Luka 18

Kwaalo'o nee waawutmo

1Giri slaqsaywí báy as ngiwa intsaahhatisi gídaabá inooín gár kiwa hariím a Mungú ngun firiiriná' daqisleém, tam matawa mune sií'. 2Iri oó', “Waawutmooko baraá gixsarkaaro i deer. Inós i Mungú ilaiwa/aa/atiiká, slám inós muu gu gaár i xuiiká. 3Nee baraá gixsadae /ameenirkar kwaalo'o i deer. Inós gun i kwasleemár aaeér, as ngiwa alee/iisi dír wakusmoowose, as ngiwa sleer tidá' inós wa hariim. 4Nee waawutmoodá' inós iri ala sií', aluuwo iri oó' baraá muunaáwós i alé, ‘Aníng a Mungú ilaiwa/aa/ataaká, slám, muu u gaár i xuaaká. 5Ala kwaalo'oorí aníng i daawitimís. Bira adoorír kumít, aníng alhhe'eesaywo i slaaqatís daawitimisuwo, ala gár kas hho' aníng an alee/iís, as hariímarós ngiwa sleer.’”

6Aako iri oó', “Waawutmoodá' gan'amuú tlehhiitaaká ugwa axasí'iíke adór aa káh. 7Nee Mungú, xáy, mukós kudá' aa tsawaár gu ak alee/iísiíke, hariímar'ín ngiwa slay, kudá' inós nguy /aa/amiimá' tlaatla/aangw nee xweeraawo? Inós i hargawdúya ngiwa alee/iisi? 8Án a kah, hariímar'ín ga haniis ar gaanslaay. Ala Garmoó Hee bál bindi kii/, haratlintaao ga ári baraaká' yaamuuwo?”

Heé Farisayo nee ohomusmoó koódi

9Mukko taa kilooín harafaar amór gan'ámkwí alé i deer, oo múk hatlá' sleémeero gwa waaqaqaa'. Yesu giri slaqsaywí báy, 10“Múk tsár ina tsa/án amór Doó Mungú i alé, ta saalíngw áy. Oo wák a heé Farisayo, nee oo tsár a ohomusmoó koódi.

11“Heé Farisayo ina sihhiít, iri adoorír firín kilós alé, ‘Mungú, án kuúng u sluufimiís, asma aníng a adór múk hatlaeeká, a adór malguuseerooká nee adór al/aymuuseerooká nee adór fuquuseerooká, laqaá a adór ohomusmoowú koódirooká. 12Aníng an gwaawawiím baraá wiikír wake sagaáwa tsár. A ilahhooár hanimaamiís baraá daqaari'iimar'eé' sleémeerowo, ar wák baraá mibaango tawa ar Mungú.’

13“Ohomusmooduú koódi amorqá' saaw gana i sihhiít. Sleeme tam iwa gáwtí qayti gaa qiitliiká, aqo har da/ewawós gina pupuxuumiís, iri oó', ‘Mungú, án gurtlawáng! Aníng a heé tlakweemaá koóm.’ 14Án a kah, kwí iri waátl amór do'ós, kwí kilós an kudá' taa gan'ámkwí harafaár. Asma kudá' ti ureemiís kilós alé, ku niinawees, nee kudá' ti kilós niinaweemiís, ku urees.”

Yesu na/'ii ngiwa tsuúq

(Mt 19:13-15; Mk 10:13-16)

15Na/'aá ninakw kina huúw amór Yésú i alé, ngiwa kwatmiiti. Ala eeharuuse adoodá' ngiwa aán, mukdá' na/'aá koóm guri iigahhát. 16Ala Yesu giri ateét amoorós i alé, iri oó', “Na/'aá ninakw mawaagáy ni amor'eé' hardihiye', mi ila/aamara'. Asma awa adór kuká', waawuti'iimár Mungú a tooín. 17Án a kah, heé waawuti'iimár Mungú gaa ya/aniká adór na/oó niinár alé, i baloó dahiiká baraá waawuti'iimarihe.”

Masoomoó daqaarmo

(Mt 19:16-30; Mk 10:17-31)

18Heeko úr Yesu guri yaahaás, “Intsaahhatusmoó hhoó', adór ni laaq a adoomá ar slafíngw alhhe'eesay wásl ngur aal?”

19Yesu guri báy, “Mis hhooeemár ateetiín? Heé hhoó' i kaahh, aqo har Mungú kilós. 20Ahaá baré hara'aya a xú', ‘Fuqi ma awaar, Hee mu gaasaar, Gár hee ma fiisaar, /Aysantá tawo ma tsataar, Baabuúwók nee aayo ilaiwawa/eek.’”

21Iri oó', “Tisíng aga boo/eés sleémeero iimír na/u'uumar'eé' wa ale.”

22Yesu tí ngiwa axaás, guri báy, “Tam hamí gár wák uga wa /aaruúr. Muruudá' ta koon sleémeero weeriseek, nee peésadá' ta sleer ka narkuutér i qasmís. Daqaari'iimarók a gawaá doorí eér. Daqadá' na hardát, aníng i eehát.” 23Ala inós tí ngiwa axaás, iri ló'wa gurhaamuút, asma inós a daqaarmo ló'wa ale.

24Yesu gari tsaáhh adór ira gurhaamuút, iri oó', “Ga/aawaak, adór daqaare kar gawít dahmaá baraá waawuti'iimár Munguhe. 25Ka inslaahh angamiía iwa waarahh ar baraá fooxár laqwa, ta daqaarmo iwa baraá waawuti'iimár Mungú i dahi.”

26Mukdá' aa axaas tari oó', “Ala heé ba/ama ga aleesláw a heemá adoosinge?”

27Yesu iri oó', “Tidaádá' dír muko ya/aamaaká, dír Munguhe i ya/aán.”

28Petro iri oó', “Ga/aaweegáy, atén muruurén sleémeero ugwa geexawaán, kuúng uri eeharaán.”

29Yesu giri báy, “Án a kah, umuúqo heewo oo dooín gwa geexay, laqaá hareerós, laqaá hhaeewós, laqaá xwayliteérós, laqaá na/'iiwós, as waawuti'iimár Mungú, 30inós muruú yaariír gun ak sláy hám baraá yaamuukae, nee baraá yaamaá hatlae slafíngw alhhe'eesoó koomaaká gu sláy.”

Yesu gwa'araarós ngaa geerí oó' malé alé sagaáwa tame

(Mt 20:17-19; Mk 10:32-34)

31Yesu eeharuuseedá' mibá nee tsár ganara tláy, gari báy, “Ga/aawaagáy, hamí a tsa/a/amaán tawa Yerusalémú kawaan, nee tidá' sleémeero taa gooín nee aaruuse daanduú Garmoó Heewo i bó/. 32Asma ku qaas gawaá dabaá múk xoordaá hatlá'. Inooín kway niqín, kway ngwanjín, kway i nitsimiit, 33kway muux ar qaw'i, kway gaas. Deelo tám bira waaráhh nay waaslee/.”

34Ala eeharuuseerós tam /aymuú wák gwa tsahhiká baraá axweesanaydá' aa dir'ín i kaahi. Gídaabár kaangwí kaa luú/ dir'ine. Sleeme kaa tsaahhiiká tidá' aa alki/iít dir'ín i alé.

Heé taampa kuwa qaytsitís

(Mt 20:29-34; Mk 10:46-52)

35Yesu iwa tseewúy Yerikór i alé, heeko wák oo taampa aa iwiít afaá loohír i alé, i múk firiirín peésaro. 36Qoomár boo/oó úr nguwa axaás iwa waaraahhi, iri yaahaás, “Gaa a milá?”

37Kuri báy, “Yesú Nasareti in waraahh.”

38Tseeo gari iimu/ún, iri oó', “Yésu, Garmoó Daudi, án gurtlawáng.”

39Mukdá' aa geerí tseewuy kuri iigahhaát as iwa xasliiti, ala inós tseeooro iri buúhh, “Garmoó Daudi, án gurtlawáng.”

40Yesu iri sihhiít iri oó', “Huware' amor'eé' alé.” Qoomár iwa tseewúy dír Yésú i alé, Yesu iri oó', 41“Adór ta sla' ar u laaq a adoomá?”

Inós iri oó', “Aáko, gár ni slaa' a ilaaeé' niwa qaytsitiya'.”

42Yesu iri oó', “Ilaawók ni qaytsitiye'. Haratlintaaoorók ugwa hungu/ús.”

43Hamtidár kilae ilaawós nay qaytsitiyé', nee Yesu tari koné', inós i hara Mungú xirfayeemiis. Nee muu sleémeero adoodá' kawa ár, Mungú kuri xirfayeemiís.

Currently Selected:

Luka 18: IQWNT

Highlight

Copy