Luka 24

Waasle/uú Yesu

(Mt 28:1-10; Mk 16:1-8; Yn 20:1-10)

1Matlatlér deelór Jumapili, looa niwa tsiiríhh, tari amór /aantár káy, mooyangwdá' taa amohhe'eés kuri huúw. 2Naxés tawa hardáh, tlaa/adá' kaa gwangwaraá' amorqí alé dír /aantaro. 3Tari dáh baraá baa'a, ala slaqwtá Aakoó Yesu kaa ariiká. 4Tari amoqwaqwadín as tidá' taa ár. Naxés múk tsár aa dír bihhaaín i sihhiít oo tlabaá miirii/á' gaa tsiit. 5/Ameenadaádá' iri da'ayút ló'wa ale, sager'ín kari xupu'uús yaamí alé. Mukdaádá' gari báy, “Heé slaáf gár kus leelehhita' didár múk aa qaátl wa ale. 6Diirihe i kaahh, aa waasleé/. Inslawaagáy tidá' inós aa káh qoomár iwa baraá yaamaá Galilayár i kahhi, iwa káh, 7‘Garmoó Hee gár kuwa hariím aqo kun dabaá tlakuusér i qaas, nee kuri kikii' gawaá msalaába, nee bál tám iri waaslee/.’”

8Axweesanayduú Yesu kuri insláy, 9tari tláy didár /aantár wa ale, tay kií/, iidíguuwí sleémeero kuri oó' dír eeharuuseedá' mibá nee wak, nee awa hatlá' sleémeero. 10Nee /ameenadá' a ín Mariamu Magdalene, nee Yohana nee Mariamu aayór Yakobo, nee /ameenár hatlá' ar nee inooín ti alkoomá'. Tí an tidár iidíguuwí gwa o' dír ya/abuusér i alé. 11Ala axweesanoó /ameenarí aa kát a adór axweesanoó dakti'iima dir'ine, ala slám kaa haratlintii'iiká. 12Ala Petro iri tláy ar ti'iingw ay dír /aanta. Iri xupuú' iri qaytsiít baraadí alé, nee gár aa ár a inqwaruudá' kura uuntsuús kilós. Iri kií/ amór doó i alé, i hara loohi waa/oo/amín daanduú tidá' aa tleehharuuti.

Aa'aá Emau

(Mk 16:12-13)

13Baalaadár kilae awa tsár baraá tla/ángw eeharuuseero tana tláy, ta baraá gixsarka káy, ar umuuwós ta babay Emau. Saweemawós dír Yerusalemuwo a har adór kilomeétár mibá nee wak. 14Qoomár inooín tawa loohír i dirii'i, ta axwees kilooín alé daanduú kangwdá' aa tleehharuuti. 15Qoomár tawa axweesi nee tiwa yaahamiisiya' kilooín alé, Yesu inósuú kilá' iri tseewúy dir'ín i alé, tari alhi'iít nee inooín. 16Ala ilaaín kiri boo/eés gídaabá mukuwa tsaáhh adór tar Yesu. 17Yesu giri báy, “Kaangwí a milá ta axwesa' tawa hi'ita'?”

Tari sihhiít, tari xumiís ar gurhaami. 18Kookoo wák baraá tla/angw'ine, oo ta bay Kleopa, ina ilawaáts amór Yesú i alé iri oó', “Kuúng kilók a dahaaymoówo baraá Yerusalemuwo, tam muruudá' sleémeero aa baraadá' wa tleehharuumiit deeloorihe, kuwa xu'uká?”

19Giri yaahaás, “Ahaá, a muruú adoomá oo aa tleehharuut?”

Kuri báy, “Iidíguú Yesú Nasareti. Inós a aarusmo. Inós i aleesleemuú kón baraá tlehhemi'iiwo nee baraá axweesanto, dír geerá Munguhe, nee dír muu sleémeerowo. 20Geeraharuusér uren ar saalíngw múk Yahudi, nee mukrén oo urén inós kuri haniís kuwa sakwasleemuuti ar sakwasleemár gwa'ara, kuri kikií' gawaá msalaábár i alé. 21Atén geeraawo inós una haraxuaán gídaabá kwí an kudá' múk Israeli gu gweér. Slám iimír muruuwí iwa tleehharuumiít deelo laarí ar tám. 22Nee laarí /ameenarka baraá tla/angwrene atén tina dae tsát. Inooín matlatleero nina tseewa tlayé' amór /aantár i alé, 23ala naxés slaqwtós kaa ariiká. Tindiwa kií/ amoorén i alé ta kaahi, ‘Malayke ana araán. Nee malaykeedá' i kat i slaaf.’ 24Nee slamí awa hatlá' baraá tla/angwrene tana daqáy amór /aantár i alé, kari ár aqo adoodár /ameenadá' ngir kat. Ala inós kwaa ariiká.”

25Yesu giri báy, “Kuungá' a tsuwa daktana. Kuungá' tundu tsuwa har gawdén mura' haratlintaaooro, kudá' sleémeero tinda alki/iít nee aaruuse. 26Ahaá, a gár xuawásle, Kristo slahha'amaayeerí ngiwa slay, nee iwa dahi baraá xirfuuwós i alé?” 27Yesu muruudá' sleémeero Gooi i kat daanduuwose guri dir'ín i geehhoutimís, iimír kitaaba'aá Musá wa ale ay aaruuse sleémeero.

28Tari tseewúy amór gixsadá' ta kay. Yesu ina hi'iít adór heé geerí kumiitár slaá'. 29Ala inooín kuri harhheehhe'eés ta kaahi, “Deeláng, asma looa aa dát, xweera naa xayé'.” Iri dáh as nee inooín tawa al'iwiwiiti. 30Qoomár tawa dinkwár i iwiít dír muruú /aymár i alé, mukatmo guri óh, iri sluufiís, guri parhhamiís, guri hanmiís dir'ín i alé. 31Ilaaín kiri gweér, kuri tsaáhh. Inós iri qwaár dír ilaaín wa ale. 32Tiri kilooín yaahamisiyé' tari káh, “Ahaá, muneerén kaa kwatimiítiíke, qoomár loohiro iwa amoorén i axweesi, nee Gooi ngiwa geehhoutmisi?”

33Tari tláy hamtidár kilae, tari kií/ Yerusalemúy alé. Tawa hardáh eeharuuseedá' mibá nee wak kay dinkwár i áy, taa dinkwár i burumburiít nee tidár hatlá' nee inooín aldinku'umamisá'. 34Kuká' niri ooiyé', “Ar ló', Aako naa waasleé/, Simoni nguna ár.”

35Kudá' tsár sleeme kangwdá' aa tleehharuut loohiro nguri kaahiyé', nee adór Aako kura tsaáhh, qoomár mukatmo nguwa parhhamiís.

Yesu eeharuuseerós gaa harati'iít

(Mt 28:16-20; Mk 16:14-18; Yn 20:19-23; Tlehh 1:6-8)

36Nee qoomár tawa iidíguuwí axweesi, Yesu inósuú kilá' iri sihhiít tla/angw'ín i alé, giri báy, “Wayda ilaoohaak.”

37Tari kwisliít, tari ló'wa da'ayuút, asma inooín ka xui gaa a hhantamo. 38Giri báy, “Asma milá masa amoqwadé'? Nee asma milá mas xurumitá' baraá munerhunge. 39Dabaaeé' i qaytsitaak nee ya'aaeene. Asma a ánuú kilá'. Án kwatiitaré' nee araaré'. Asma hhantamo i slaqwtá konká, laqaá fadu, ala aníng slaqwa nee fadu i koóm, adoorí kuungá' ir ga/eera'.”

40Axweesantí ooaro ngiwa hhe'eés, dabaawós giri laqán nee ya'aawose. 41Tam siiwadae kwaa haratlinti'iiká as qwala/, slám tari kumiít waa/oo/amooro. Yesu giri báy, “Muruú /ayma u koondá'a diirihe?” 42Kuri fu'unír i haniís ar siyoó taa kikií'. 43Gari óh gari geeraaín wa /aáy.

44Aluuwo Yesu giri báy, “Kaangwí a kudá' naa káh qoomár niwa dinkwár i dirii' nee kuungá', ar gídaabá tidá' sleémeero taa gooín daanduueén i alé, baraá hara'ayár Musawo, nee baraá gooír aaruuse, nee baraá Wara'amto, gár iwa hariin aqo in bó/ sleémeero.”

45Yesu sager'ín gari gwa/atís as Gooi kawa tsaahhi. 46Giri báy, “Tí a tidá' taa gooín ar gídaabá Kristo gár kuwa hariím aqo kun slahhe'eemiis, nee deelór tám bira waaráhh nay waaslee/. 47Nee sleeme kaa gooín ar gídaabá kaangwí ku alki/iit ar umuueé' dír xoordu sleémeero gídaabá, ‘Hhu'u'uumé' as gurtleemuú tlakweema kuwa sleera'.’ Kaangwí dír kuwa iimu/ún an Yerusalemu. 48Kuungá' kilá' iidíguuwí u lamabu'uundá'. 49Nee ga/aawaagáy, tidá' Baabuúeé' naa oó' aníng ngin dirhúng i ya/aáw. Ala kuungá' iwiwiité' baraaká' gixsarí wa ale, ay dír /uuruú gawtá daáhh kway sleera'.”

Tsa/amtór gawaá doori

(Mk 16:19-20; Tlehh 1:9-11)

50Yesu eeharuuseerós gay geerahaár ay Betania, dabaawós gay tleés, inooín giri tsuúq. 51Qoomár inós ngiwa tsuuqun, tiri paraátl dir'ine, kurira tláy gawaá doorí alé. 52Inooín kuri i tumbarara'aát, tari kií/ ay Yerusalemu ar qwal/uú úr. 53Umuúqo siiwaro inooín tana baraá Doó Mungú wa iwiwiít, tawa Mungú xirfayeemisi.

Currently Selected:

Luka 24: IQWNT

Highlight

Copy