Matayo 5
5
Yesu aa iwiít gawaá tlooma
1Yesu boo/oó muu nguwa ár, iri tsa/án gawaá tlooma, iwtanaango iwa hhe'eés eeharuuseerós guri i daqeér. 2Giri iimu/ún intsaahhasto, iri oó',
Múk amohhoó'
(Lk 6:20-23)
3“Múk amohhoó' a kudá' narkuú qeeruuín tsatsahhaamá',
asma waawuti'iimár doori a tooín.
4Múk amohhoó' a kudá' gurhaamuút,
asma inooín gurkwa/asa ngi slayá'.
5Múk amohhoó' a kudá' tsaén,
asma inooín yaamu ki aal.
6Múk amohhoó' a kudá' gan'amuú ak leelehhiít ta muruú hatlae,
asma inooín gan'amu ngu slayá'.
7Múk amohhoó' a kudá' gurtleemuú koóm,
asma inooín Mungú gi gurtláy.
8Múk amohhoó' a kudá' mune hhohhó',
asma inooín Mungú ngu ariyá'.
9Múk amohhoó' a kudá' wayduú tlehhiít,
asma inooín ki na/'aá Mungú báy.
10Múk amohhoó' a kudá' ta slahhe'eemisi as gan'amu,
asma waawuti'iimár doori a tooín.
11“Kuungaásingá' an múk amohhoó', burtundu niqimiis, nee burtundu gusiisín, nee burtundu tli/imis ar /ayseeno asma aníng. 12Qwalaala/é' nee baraa/é', asma slaqwerhúng ka ur gawaá dooriiwo. Asma adoosíng an adór aaruuseedár aáng kaa /imiís.”
Diwi nee gwa/ateema
(Mk 9:50; Lk 14:34-35)
13“Kuungá' a diwi nee gwa/ateemaá yaamu. Ala diwi bira hhitarút, gár ki qaasi a milá iwa maamahh? I sangw gaa bu'uká, aqo kan kwaahh tsee/áy alé, kari adarah nee muu.
14“Kuungá' a gwa/ateemaá múk baraaká' yaamu. Gixsár gawaá tloomár i dirii', ti lu/uká. 15Muu bar tsaa'asi ngaa daá/, ga tuntuukiiká ar lakwaanti, ala gan qaas didá' kawa geehhoó', asma múk baraá doó i dirií' sleémeero nguwa i gwa/at. 16Gawaá adoorihe gwa/atamaayerhúng i gwa/at dír geerá muko, as tlehhemi'iihúng awa hhohho' kiwa ari, nee Baabuúhúng kuduú gawaá doorí dirií' kuwa xirfayeesi.”
Intsaahhatimisuú Yesu daanduú hara'aya
17“Ma kaahaara' gídaabá, án nina hardáh as hara'ayár Musa nee gooír aaruuse ngina warqeesár áw. Aasla'áy, án naa hardahiiká ngiwa warqees, ala nina hardáh as ngiwa boo/ees. 18Án a kah, ay dír doori nee yaamu i waarahhiya', ala tam gár wák ar niiná laqaá tam gár niiná ar tí ba/a baraá gooír aaruuseero i baloó waarahhká ay dír sleémeero kay boo/eesi. 19Gawaá adoorihe, hee bar hara'ayár wák gaa geeqáy tam hara'ayaadá' niina, nee muu guri adoodár intsaahhatimís, inós a heé niiná ló'wa ale baraá waawuti'iimár dooriiwo. Ala heé hara'ayaarí gaa boo/ees, nee muu guri adoodár intsaahhatimis, inós a heé úr ló'wa ale baraá waawuti'iimár dooriiwo. 20Án a kah, slafingwhúng barnaxes ku hhohhoeeká ta slafíngw intsaahhatuusér hara'ayár Musawo nee múk Farisayo, kuungá' a baloó data'aaká baraá waawuti'iimár dooriiwo.”
Intsaahhatimisuú Yesu daanduú buhhta
21“Kuungá' aga axasé' bariisér bál geera adór kara báy, ‘Hee mu gaasaar. Hee bar hee ngwa gaás, gár kuwa hariím a sakwasleema.’ 22Ala án kuungá' nu baw, ‘Umuúqo heewo oo hhiyaawós gwa i buuhh, gár kuwa hariím aqo sakwasleema.’ Umuúqo heewo oo hhiyaawós gu babáw, ‘Kuúng a gan'aká,’ gár kuwa hariím kun sakwasleemuut baraá doó sakwasleemár wa ale. Nee umuúqo heewo oo hhiyaawós gu babáw, ‘Kuúng a daktani’, gár kuwa hariím aqo in dah baraá asltá baloó gwaa'aaká. 23Ala barnaxes kuúng ilahhooarók ngaa húp geerá meésár Aako, didaádae naxés aga insleér gídaabá hhiyaawók i /aymuú kón daanduuwoge, 24ilahhooarók ala geexaweek dír geerá meésár Aakoó i alé, daqaní ta daqeér dír hhiyaawók, tiwa ala axweesani axasa', daqaní ta ki/, ilahhooarók ka hanís.
25“Nee sakwasleemusmoowók ti axweesani axase' ar gaanslaay, qoomár tawa dinkwár i dir'a' baraá loohiro, sakwasleemusmoowók inós kuúng muwa huúw amór doó sakwasleema, doó sakwasleemaro kuúng turi malé haniís dír askaarmoó i alé, inós kuúng uri dahaas baraá doó tseegamo. 26Ar ló' án a kah, a baloó ti'itaká baraadae ay dír heelmooduú alhhe'eesaay kway bu'.”
Intsaahhatimisuú Yesu daanduú fuqi
27“Aga axasé' adór taa káh gídaabá, ‘Fuqi ma awaar’. 28Ala án a kah, umuúqo heewo oo /ameeni gaa alqaytsiit ar ilatleeri aa fuquús nee /ameenidá' baraá muunaáwose. 29Nee iltók ar doó /iyáy bar kuúng u paslimís baraá loohír ganaa'a, tu/eek, ka kwáhh amór saáw i alé. A tsiní dír wák ar slaqwtók iwa qwat, ta slaqwtók sleémeero kawa kwahhi baraá asltá baloó gwaa'aaká. 30Nee dakók oo doó /iyáy bar kuúng u paslimis baraá loohír ganaa'a, tsateek, ku kwáhh amór saáw i alé. Asma a tsiní dír wák ar slaqwtók iwa qwat, ta ak slaqwtók sleémeero kawa kwahhi baraá asltá baloó gwaa'aaká.”
Intsaahhatimisuú Yesu daanduú talaáka
(Mt 19:9; Mk 10:11-12; Lk 16:18)
31“Kaa oó' sleeme gídaabá, ‘Hee bar hareerós gaa guús, ngi talaákár i haniisi.’ 32Ala án a kah, hee bar hareerós gaa guús, as tlehhemuú fuqtooká, /ameenidá' aa fuqús as hhawaatuudá'. Nee heé /ameenidá' taa guús gaa duux, heedaádá' sleeme aa fuquús.”
Intsaahhatimisuú Yesu daanduú lo'o
33“Slám aga axasé' bariisér bál geera adór kara báy gídaabá, ‘Lo'o bara húp geerá Munguhe, al'axweesani kawa boo/es, al'axweesantadá' ma mawaar boo/eesaro.’ 34Ala án nu baw, lo'o ma baloó huwaara', tam tawa kata', ‘Doori i slahhiye'’, asma doori a kitángw aleesleemuú Mungú. 35Laqaá lo'o ma huwaara' ar yaamu, tawa kata', ‘Balángw kurkí muwa /aáy’, asma yaamu a kitángw ya'aá Mungú. Laqaá lo'o ma huwaara' ar gixsár Yerusalemu, asma a gixsár Waawutmoó úr. 36Laqaá lo'o ma huwaar ar sagók, asma tam se'eemír wák kawa /awaakes laqaá kawa boo/es a aleesleeraaká. 37Ala axweesantahúng masók a ‘Ka hhoo',’ laqaá ‘Aasla'áy’. Axweesantá dír tihe aa waarahh, a tidá' amór Kudá' tlaákw daahh.”
Intsaahhatimisuú Yesu daanduú magoót
(Lk 6:29-30)
38“Aga axasé' adór kara káh gídaabá, ‘Hee bura ila gaás, kuúng inós ila gaaseek sleeme, nee hee bura sihhino kwaáhh, kuúng inós sihhino kwahheek sleeme.’ 39Ala án kuungá' nu baw, miti tlaampa'aamisaara' nee heé tlaákw. Heé tlaaqarmoowók oo doó /iyáy gwa slaahh, nee tlaaqarmoó tsár warqeeseek nguwa slaahhi sleeme. 40Nee heé kuúng ugwa sakwasleemuut nee shaátirók gari hayóh, inqwaarirók ti geexeer sleeme. 41Heé kuúng uga harakees kuwa haydoohis kilomeétár wake, haydoohiseek ay kilomeétár tsár. 42Heé kuúng u firiím mu /itaar, nee heé kuúng u kirkiít mu /itaar.”
Wakusmoowók slaeek
(Lk 6:27-28, 32-36)
43“Aga axasé' adór kara káh gídaabá, ‘Inslaawmoowók na slaeek nee wakusmoowók na aahheek.’ 44Ala án nu baw, wakuuserhúng sla'aak, nee kudaádá' kuungá' nu buhhtimiisá' aleefiriiriimaak, 45as kuungá' tawa na/'aá Baabuúhúng kuduú gawaá doori tleehhitá'. Asma inós tsee/amá gun gwa/atimis dír múk tlákw nee kudá' hhoe, slám tluwaay gun hanmiis dír kudá' gan'amuú koomá' nee dír kudá' gan'amuú kooma'aakahe. 46Asma kuungá' bira slaé' kudaádá' kuungá' nu sla'á', slaasláwár ta sleera' a umós? Tam mukduú ohomér ohiím adoosíng ga tlehhaahhítiíke? 47Slám kuungá' barnaxes hhaeehúng kilooín in laaw'eemisá', gár kuungá' taa tlehhé' a milá ta múk hatlae? Tam múk xoordaá hatlá' sleeme adoosíng ga tlehhaahhiítiíke? 48Gawaá adoorihe kuungá' masók a múk ganaá', adoodár Baabuúhúng kuduú gawaá doori ir ganaai.”
Currently Selected:
Matayo 5: IQWNT
Highlight
Share
Copy
Want to have your highlights saved across all your devices? Sign up or sign in
Iraqw New Testament © Bible Society of Tanzania, 1977.