhh iri káhh baraá muruú xuawaslene baraá ayaadaádae, aqo har tiqtuusér niina gana dabáy qaás, gari hungu/uús. 6Inós iri ló'wa waa/oó/ as haratlintaaor'ín wasle.

Eeharuuseedá' mibá nee tsár kawa ya/aáw

(Mt 10:5-15; Lk 9:1-6)

Yesu iri baraá inslaawaydá' wa hi'iimiít iwa intsaahhatimisi. 7Eeharuuseedá' mibá nee tsár gari ateét gari iimu/ún ya/abitooro tiwa tsár wa koomakona', gari /uuruú i haniís oo neetlaame hingeemis. 8Giri hara'ayín gídaabá, “Bar aa'aá keerá' gaa ma huuwara', aqo har hhara kilós. Muruú /ayma mu huuwara', tam tlakwaay, tam peésár baraá tlin'i. 9Ya/ata' dahaasaak, inqwar mu tsadér wa huuwara'.” 10Giri báy, “Umuúqo diiro bara hardaté', dír doó wák wa hootaak ay dír deelorhúng i fak didae. 11Dír kuungá' tunduwa ilaohiiká, nee axweesantahúng kawa slaiká axaasaro, quutlé', didá' geexawaak, teeri ka alí kukuá', adór gurbua dir'ine.”

12Tari tláy Ya/abtór hho' ar Mungú kawa alki/iiti gídaabá muu iwa hhu'u'un. 13Neetlaamér yaariir kari hingeemiís, tiqtuusér yaariir kari sliík di/itár alé, kari hungu/uumiís.

Gwa'arár Yohanudá' Baatimaamiís

(Mt 14:1-12; Lk 9:7-9)

14Waawutmo Herode iidíguuwí guna axaás, asma iidíguú Yesu umuúqo diiro kwaa axaás. Muu i kaahi, “Yohanudá' Baatimaamiís naa waasleé/, gawaá adoorihe /uuruuwí in baraawós wa gadiyuus.”

15Bahh'alé ta kaahi, “A Eliya.”

Bahh'alé ta kaahi, “Kwí a aarusmo adór aaruuseedár bál geera.”

16Ala Herode tí ngiwa axaás iri oó', “Heesíng a Yohana kudá' naa saga tsaát nina waasleé/.” 17Asma Herode inós muu guna ya/aáw, Yohana kuri óh, kuri tseék. Gár adoorí ngisa tleéhh a as Herodia, harér Filipo hhiyoó Herode, tidá' Herode aa duúx. 18Asma Yohana Herode guna báy, “Adoosíng i gan'aaká ar harér hhiyaawók kawa dux.”

19Herodia loohi gana leelehhít ar Yohana ngur gas, ala gaa sleeriiká. 20Asma Herode Yohana gu da'ayumiit, asma ga xuu' gídaabá a heé gan'amká koóm, oo hhoohhoó' dír Munguhe. Inós guna amohhe'eemiís asma mukuwa gaás. Axweesantá Yohana gana axamiís ar qwal/amaaye, ala axweesantadaádá' inós guri sakwasleemút.

21Herodia deelór pa/aangw nguwa sleér, an deeloodá' ur ar xwaylár Herode kawa inslaslay. Baldae Herode múk yaariír guna dír do'ós i dahi'ís, waawituú baraá gixsadár ayaawós nee múk urén oo askaári, nee múk urén oo yaamaá Galilaya. 22Dasír Herodia niri hardát iri nét, Herode guri qwala/ás, nee mukdá' didí dirií' sleeme. Waawutmo Herode dasiidá' gari báy, “Án firiimáng umuúqo gár ta sla'a, án ngi haniís.” 23Lo'o gari huúw iri oó', “Umuúqo gár ta sla'a ngi haniís, tam waawuti'iimar'eé' qasisaro a ya/aám.”

24Dasi iri tleér ay amór aayir'ín, gari yaahás gídaabá, “Gár ni firiim a milá?”

Aayo gari beér, “Ságw Yohanudá' Baatimaamiís na firiimeek.”

25Hamtidár kilá' dasi nina kí/ ar gaanslaay ay dír waawutmo, guri firiín gídaabá, “Gár ni slaa' a ságw Yohanudá' Baatimaamiís hamír kilá' baraá xooslmoó i qaasang.”

26Waawutmo iri gurhaamuút ló'wa ale. Ala si'ima gaa aslayká as lo'odá' aa huúw, nee as mukdá' didá' wa /ayiím. 27Hamtidár kilae waawutmo askaarmo guri ya/aáw ságw Yohana kuwa leehhi. Askaarmo iri tláy baraá doó tseegamo. Yohana guri saga tsaát, 28sagós nguri huúw ar baraá xooslmo, guri dír dasiidí haniís. Dasi guri dír aayir'ín i hanís. 29Eeharuusér Yohana iidíguuwí nguwa axás tari tláy, slaqwtá Yohana kari leéhh, kari foól.

/Aymisír múk kumér kooán

(Mt 14:13-21; Lk 9:10-17; Yn 6:1-14)

30Yesu ya/abuuseerós guri i burumburít, tidá' sleémeero ar naa tleehhiyé', nee tidá' taa intsaahhatimís kari dirós i alki/iít. 31Giri báy, “Qwalaasé' kuungá' kiloohúng amór muu iwa kahhi. Hungu/usé' gár niinawe.” Asma múk yaariír i hardarah nee kuqá' i tlatláy, inooín pa/ángw tar /ayin sleeme iri qwaár. 32Tari tláy gawaá miringamo inooín kilooín amoodá' muu iwa kahhi.

33Tawa tláy, múk yaariír giri tsaáhh, tari amoodí tláy ar gaanslaay ar ya'a' baraá gixsadu sleémeero, tari giirín hardahamuuwo. 34Inós iwa gawaá miringamoó wa aweér, múk yaariír guri ár, guri gurtláy, asma ngiwa ár a adór bee/ángw de'eamusmoó koomaaká. Muruú yaariír guri intsaahhatimís dir'ín i alé. 35Looa iwa niinawuúr eeharuuseerós guri i daqeér guri beér, “Yaamuukaáká' a darmuú tawo. Hám daxta looa aa dát, 36mukwí geemaweek i tlay, ta áykwí ki/i, nee baraá gixsadu, asma ta /aymár ay.”

37Yesu giri báy, “Muruú /aymár i haniisaak kuungá'.”

Kuri báy, “Muruú /aymár shilíngi tsiire tsár un tlaxór awána kway haniisaán kuwa /ayi?”

38Giri yaahaás, “Kuungá' mikaáte ka koonda' a magá'? Tlawsé' araak.”

Arto kawa hhe'eés tari oó', “Mikaáte kooán nee siyoó tsár.”

39Giri báy, “Muu iwitisaagáy gawaá gitsór naa/, múk niiná dirqá', kuqá' dirqá'.” 40Tari iwiít ar daqooraay, diirí mibeeri kooán, tiqá' tsiiru. 41Mikaáteedá' kooán nee siyoódá' tsár giri óh, iri gawaá doorí qaytsiít iri sluufiís, mikaáteedá' gari qasmiís dír eeharuuseerós i alé kawa múk i hanmiisi. Nee siyoódá' tsár guri qasmiís dír muu sleémeero. 42Muu sleémeero iri /ayín tay aáx. 43Eeharuuse katatoó mibá nee tsár guri dalá/ parhheemaá naa meeti'i dír mikaátér wa ale nee siyó. 44Múk aa /ayin sleémeero a kume kooán, hhawaate kilooín.

Yesu i gawaá tlawtá wa hi'iimiit ar ya'a'

(Mt 14:22-33; Yn 6:15-21)

45Eeharuuseerós gari báy, “Tsa/amé' gawaá miringamoó i alé, geerí hi'iité' ay gayuú Betsaida.” Qoomaadae inós i deelór kah dír boo/ayduú múk i alé. 46Deelo ooaro ngiwa hhe'eés, iri firór áy gawaá tlooma. 47Tsiindo niwa xayé', miringamo i baraá tla/ángw tlawi. Yesu a kilós amór yaamaá kaahare. 48Eeharuuseerós gari ár i baraá tlawtá wa daawimít, asma miringamo gan'aasa ga ya/a/anká asma fur'a gu ila/aán. Qoomár ságwlooa tleemu iwa xeér, inós i gawaá ma'áy wa hi'iimiit, i amor'ín káy. Qoomár iwa lak waaraahhi, 49kuwa ár i hi'iimiit gawaá ma'áy wa ale, inooine a hhantamo. Tari uú'. 50Asma inooín sleémeero inós kuwa ár, tari amoqwaár.

Inós giri báy, “Ma amoqwaqwadiimara', hee a aníng. Dae mawaak.” 51Iri gawaá miringamooín kudí tsa/án, fur'a iri xaslít. Tari waa/oó/ baraá muner'ín i alé, 52asma kaa tsaahhiiká gídaabár mikaáteedá' a umós, asma muner'ín adoodá' gaa ya/aandiiká.

Tiqtusmoó Yesu aa hungu/uús Genesaretír wa ale

(Mt 14:34-36)

53Tlawi kingiwa faák tari hardáh yaamaá Genesareti, miringamo kuri tseék. 54Inooín tindiwa aweér gawaá miringamoó wa ale. Yesu kuri tsaáhh nee muu. 55Tari haratláy sleémeero, yaamuudá' kiri harweér, tiqtuuse kari huwahuúw umuúqo dír kwi axaasi. 56Nee umuúqo dír aa kay baraá gixsaduuwo nee tla/ángw ayko tiqtuuse kana dinkwár i qaás. Kuri harhheehhe'eemiís kuwa kwatiiti tam pasltá inqwaarirós. Nee kudá' sleémeero ngwa kwatimiitiye' tari hungaaguú/.

Currently Selected:

Marko 6: IQWNT

Highlight

Copy