Luka 19

Yesu omwa Zakeo

1Yesu araba Yeriko. 2Omuli Yeriko omwo hakaba halimu omushaija nayetwa Zakeo. Zakeo ogwo ashangwa ali mushoza, kandi ali mutungi. 3Ayenda kubona Yesu okwo ashusha, kyonkai tiyashoboire; embaga ekaba emusikiize, enshonga akaba ali mugufi. 4Kityo ayebembera airukire akuuba omuti gw'omukuyu nirwo aramubona, kuba Yesu akaba naija kuraba muhanda ogwo. 5Yesu kayagobire aha muti ogwo araramira, amugambira ati, “Zakeo, yanguha okuburuguke; kir'eki nindagirwa kusiiba omwawe.” 6Kityo Zakeo ayanguha akuburuguka, anyegeza Yesu n'amashemelerwa. 7Abantu kabaaboine ekyo bajurujwita bati, “Yakyalira omufakare.” 8Zakeo abanduka ahansi agambira Omukama ati, “Waitu Mukama, enusu y'ebyange nagigabira abanaku. Kandaba nyina owo nagobeize ekintu kyona kyona, ninkimugarulira emirundi enai.” 9Yesu amugambira ati, “Kir'eki enju egi yarokoka, aha rw'okuba naiwe oba mwana wa Aburahamu. 10Mantisi Omwana w'Omuntu akaija kuhiiga ababuzire n'okubarokora.”

Enfumo y'esarafu ikumi z'ezahabu

(Mat 25:14-30)

11Kababaire bahuliliize ebyo, Yesu ayongeraho kubachwera enfumo, nobona akaba ali haihi na Yerusalemu, kandi bakaba nibashubira okwo obukama bwa Ruhanga bulikwija kuzoka bwangu. 12Agamba ati, “Omurangira omoi akagya omu nsi y'aharai kulya obukama akashuba akaterayo akagaruka. 13Ayeta abairube 10, abaha esarafu 10 z'ezahabu, abagambira ati, ‘Esarafu ezi z'ezahabu muzitundurane kuhika orwo ndigaruka.’ 14Kyonkai abanyansibe bamunoba, bamuhondeza entumwa nibagamba bati, ‘Omuntu ogu titulikwenda k'atutwara.’ 15Kayamazire kulya engoma akagaruka, aragira abairube abo yasigiire empiha kwetwa, amanye ebyo batunduraine bakaihyamu. 16Owa mbere amugoba nagamba ati, ‘Mukama wange, esarafu yawe emoi y'ezahabu ezaire ezindi ikumi.’ 17Mukamawe amugambira ati, ‘Mahyo mwiru muge! Orwo obaire mwesigwa omu kake, oratwara ebigo 10.’ 18Owa kabili nawe aija agamba ati, ‘Mukama wange, esarafu yawe emoi y'ezahabu ezaire ezindi itaanu.’ 19Mukamawe ati, ‘Naiwe oratwara ebigo 5.’ 20Aho ondijo nawe aija, ati, ‘Mukama wange, leba esarafu yawe niy'egi! Nkagikoma omu kitambara nagibiika. 21Nomanya nkakutina. Iwe oba mukuutu, oyanura eby'otayanikire, ogesha eby'otabibire.’ 22Mukamawe amugambira ati, ‘Ebyakuruga omu kanwa nibyo ndakuramuliraho, iwe mwiru mubi! Okamanya okwo mba mukuutu, nyanura ebyo ntayanikiire, nshuba ngesha ebyo ntabibire? 23Kubaki empiha zange otazitaire mu benki, nkagaruka nkazihyamu n'amagoba gazo?’ 24Nikwo kugambira ababaire bemeleire aho ati, ‘Esarafu egyo y'ezahabu mugimwake mugihe ow'esarafu 10.’ 25Bamugambira bati, (‘Rugaba, aina esarafu 10 z'ezahabu!’) 26‘Nimbagambira buli omoi aina ekyo ainakyo alyongerwaho. Kyonkai ataina kantu, balimwaka n'akainako. 27Kandi ababisha bange aba, abanyangire kubatwara, mubalete hanu aha mubanyitire omu maisho.’ ”

Yesu nataaha Yerusalemu omu kitinwa

(Mat 21:1-11; Mar 11:1-11; Yoh 12:12-19)

28Orwo Yesu yamazire kugamba ebyo, agendera kimo, Yerusalemu. 29Kayagobire Betifage na Betania aha Ibanga ly'Emizeituni, omu begesibwabe atumamu babili, 30nabaragira ati, “Mutahe omu kyaro ekibali omu maisho, murashangamu omwana gw'endogobe gusibikire, ogutakakubwagaho muntu, mugusibure mugundetere aha. 31Omuntu k'arababaza ati, ‘Mwagusibuliraki?’ Mumuhorore muti, ‘Omukama nagwetaaga.’ ” 32Abegesibwa ababaire batumirwe bagenda, babishanga okwo babaire batumirwe. 33Kababaire nibasibura omwana gw'endogobe, bakama bagwo bababaza bati, “Omwana gw'endogobe mwagusibuliraki?” 34Babahorora bati, “Omukama nagwetaaga.” 35Baguletera Yesu, abantu bagwaraho ebijwaro byabo, bagumukuubisa. 36Kayabaire agukuubire nagenda, abantu bara ebijwaro byabo omu muhanda. 37Kayailiire Yerusalemu aha busongoka bw'Eibanga ly'Emizeituni, embaga y'abegesibwa eshanduka, esingiza Ruhanga n'eiraka lihango aha rw'eby'amani ebyo babaire baboine, 38bati, “Ain'omugisha alikwija omw'ibara ly'Omukama! Emilembe eteeke omw'iguru, n'ekitinwa omw'iguru muno!” 39Abafarisayo bema omu mbaga bamugambira bati, “Mwegesa, tokabukira begesibwa bawe?” 40Yesu abashubamu ati, “Mbagambire, k'aba bakwesiza, amabare gakugamba gatanguka.”

Yesu nachulira Yerusalemu

41Orwo Yesu yailiire haihi ekigo kya Yerusalemu, yakichulira 42ati, “Izoba eli, Yerusalemu kawakumanyire ebyakukuleteire emilembe! Kyonkai mbwenu tolikushobora kubibona. 43Noija kugoberwa obukiro, ababisha bawe bakuzingoze orugo bakubunde, bakutange embaju zona, 44bakukunture ahansi hamoi n'abantu abakuturamu, tibalikusigamu ibare litembekejainyie na lindi, enshonga akanya k'okurokorwa kwawe tokamanyire.”

Yesu natemba Rwensinga

(Mat 21:12-17; Mar 11:15-19; Yoh 2:13-22)

45Yesu ataaha Rwensinga abanza kubingamu ababaire nibagulizamu, 46nabagambira ati, “Kikahandikwa kiti, ‘Enju yange eliba nju y'enshara;’ kyonkai inywe mugihindwire mpako y'abashuga.”

47Kwema aho ata kwegesa omuli Rwensinga buli kiro. Abakuhani bakuru n'abeegesa b'Amateka n'abanyiginya bamuhiganisa kumwita. 48Kyonkai eky'okukora tibakiboine, enshonga abantu bakaba nibashemelerwa muno ebigambobye.

Currently Selected:

Luka 19: RHAY01

Highlight

Copy