Matayo 28

Waasle/uú Yesu

(Mk 16:1-10; Lk 24:1-12; Yn 20:1-10)

1Tam deelór hungu/uma iwa fák, matlatlér boo/ ar deelór geera ar wiiki, Mariamu Magdalene nee Mariamu tidár tsár tana /aantár qaytsuú áy. 2Nee kunseelír ur niri hardát. Asma malaykamoó Aako nina aweér gawaá doorí wa aleeró. Inós tlaa/adá' gari gwangwaraá' gawaá afkwá /aantaaro, iri gawaadí iwiít. 3Nee gitsee/aá malaykamoodá' a adór mankari, nee inqwaruuwós ku ló'wa /awák adór tlaa/aá tluwaay. 4Mukdá' /aantár xuúm tari da'ayuút, daaraxaay giri áy, tari adór múk aa qaatl.

5Malaykamoodá' gari báy, “Kuungá' ma da'ayumitaara'. Aníng a xuú' heé kuungá' ta leelehhita' a Yesu, kudá' taa kikií' gawaá msalaába. 6Diirihe i kaahh, asma aa qaroó waasleé/ adoodá' inós ngira oó'. Qwalaasé', dír kway qaatiís artá awaare'. 7Nee kuungá' tlawsé' ar gaanslaay, eeharuuseerós ka beera', ‘Aa waasleé/ baraá múk aa qaátl wa ale. Nee hamí inós aa geerí tláy Galilayár i alé. Amoodae u aandá'.’ Hám daxta naa ádbáw.”

8Tari tláy ar gaanslaay dír /aantár wa ale, ar dae nee qwal/ uú úr. Tari ta'aín, eeharuuse kari ádbeemuú áy.

9Naxés Yesu nee inooín tiri doogiyé', iri oó', “Laawaay.” Tari tseewúy dirós i alé, kuri ya'a' óh, kuri i tumbarara'aát. 10Yesu iri oó', “Ma da'ayumitaara'. Tlawsé', hhaee'eé' ádbawaak, i Galiláyár i tlaye', amoodaádae aníng i ariyá'.”

Alki/ituú askaáridá' aa xuun

11Qoomár /ameenadá' iwa tleér, askaáridá' /aantár xuum bahh'alé tari hardáh baraá gixsa. Muruuwí sleémeero aa tleehharuut kuri xu'utís dír geeraharuusér uren ar saalíngw múk Yahudi. 12Tari burumburiít dinkwa nee bariisee, tari al'axweés. Askaári kari peésár yaariír i haniís, 13kari báy, “Kuungá' ta oa' gídaabá, ‘Eeharuuseerós nina hardát xweeraawo, guri fís qoomár atén tawa guaán.’ 14Nee ala iidíguuwí ga/awusmo burngwa axaás, daqaní atén nee inós a axweesaán. Kuungá' ma da'ayumitaara' iidíguusíng wa ale.”

15Askaáridá' peésar'ín gari ót, adoodá' kaa báy gari tléhh. Gawaá adoorihe axweesanaydá' iri tsiyaayaaxaát dír múk Yahudiro tam ay laarí.

Ya/abtór kudá' mibá nee wak

(Mk 16:14-18; Lk 24:36-49; Yn 20:19-23; Tlehh 1:6-8)

16Nee eeharuuseedá' mibá nee wak tari tláy ay yaamaá Galilaya, ay dír tloomadá' Yesu aa dir'ín i hara'ayín. 17Inooín kuwa ár, kuri i tumbarara'aát. Ala bahh'alé baraaine nina xuruumitiyé'. 18Yesu iri tseewúy dir'ín i alé, giri báy, “Aleesleemu sleémeero oo gawaá doori nee oo baraá yaamu kunga aníng i haniís. 19Ala tlawsé', xoordu sleémeero eeharuuse tleehhaak, ki baatimisá' ar umuú Baabá nee oo Garma nee oo Qeeruú hhoohhoó', 20nee ki intsaahhatimisá' kawa oohi tidá' sleémeero naa kuungí hara'ayiím. Nee ga/aawaak, aníng nee kuungá' a dinkwa deelo sleémeero ay alhhe'eesoó yaamu.”

Currently Selected:

Matayo 28: IQWNT

Highlight

Copy