Matayo 4

Okulengesibwa kwa Yesu

(Mar 1:12-13; Luk 4:1-13)

1Ahanyuma Mwoyo atwara Yesu omw'irungu kugya kulengesibwa Sitani. 2Ebiro 40 byona yasiibaga arara, kyonkai obugenda bw'eirai arumwa enjara. 3Sitani aija amugambira ati, “K'oraba oli mwana wa Ruhanga hangira amabare aga gahinduke mukate.” 4Kyonkai Yesu amuhorora ati, “Kikahandikwa kiti, ‘Omuntu tatungwa mukate gwonkai, atungwa buli kigambo ekiruga omu kanwa ka Ruhanga.’ ”

5Nikwo Sitani kumutwara omu kigo kitakatifu, akamuteka aha katwetwe ka Rwensinga. 6Amugambira ati, “K'oraba oli Mwana wa Ruhanga, oyekunture ahansi; manya kikahandikwa kiti, ‘Aliragira abamalaikabe kukulinda,’ mara ati, ‘Balikushutuza emikono yabo, otalija okasitara aha ibare.’ ”

7Yesu agambira Sitani ati, “Kishubire kihandikirwe kiti, ‘Otalilengesa Mukama Ruhanga wawe,’ ”

8Sitani ashuba amutwara aha ibanga elira muno, amwoleka engoma zona z'omu nsi n'ekitinwa kyazo, 9amugambira ati, “K'orabandama okanfukamira, engoma ezi zona ndazikuha.” 10Nirwo Yesu yamugambiire ati, “Chwekamu iwe Sitani! Manya kikahandikwa kiti,

‘Orafukamiraga Omukama Ruhanga wawe,

mara wenene wenkai obe niwe okolera.’ ”

11Aho Sitani amurugaho, nikwo abamalaika kwija bakamutagaitira.

Yesu natandika omulimogwe omuli Galilaya

(Mar 1:14-15; Luk 4:14-15)

12Yesu kayahuliire okwo Yohana bamukwete, akwata omuhanda agya Galilaya. 13Asigaho Nazareti agenda atura Kaperinaumu bwatana aha nyanja, omu nsi ya Zebuluni na Nafutali, 14ekigambo kibone kugobeelera eky'Omurangi Isaya yagambire ati,

15“Ensi ya Zebuluni n'ensi ya Nafutali,

obwolekera bw'enyanja,

n'okushabuka Yorudani,

Galilaya eturwa abanyamahanga:

16abantu abaturaga omu mwilima

baboine omushana guhango.

Abatura omu nsi y'omwilima n'omu kibeho kya Rufu

eizoba lyabashabukiraho.”

17Kwema makiro ago, Yesu abanza kuranga ati, “Mwechuze, aha rw'okuba obukama bw'omw'iguru bwahika.”

Yesu nayeta abajubi banai

(Mar 1:16-20; Luk 5:1-11)

18Yesu kayabaire naraba aha Nyanja ya Galilaya, abona abarumuna babili: Simoni owo beta Petero na Anderea omurumuna, nibanaga eishambo omu nyanja, nobona bakaba bali bajubi. 19Abagambira ati, “Mumpondere, ndabahindura bajubi b'abantu.” 20Niho honkai basigaho amashambo gabo bamuhondera. 21Kayarugir'aho abona abarumuna abandi babili: Yakobo eya Zebedayo na Yohana omurumuna, bali omu bwato bwa Zebedayo ishebo nibashoborora amashambo gabo, abeta. 22Aho n'aho basigaho obwato na ishebo, bamuhondera.

Yesu nayegesa naranga n'okukiza abantu

(Luk 6:17-19)

23Yesu araba Galilaya yona nayegesa omu sinagogi zabo, naranga amakuru garungi evangeli y'obukama bwa Ruhanga. Abantu abatambira buli ndwara na buli bulema. 24Kityo eirangalye limanyika Siria yona, bata nibamuletera abarwaire bona, abaina kaishe ndwara n'obushasi, abakwetwe amasitani, abagwi b'ensimbu n'abakabire embaju, mara abakiza. 25Kandi embaga nyingi eruga Galilaya, omu nsi y'ebigo 10 ebyayetwaga Dekapoli, Yerusalemu, Buyahudi na buseli bwa Yorudani, bamuhondera.

Currently Selected:

Matayo 4: RHAY01

Highlight

Copy