Luka 5

Siyoó yaariír oo taa uhín

(Mt 4:18-22; Mk 1:16-20)

1Múk yaariír oo axweesantá Mungú axaamiís inós guna tliíq qoomár iwa sihhiít afaá tlawtá Genesaretír i alé. 2Miringér#5:2 Miringér Gídaabá Malaalér. tsár gana ár, i afaá tlawi. Ala ohomuusér siyó aa ti'ít baraadae, i baratsufay'ín hamtlít. 3Yesu iri baraá miringamoó wák i dáh oo Simoni, guri firín nguwa surukusi gár niinawe afaá tlawto. Iri gawaadí iwiít, boo/oó muu guri intsaahhatimís.

4Axweesanto iwa hhe'eés, iri oó' dír Simoni, “Miringamo surkuseek baraá tla/ángw tlawi, baratsufayhúng /aytisaak baraá ma/aay, siyó kwa oohiindá'.”

5Simoni iri oó', “Aáko, gadiyér ur tina ló'wa slaaqatís xweeraawo, ala gár taa slawaán i káhh. Ala adoosíng taa oi baratsufaay u /aytiís.” 6Naxés adoodá' kawa tleéhh, siyoó yaariír kuri sláy. Baratsufay'ín iri tsatimituú áy. 7Mukdá' nee inooín algadiyuusá' oo baraá miringamoó hatlá', kiri kuútl ar daba', as kiwa alee/iisár ay. Tindiri hardáh, miringe tsaraawo kari hatsiís, iri lak /ee/etiín baraá ma'aay. 8Simoni Petro adoodá' ngiwa ár, iri tumbarara'aát dír ya'aá Yesu, iri oó', “Aáko, dir'eene quútl, asma án a heé tlakusmo.”

9Asma waa/oo/amo guna eér, nee mukdá' sleémeero ti koomá', asma siyoódá' yaariír taa sláy. 10Yakobo nee Yohana sleeme, daaqoó Sebedayo, kudá' nee Simoni algadiyuusá', kari waa/oó/. Yesu Simoni guri báy, “Ma da'ayumitaar, iimír hamí daxta kuúng a heé múk huuwahuúw amor'eé' alé.”

11Miringer'ín kawa dír afaá ma'áy duúx, umuúqo gaaro kay didí geexáy, inós kway eehaár.

Yesu heé tiqtír tsatmit gwa hungu/uús

(Mt 8:1-4; Mk 1:40-45)

12Iwa baraá gixsár wák i dirii'i baraá gixsaduudae, heé tiqtír tsatmituú koóm i deer baraadae. Inós Yesu nguwa ár, iri dirós i tumbarara'aát, guri firín iri oó', “Aáko, kuúng bar slá', i aleesleér iwa hheehhe'es.”

13Inós guri dakós i gan'aás, guri kwatiít iri oó', “Án a slaá', hhoohhoúw.” Hamtidár kilae tiqtirós tidár tsatmit iri hungú/. 14Guri báy, “Tí ma heé bawaar, ala tláw ti laqaan dír geeraharusmoó saalíngw múk Yahudi. Ilahhooadá' Musa aa hara'ayín asma hungu/umaawók haniiseek, tí i lamabu'uungw tleehhit amor'ine.”

15Ala iidíguuwós iri ak tsiyaayaaxaát, boo/oó muu in burumburiimaamiit kuwa axaasi, nee tiqtir'ín kawa hungu/uumisi. 16Ala inós siiwarkaaro gin geexaaxáy, in tlaatláy amór muu iwa kahhi, as iwa firór ay.

Heé tiqtír sol'omit kwa hungu/uús

(Mt 9:1-8; Mk 2:1-12)

17Looarka wake iwa intsaahhatimisi, múk Farisayo nee intsaahhatuusér hara'ayár Musa, kudá' baraá umuúqo gixsár Galilayár dahhá' nee yaamaá Yudea nee Yerusalemu, taa didaádí iwiít. Nee inós aleesleemuú Aako gu kón oo ir hungu/uumisi. 18Naxés muu nina hardáh, ta heé tiqtír sol'omituú kón, ku loohiis ar hhafta. Geera kun dahaasár wa slaa' baraá do', kuwa huuwi dír geeraawós i alé. 19Pa/ángw kur dahaasi baraá do' iwa qwaár, asma daqtá muu, tari tsa/án gawaá daanduú do', dír aweerisa kari tleéhh, kuri aweeriís ar hhaftuuwós dír tla/ángw i alé geerá Yesu. 20Inós haratlintaaor'ín ngiwa ár, guri báy, “Mulqúmo, tlakweemaawók kaa gurtláy.”

21Intsaahhatuusér hara'ayár Musa nee múk Farisayo tiri yaahamiisiyé' ta kaahi, “A heemá heewí /aymi'iiká' gi káh, awa Mungú /ooslisliingw? A heemá oo tlakweema gurtleemuuwo gi aleesláw, a har Mungú kilosekáhe?”

22Yesu axweesantaín gari tsaáhh, giri i ilawaáts iri oó', “Asma milá mas axwesá' baraá munerhunge? 23Gár ák inslaahh a gaalá ooaro, ‘Tlakweemaawók kaa gurtláy,’ laqaá, ‘Sihhiít, hi'iimiít’? 24Ala kuungá' xuaak gídaabá Garmoó Hee aleesleemu gu kón baraá yaamuuwo oo tlakweema ngiwa gurtlay.” Heedaádá' tiqtír sol'omituú koóm guri báy, “Án a kah, sihhiít, hhaftuuwók gagaareek, waátl amór do'ók.”

25Hamtidár kilae iri geeraaín i sihhiít. Hhaftuuwós guri gagaár, iri waátl amór do'ós, i hara Mungú xirfayeemiis. 26Sleémeero waa/oo/amo gay eér, Mungú kuri xirfayeemiís, dae giri eér ta kaahi, “Laarí muruú waa/oo/amo ugwa araán.”

Yesu Lawi gwa ateét

(Mt 9:9-13; Mk 2:13-17)

27Aluuwo iri ti'iít, ohomusmoó koódi guri ár, umuuwós a Lawi, i baraá doó ohomér koódír i dirii', guri báy, “Eeharáng.” 28Umuúqo gaaro gay geexáy, iri tláy guri eehaár.

29Lawi muruú /aymár yaariír guri tleéhh dír do'ose as Yesu. Boo/oó úr i didá', oo ohomuusér koódi nee múk hatlá' oo nee inooín naa al iwiitiye' dír muruú /ayma. 30Naxés múk Farisayo nee intsaahhatuuser'ín ar hara'ayár Musa eeharuusér Yesu kari i qununuú/ ta kaahi, “Mas /ayiindá' nee tawa al wahaanda' nee ohomuusér koódi nee tlakuuse?”

31Yesu giri báy, “Awa slaqo hho' qwaslaarmo ngu leelehhitiaaká, aqo har tiqtuuse. 32Aníng naa hardahiiká as gan'amuuse ngiwa ateetiim, ala nina hardáh as tlakuuse iwa hhu'u'uun.”

Yaahastá gawaá daanduú gwaawito

(Mt 9:14-17; Mk 2:18-22)

33Inooín kuri báy, “Eeharuusér Yohana i gwaawawiín daqtá yaarire, nee tawa firaarin, nee eeharuusér múk Farisayo sleeme, ala eeharuuseerók i /ayiín nee i wahaán.”

34Ala Yesu giri báy, “War/aá heé duuxuuxuúm kiwa /aymár /ita' i aleesleerá'a, qoomaadá' nee heedá' duuxuuxuúm tawa dinkwár i dirii'i? 35Ala deelo i hardát ar heedaádá' duuxuuxuúm kuwa hingeesi. Daqadá' an qoomár inooín tawa sangw gwaawin.”

36Giri slaqsaywí báy sleeme, “Hee i kaahh oo warqamo gu tsaát gawaá inqwaarír /abén wa ale, guri qaas gawaá inqwaarír aa gwa'. Adoorí birnga tleéhh, inqwaaridá' /aben gaa tawó tsaát, slám warqamoodá' /abén nee inqwaaridá' aa gwa' ti oohiaaká. 37Tam hee i kaahh oo buurár hamhaami#5:37 Buurár hamhaami Gídaabá buurár hame. ga qamaamiím baraá dahhaaroó qarén. Birnga qaás, buuradár hamhaami dahhaaráydá' gu tsú/, buura iri ku'út, dahhaaráy iri hhitiruut. 38Ala buurár hamhaami dír ki qamaamin a baraá dahhaaroó abén. 39Hee i kaahh oo buurár aa hamat gaa wah iri ar hamhaamír ilatleeruus, asma i kaahi, ‘Tidá' aa hamat an tidá' ak hho'.’”

Currently Selected:

Luka 5: IQWNT

Highlight

Copy