Matayo 13

Slaqsoó dahaasusmo

(Mk 4:1-9; Lk 8:4-8)

1Baalaadae Yesu ina dír doó wa tláy, iri iwiít afaá tlawi. 2Boo/oó yaariír oo muu guri i burumburiít, tam Yesu iri gawaá miringamoó i tsa/án, iri iwiít gawaadí alé. Boo/ayduú muu sleémeero iri afaá tlawtí sihhiít. 3Yesu muruú yaariír guri dir'ín i axweés ar slaqsi'i, iri káh,

“Dahaasusmo ina tláy iri dahaasíngw áy. 4Nee qoomár iwa dahaasin, dahaasiingw bahh'alé ina paáhh afaá loohi. Tsir/o niri hardát, dahaasingwdá' guri /ák. 5Dahaasíngw hatlá' ina paáhh gawaá tla/u, didaádár hhapér yaariir iwa kahh. Nari ti'iít ar gaanslaay, as hhapér bu'uut iwa kahh gawaá daanduú tla/uudae. 6Nee tam tsee/amá iwa gwa/aát iri káh, asma dír dee/ár nguy sihhi i káhh. 7Dahaasíngw hatlá' ina paáhh baraá laqaya', laqayaadá' niri uraarayé', dahaasingwdá' kuri tliíq. 8Nee dahaasíngw hatlá' iri paáhh dír hhapér hho', iri laqwaál, oo wák tsiiru, nee oo wák mibeeri lahhoó', nee oo hatlá' mibeeri tám.

9“Heé iiaá axamis gi koóm, i axaasi.”

Gár slaqsi'i kisar intsaahhatimisi

(Mk 4:10-12; Lk 8:9-10)

10Eeharuuse nari hardát, Yesu guri beér, “Asma milá, mas axwés nee inooín ar slaqsi'i?”

11Yesu giri i ilawaáts, giri báy, “Kuungá' xu'uti aga sleeré' ar lu/aaroó waawuti'iimár doori kuwa xue'. Ala inooín xu'uti kaa slayká. 12Asma umuúqo heewo oo gár koóm, ka dook. Slám kay tlahhaasa hhe'ees. Ala umuúqo heewo oo gár koomaaká, tam tidá' niina i kon ka hayoh. 13Gawaá adoorihe an gár nis axwees ar slaqsi'i nee inooín. Asma inooín barta xumiis, gár ta ara'ari i káhh, nee barta axamiis, gár ta axamiisi i káhh, slám gár ta tsatsahhan i káhh sleeme. 14Nee /aymuú aarusmo Isaya aa boó/ dir'ine, kudá' iwa káh,

‘Axaasaro a axasá', ala a tsahha'aaká.

Qaytsitaro a qaytsitá', ala a aanda'aaká.

15Asma munér mukwí ka gawden,

nee iiaawo i ak axamiisiaaká,

nee ilaaín kaa gumamaá',

as makawa ár ilaaine, matawa axaás iiaaine,

makawa tsaáhh ar muner'ín,

mindiwa warqayé', nee aníng miwa hungu/uús.’

16“Ala kuungá' a múk amohhoó', asma ilaahúng ngi ga/ayá', nee iiaahúng i axamiisiyá'. 17Án a kah, aaruusér yaariir nee gan'amuuse gana slá' arto tidá' kuungá' ta ga/eera', ala gaa aandiiká. Nee gari slá' axaasaro tidá' kuungá' ta axamisa', ala gaa axasiká.”

Gídaabár slaqsoó dahaasusmo

(Mk 4:13-20; Lk 8:11-15)

18“Ala kuungá' slaqsoó dahaasusmo iiár i qaasaak. 19Umuúqo heewo oo axweesantá waawuti'iima gaa axaas, nee gídaabárós birnga tsaahhiiká, kudá' tlaákw nin hardah, nee /aymuudá' taa dahaás baraá muunuú heé i alé guri hingees. Kwí an kudá' aa paahh afaá loohi. 20Nee kudá' aa paahh gawaá tla/u, an mukdá' axweesani gaa axaas, nee axweesantadá' kari ilaóh ar qwala/. 21Ala dee/árú ta kon i kaahh, nee deelór tawa hooti ka ureeká. Slahha'amu binda ti'iít as axweesantadá', laqaá gusiisiingw, axweesantadá' kari máy. 22Nee kudá' aa paahh baraá laqaya', an mukdá' axweesantadá' gaa axaas, ala daawitimér yaamu nee al/aymár daqaari'iima axweesantadá' gari tlíq, axweesantadá' iri laqwaliká. 23Nee kudá' aa paahh baraá hhapér hho', an mukdá' axweesantadá' gaa axaas, nee gídaabárós gari tsaáhh. Axweesantadá' iri laqwál baraá muner'ín i alé, oo wák tsiiru, nee kuqá' mibeeri lahhoó', nee oo hatlá' mibeeri tám.”

Sla/atá taa dahaás baraá qaymor angaáno

24Yesu gina slaqsoó hatlá' báy, iri oó', “Waawuti'iimár doori aa slaqamiimís nee heé dahaasíngw hhó' gwa dahaas baraá qaymoorós i alé. 25Qoomár xweeraawo tawa guú' sleémeero, wakusmooko wák nina hardáh, sla/a gari dahaás baraá tla/ángw angaáno, iri quútl. 26Qoomár angaáno iwa hapapaa'amiít nee iwa /uuntluumisi, sla/a sleeme iri geehhoouúr. 27Lawaalér heedaáduú qaymo loó' guri i daqeér, guri yaahás ar gidaabá, ‘Ahaá, baré kuúng dahaasíngw hhó' una dahás, ala sla/ataqá' i dáhh?’ 28Inós giri báy, ‘Wakusmooko wák adoosíng gana tleéhh.’ Inooín kuri yaahaás, ‘A slá'a sla/atadá' ngiwa burumburtá awaan?’ 29Inós iri oó', ‘Aasla'áy, mawaak, asma aluuwo dahaasingwdá' hhó' u sla/atá altu/uundá'. 30Mawaagáy sleémeero ay dír i uraaraya' nee dír qoomár bu'uungw ni xeer. Qoomár bu'uungo daqadá' aníng kaangw u oó' dír kudá' bu'uuma'a, sla/a ala tu/aak, daqada' ka dinkwár i tsegá', nee ka kwahhá' baraá asltí alé. Daqani angaano ku burumbudá' baraá meewér'eé' i alé.’”

Ilmoó haradaáli

(Mk 4:30-32; Lk 13:18-19)

31Yesu slaqsoó hatlá' guri dir'ín i káh, iri oó', “Waawuti'iimár doori a slaqás nee ilmoó xa'anooko ta bay haradaáli, oo hee aa dahaás baraá qaymoorós i alé. 32Nee ilmoodá' ku ló'wa niiná ta dahaasíngw hatlá' sleémeerowo. Ala binda ti'iít, ku ló'wa úr xaa'aá mamu#13:32 Mamu Gídaabá /aamú. sleémeero ba/a. Iri xa'aanoó úr tleehhiit. Tam tsir/o iri hardát, maray'ín#13:32 Maray'ín Gídaabá tsuureemooín. giri gawaá haleemiidí tlehhít.”

Slaqsoó gár mikaáte ir sluufaasluf

(Lk 13:20-21)

33Yesu slaqsoó hatlá' guri dir'ín i káh, iri oó', “Waawuti'iimár doori a slaqás nee gár mikaáte ir sluufaasluf, ar /ameeni aa qás baraá puuruú, oo har afi qoomár deebedaá tsár, tam puuruúdá' sleémeero iri sluúf.”

Yesu adór ira axweés ar slaqsi'i

(Mk 4:33-34)

34Tí sleémeero Yesu gana axweés dír boo/oó múk i aleeró ar slaqsaay. Umuúqo gár aa dir'ín i axweesi, gana axweés ar slaqsi'i, 35as /aymuuduú aarusmo Isaya aa oó' iwa boo/i, kudá' iwa káh,

“Aníng an axweés ar slaqsi'i,

an tseé' ar afór ur

tidaádá' taa luú/ iimír tlehhmuú yaamuú wa ale.”

Gídaabár slaqsoó sla/atá baraá angaáno

36Yesu boo/aay guri deelór i oó', iri dáh baraá doó i alé. Eeharuuseerós guri i daqeér, guri beér, “Slaqsaywú sla/atadá' baraá qaymo, gídaabárós atén i ooang.”

37Yesu iri oó', “Heedaádá' dahaasíngw hhó' gwa dahaas a Garmoó Hee. 38Qaymoodá' a yaamu. Dahaasingwdá' hhó' a mukdá' baraá waawuti'iimár Mungú i dirií'. Nee sla/atadár baraá qaymo a mukdá' tlákw. 39Wakusmoodá' aa dahaasi a Neetlaangw. Bu'uungw a alhhe'eesoó yaamu. Nee mukdá' bu'uúm a malayke. 40Ala adoodá' sla/a kar burumburin nee kari daa/ baraá asltí alé, an adoodá' bál deelór alhhe'eesoó yaamuuwo tleehharuut. 41Garmoó Hee malaykeerós ngi ya/aaw, nee malaykeedá' mukdá' sleémeero aa dukuutse tleehhiit nee mukdá' tlakweema gaa tleehh, guri burumbút guri hingés baraá waawuti'iimár Garmoó Heewo. 42Nee kuri kwaahh baraá asltá baloó gwaa'aaká. Nee didaádá' an dír /aa/ee nee sihhina' kiwa qirirtliimisi. 43Mukdá' gan'amuú koóm qoomaadae i gwa/aat adór tsee/amaá wa ale baraá waawuti'iimár Baabuúine. Heé iiaá axamis gi koóm, i axaasi.”

Slaqsoó peésár taa luú/

44“Slám waawuti'iimár doori a slaqás nee peésár taa foól baraá qaymorka. Nee hee ngiwa ár, gari luú/, iri tláy ar qwala/, nee muruuwós kudá' sleémeero i kon dír do' guri weerisár áy, nee qaymoodá' gari tlaáxw.”

Slaqsoó miisli

45“Slám waawuti'iimár doori a slaqás nee heé halaanu'uumár tlehhiít, oo miislír hhoohhoo' ga leelehhiít. 46Nee inós miislirka wák ngiwa ár, ar tlaxór ur, iri tláy, muruuwós kudá' i kon guri weeriís sleémeero, miislidá' gari tlaáxw.”

Slaqsoó baratsufaay

47“Slám waawuti'iimár doori a slaqás nee baratsufoó taa kwaáhh baraá tlawtí ale. Nee baratsufaydá' siyoó umuúqo daa'awi ngway ohín. 48Nee baratsufaydá' iwa haáts, kuri uuruúx afaá tlawi. Tari yaamí iwiít, siyoódá' kuri partliít baraá baratsufaydá' wa ale, kuri amohhe'eés. Ala siyoódá' tlákw kuri kwaáhh. 49Adoorí an adooda' tleehharuut bál deelór alhhe'eesoó yaamuuwo. Malayke nin hardát, nee giri partlít kudá' tlakw amór saáw i alé dír kudá' gan'amuú kooma'a. 50Nee kudá' tlakw kiri kwaahh baraá asltá baloó gwaa'aaká. Nee didaádá' an dír /aa/ee nee sihhina' kiwa qirirtliimisi.”

Slaqsoó daqaari'iimár /aben nee ar qaren

51Yesu giri yaahaás iri oó', “Tí sleémeero aga tsahhí'i?”

Tari oó', “Eeít.”

52Yesu giri báy, “Gawaá adoorihe umuúqo intsaahhatusmoó hara'ayár Musawo, oo sagalooá waawuti'iimár doori ga koóm, a slaqás nee heé do' loó', oo muruuwós kudá' /abén gu hanmiís, nee kudá' qarene.”

Yesu kuwa Nasaretír wa sií'

(Mk 6:1-6; Lk 4:16-30)

53Yesu slaqsi'iiká' axweesanto ngiwa hhe'eés, iri ti'iít iri tláy. 54Nee iwa amór ayaawós i hardáh, muu guri intsaahhatimís baraá doó saalingw'ín wa ale, tam mukdá' iri waa/oó/, tari káh, “Kwí sagalooarí dír ngiwa sláy a diimá, nee muruuwí oo xuawaslén oo i tlehhiiti. 55Kwí a garmoó heedá' maraá tlehhahhítaáke? Nee aayoorós a tidá' ta babáyke Mariamu? Hhaeewós awa daaqaay a Yakobo nee Yosefúwoóke, nee Simoni nee Yuda? 56Nee hhaeewós awa dasu i ayaarén i dirii'iíaáke? Ala kwí tí sleémeero amór ngiwa sláy a amá?” 57Yesu kuri insareéhh.

Yesu giri báy, “Aarusmo dír kuwa ilaiwawa/iiká i káhh, aqo har dír yaamuuwós nee dír do'ósuú kilá'.” 58Ala inós muruú xuawaslén oo yaariír gwa tleehhiiká amoodae, asma inooín kuwa haratlinti'iiká.

Currently Selected:

Matayo 13: IQWNT

Highlight

Copy