Luka 21

Ekihongo ky'entumbwakazi

(Mar 12:41-44)

1Yesu aleba oku n'oku abona okwo abatungi balikuteka ebihongo omuli buhanika ya Rwensinga. 2Ashuba abona entumbwakazi netamu obwapa bubili. 3Nirwo yagambire ati, “Nimbagambira amazima, eby'entumbwa egi yagira yashaga bona. 4Aha rw'enshonga ebyo abandi bagira baihya aha bingi ebyo bainabyo, kyonkai omukazi ogu n'obwo bunakubwe yagira byona ebyo yaba ainabyo.”

Yesu nabaasha okukambuka kwa Rwensinga

(Mat 24:1-2; Mar 13:1-2)

5Abantu abandi bashangwa nibatenda Rwensinga okwo elengize n'amabare garungi n'ebihongo. 6Aho Yesu abagambira ati, “Ebyo mulikubona ebi, obukiro bulija orwo hanu aha eibare litalisigara litembekejainyie aha lindi, litajugunyirwe hansi.”

Ebiyengo n'okugingiizibwa

(Mat 24:3-14; Mar 13:3-13)

7Abantu babaza Yesu bati, “Mwegesa, ebi bilibaho maki, isi kabiliija kubaho halibaho buboneroki?” 8Abahorora ati, “Mulimanya batalibanaga. Balija bangi omw'ibara lyange nibagamba bati, ‘N'inye Kirisito!’ Bati, ‘Akaanya niko!’ Mutalibahondera. 9Orwo mulihulira endashana n'enshengo, mutalitina. Ebi nibiragirwa bibanze, kyonkai amaheleruka galiba gatakabaire.”

10Ashuba abagambira ati, “Eihanga lilitabalira elindi, n'engoma elitabalira endijo. 11Halibaho emisisi y'amani, eifa n'ebibundo oku na kuli. Kandi halibaho eby'okutiinisa muno hamoi n'ebitangazo kuruga omw'iguru. 12Nawe ebi bitakabaireho balibanza kukwata inywe, babagingiize, balibatwara omu sinagogi kubaramura nibabatura inye. 13Obu nibwo buliba bushango ahali inywe kujulira okwesiga kwanyu. 14Aho mwikare mwetekatekire, mutalimaaya nimuhiga ekyo murahorora. 15Ndibashoboza kugamba eby'obumanyi, ebyo ababisha banyu batalishobora kwemera anga kubihinduliza. 16Nangu mulibanjwa n'abazaire banyu, na barumuna banyu, n'abanyaruganda, na banywanyi banyu nangu abandi babaite. 17Mulinobwa abantu bona nibabatura inye. 18Kyonkai n'orushoke rwonkai tirulibaruga aha mitwe. 19Omu kwegumisiliza kwanyu mulirokoka.

Yesu nabasha okukambuka kwa Yerusalemu

(Mat 24:15-21; Mar 13:14-19)

20“Kyonkai orwo mulibona Yerusalemu yabundwa amahe, mumanye okwo yakambuka. 21Aho abalishangwa bali Buyahudi basingirwe omu mabanga. Abaliba bali omu kigo barugemu. Abalishangwa bagiire omu byaro bataligaruka mu kigo. 22Ebi biliba biro by'ekibonabonyio, kugobesheleza byona ebyahandikirwe. 23Omu biro ebyo abakazi abaliba baina enda n'abalikwonkya balishasha! Ensi elibona enaku zingi, n'abantu b'omuzarwa ogu balibona ekibonabonyio. 24Baliitwa embanda, batwarwe endore, bahwere omu mahanga gona. Yerusalemu elikandagilirwa abanyamahanga kuhika mbali balyelekelera.

Okwija kw'Omwana w'Omuntu

(Mat 24:29-31; Mar 13:24-27)

25“Omw'izoba n'omu kwezi n'omu nyanyinyi, halibamu eby'okutangaza, kandi omu nsi akahiliro k'enyanja n'amayengo bililetera amahanga enaku n'okushoberwa. 26Orwo abantu balibona enaku zagwera ensi balikabisibwa obutini, aha rw'okuba eby'okutangaza eby'omw'iguru bilitengeeta. 27Abantu balibona Omwana w'Omuntu naletwa omu bichwi aina obushobora n'ekitinwa kingi. 28Orwo ebigambo ebyo bilibanza kuzoka muraramire eiguru, kuba okuchungurwa kwanyu kuliba kuli haihi.”

Obuleebero bw'omuti gw'omutini

(Mat 24:32-35; Mar 13:28-31)

29Yesu achwera abantu enfumo, ati, “Mulebe omutini n'emiti endijo yona. 30Orwo emiti egyo ebanza kututura amababi, aho muba mwaboine mara mumanya okwo ekyanda kyaturuka. 31Kutyo orwo mulibona ebigambo ebyo byabaho, mumanyireho okwo obukama bwa Ruhanga buli haihi. 32Nimbagambira amazima nti omuzarwa ogu tigulihwaho ebyo byona bitabaireho. 33Eiguru n'ensi bilichweka, kyonkai ebigambo byange tibilichweka.

Okwikara oyetekatekire

34“Mwikare mwetekatekire! Emitima yanyu eleke kwikara omu by'amashemelerwa, etamiiro n'okunulirwa ebintu by'ensi, ekiro ekyo kitalija kikabagwagwaho kibandagara nk'omubarashuka. 35Enshonga abantu bona omu nsi baligwerwa ekiro ekyo. 36Inywe mwikare mwetekatekire buli kaanya, mushangwe nimushoma enshara nirwo mulibona amani g'okuhunga aha bigambo ebi ebilibaho, n'okwemelera omu maisho g'Omwana w'Omuntu.”

37Buli kiro yayegesaga omuli Rwensinga, kyonkai omu kiro yararaga omw'Ibanga ly'Emizeituni. 38Kandi bwankya karai abantu bata kwija Rwensinga kumuhuliliza.

Currently Selected:

Luka 21: RHAY01

Highlight

Copy