Matayo 21

Dahmuú baraá Yerusalemu

(Mk 11:1-11; Lk 19:28-40; Yn 12:12-19)

1Tari tseewúy Yerusalemú i alé, tari hardáh Betfage, dír tloomár xaaiikaari ta babay Miseituni. Yesu eeharuusér tsár gari ya/aáw, 2gari báy, “Tlawsé' ay amór gixsarqá' geeraahúng i dirii'. Bara hardaté' daqwaay uqo aandá', kwaa tseék, nee gwarendmoó daqwaay nee inós dinkwa. Gweerare', ngi hubá' amor'eé' alé. 3Bar hee naa /aymuú báy, ku beera', ‘Aako gan slaa'.’ Daqadá' inós ngi geemáy.”

4Tí sleémeero ina tleehharút as tidá' aarusmo aa oó' iwa bo/,

5“Múk gixsár Sayuni bawaak.

Waawutmoohúng naa hardáh dirhúng.

Inós ku tsá'. Aa tsa/án gawaá daqwaay,

gwarendmoó daqwaay.”

6Eeharuusér aáng iri tleér, adoodá' Yesu ngira hara'ayín kari tleéhh. 7Daqwaydá' nee gwarendmoó daqwaay kiri huúw, inqwaruuín kuri hhaáf gawaá daandeemaá daqwaayeedá', Yesu iri iwiít gawaadí alé. 8Múk yaariír baraá boo/aydae inqwaruuín guri hhafín baraá loohír i alé, bahh'alé haleemaá xaai ngiri tlaaqiyé', ngiri hhafiné' baraá loohi. 9Nee boo/aydá' geerá wa hi'iít, no alu, ta tseeamín ta kaahi,

“Hosana, Garmoó Daudi,

i xirfuuti kudá' hardáh ar umuú Aako,

i xirfuuti Mungú gawaá doori.”

10Qoomár iwa dáh baraá Yerusalemú i alé, muu sleémeero oo baraá gixsadá' i dirií' iri amooqwaqwadín, tari káh, “Heewí a heemá?”

11Boo/aydá' Yesu gwa eehaar iri oó', “Heewí a aarusmo, Yesu oo baraá Nasaretír Galilayár daáhh.”

Gusiisíngw múk baraá Doó Mungú wa weerimiís

(Mk 11:15-19; Lk 19:45-48; Yn 2:13-22)

12Yesu iri dáh baraá Doó Mungú, muu sleémeero guri gusiisín, kudá' muruú weerimiís nee kudá' muruú tlaxuúm baraá Doó Mungú wa ale. Meesadaá múk peésár gaamiís giri warqeemiís, nee kiteeraá múk hhookár weerimiís. 13Iri oó', “Kaa gooín, ‘Dooeé' ku bay a doó saaliingw.’ Ala hám daxta kuungá' ugwa mar'ír malguuse#21:13 Malguuse Gídaabá qwaatluuse. tlehhé'.”

14Yesu kuri i daqáy nee múk taampu nee oo taqooraay, qoomár iwa baraá Doó Mungú i dirii'i, giri hungu/uumiís. 15Ala geeraharuusér uren ar saalíngw múk Yahudi nee intsaahhatuusér hara'ayár Musa tari buúhh asma muruuduú waa/oo/amo oo Yesu aa tleéhh, nee asma na/'ii niwa tseeaminé' ar afór ur baraá Doó Mungú wa ale, iwa kaahiya', “Hosana, Garmoó Daudi i xirfuuti.” 16Yesu kuri báy, “Aga axási adór i kaahiya'?”

Yesu iri oó', “Eeít, aga axaás. Kuungá' aga soomusi'iikáhe gídaabá, ‘Kuúng xirfuuwók ugwa amohhe'és as kuwa boo/eesi ar afér na/'aá ninakw nar na/'aá du'uumá'.’”

17Yesu giri didí geexáy, iri ti'iít tsee/aá gixsár i aleeró ay Betania, iri amoodá' i deél.

/Aantsír taa lu'ús

(Mk 11:12-14, 20-24)

18Matlatleero looa niwa tleér, Yesu iwa baraá gixsár kay, ina qwariít. 19/Aantsírka wák ar afaá loohír i dirii' gari ár, gari i hardáh. Ala na/'aá /aantsí i kahhiyá', aqo har loo/o kilós. /Aantsídá' gari báy, “Iimír laarí na/'aá /aantsí mikiwa sláy gawaawoge baloó alé.” /Aantsídá' iri /óts siiwadár kilae.

20Eeharuuse adoodá' ngiwa aán, iri waa/ó/, iri ó', “Adoorí a milá, /aantsírí misa gaanslár /óts?”

21Yesu iri oó', “Án a kah, kuungá' bar haratlintaao a koondá', nee a xuruumita'aaká, ar ta tlehha' a tír /aantsí kiloseká. Tam tloomarí sleeme bara beeré', ‘Quútl, tláw ti kwahhtá eer baraá tlawi,’ adoorí i tleehharút. 22Slám umuúqo gár ta firiinda'a baraá firorhunge, bar aga haratlintié', a sleerá'.”

Múk aleesleemuú Yesu gu yaahamiís

(Mk 11:27-33; Lk 20:1-8)

23Yesu iri dáh baraá Doó Mungú. Geeraharuusér uren ar saalíngw múk Yahudi nee bariisér múk Yahudi Yesu guri i daqeér qoomár inós iwa intsaahhatimisi, tari oó', “Muruuwí aleesleemuú kur tlehhit a gaalá? Nee heé aleesleemuuwí ngwa kuúng i haniis a heemá?”

24Yesu giri báy, “Aníng sleeme gár wák ngi dirhúng i yaahaás, kuungá' nga oá'. Daqaní sleeme aníng ngi dirhúng i oó' aleesleemuú muruuwí ngur tlehhiit. 25Baatiísmoó Yohana amór naa daáhh a amá? A amór Mungúhe laqaá a amór muu?”

Tari kilooín axweés ta kaahi, “Bara ooaán, ‘Amór naa daáhh a amór Mungú,’ ti bay, ‘Ahaá ala, Yohana musa haratlinti'ii'iiká?’ 26Ala bara ooaán, ‘Amór muu,’ boo/aay u da'ayumiitaán. Asma muu sleémeero Yohana gwaa tsaáhh adór tar aarusmo.” 27Yesu kuri báy, “A xuanaaká.”

Yesu inooín giri báy, “Aníng sleeme aleesleemuú muruuwí ngur tlehhiit ngu dirhúng i ooaaká.”

Slaqsoó daaqoó tsár

28“Kuungá' ma katá' daanduú iidíguuwihe? Heeko wák daaqoó tsár gu kón. Garmoó úr guri i daqáy, guri báy, ‘Garmaaeé', tláw gadiyeét aweek laarí baraá qaymór misabiíbu.’ 29Garmaadá' iri oó', ‘Ka hhoo', aáko.’ Ala aa daqayká. 30Aakoodá' iri daqáy dír garmoó niiná, guri adoodá' báy sleeme. Ala garmoó niiná iri oó', ‘Án a daqawká.’ Aluuwo iri hhu'u'ún, iri daqáy. 31Xáy, baraá daaqaywí tsare heé sla'aarír baabuúín gaa tleehh a gaalá?”

Tari oó', “A kudá' niiná.” Yesu iri oó', “Án a kah, ohomuusér koódi nee tsaatuuse ta geeraahúng i waaraahh tawa dahi baraá waawuti'iimár Mungú. 32Asma Yohana nina dirhúng i hardáh ar loohír gan'amu, kuungá' kuri haratlinti'ii'iiká. Ohomuusér koódi nee tsaatuuse guri haratlintí'. Kuungá' adoodá' kawa aandé' tam sleeme aga hhu'u'uundi'iiká as kuwa haratlintia'.”

Slaqsoó qaymór misabiíbu ar taa saayín

(Mk 12:1-12; Lk 20:9-19)

33“Slaqsoó hatlá' iiár i qaasaak. Heeko i deer oo do'ós koóm. Nee inós misabiíbu guna dahaás baraá qaymoorós. Qaymo gari yaáw. Bohoongw guri foól baraá tla/ángw qaymo, oo ma'aá na/'aá xaaiidá' ngiwa tsoo/iti. /Aampár xuuma gari tleéhh. Qaymo gari saayín dír doosluuse, iri aa'aá káy. 34Qoomár bu'uungw iwa naká/, sagadiyuuseerós gari ya/aáw amór doosluuseedá', as bu'uungós kuwa leehhi. 35Doosluuseedá' sagadiyuuseedá' gari ohiín, oo wák kuri muúx, oo hatlá' kuri gaás, nee kuqá' kuri tlaquút ar tlaa/e. 36Sagadiyuusér hatlá' gari malé ya/aáw ar yaariir tam tidá' geera ba/a. Kari malé adoodá' laáq. 37Alhhe'eesaywo garmaawós guri amor'ín i ya/aáw, iri oó', ‘Garmaaeé' ku ilaiwaa/.’ 38Ala doosluuseedá' garmaadá' nguwa aán, inooín kilooín tari axweés tari oó', ‘Kwí a aalusmoowós. Un gaasaán, as daqaní aali tawa toorén.’ 39Kuri óh, kuri tsee/áy kwaáhh baraá qaymór misabiíbuwo, kuri gaás.

40“Xáy, aakoó qaymo loó' birna hardáh, doosluuseedá' adór ngi laqi a adoomá?”

41Tari oó', “Mukdá' tlákw gu ló'wa qwaarees. Nee qaymór misabiíbu gari doosluusér hatlá' i saayín, doosluusér bu'uungós gu haniis ar qoomár hariim.”

42Yesu giri báy, “Aga soomusi'iikáhe baraá Gooiro, gídaabá,

‘Tlaa/adá' qwatsiiruuse aa sí',

aa tlaa/ár ur tleehhít ar do' ira gawdúy.

/Aymuuwí amór i dahhi a amór Aako.

Nee slám a waa/oo/amoóro dír ilaarene?’

43“Gawaá adoorihe án kuungá' nu baw, ‘Waawuti'iimár Mungú ka hingees dirhunge, nee kari haniis dír múk xoorór hatlá' oo tlehhema'aá waawuti'iimadá' wa hariím gi tlehhiít.’ [ 44Umuúqo heewo oo gawaá tlaa/arí huú', aqo in qeqetaatín, nee slám umuúqo heewo oo tlaa/arí i i hu', aqo gun naasuúr.]”

45Geeraharuusér uren ar saalíngw múk Yahudi nee múk Farisayo slaqsi'iiwós kiwa axaás, kari tsaáhh gídaabá a inooín gin kah. 46Gawaá adoorihe Yesu kuna loohi leelehhiít ar kuwa oohi, ala boo/oó muu kuri da'ayuút, asma Yesu kwaa tsaáhh nee muu adór tar aarusmo.

Currently Selected:

Matayo 21: IQWNT

Highlight

Copy