Luka 17

Okusiitaza banu

(Mat 18:6-7,21-22; Mar 9:42)

1Yesu agambira abegesibwabe ati, “Ebisitazo tibyakubura kwija. Kyonkai omuntu aliba ntabuko y'ebisitazo ebyo alibona! 2Hakili kayakukomirwe orubengo omu bikya bakamutokya omu nyanja, kushaaga okugyaho akasitaza abato abo. 3Mwelinde. Ka murumuna wawe arafakara, omuhane. K'arayechuza omugarulire. 4K'arakufakalira emirundi mushanju omushana gumoi, kandi akashuba akakwijaho emirundi mushanju yonene nagamba ati, ‘Nayechuza,’ noragirwa kumugarulira.”

Okwesiga

5Entumwa zishaba Omukama k'azongera okwesiga. 6Omukama azigambira ati, “Kamwakubaire mwina okwesiga buzima okwigaine enjuma ya Haradali, mwakugambiire omuti ogu muti, ‘Sinduka ogye oyemelere omu nyanja,’ mara gwakubahuliire.

Oburagirwa bw'omwiru

7“Nk'okwo muli halimu aina omwiru alikumulimira anga kumuliisiza entaama, ayakugambira omwiruwe ogwo arugire omw'ikora ati, ‘Yanguha oshuntame olye?’ 8Tabanze akamugambira ati, ‘Onchumbire ekyakulya kya bwaigoro, mara oyekome ongobye ebyo ndikwetaaga kuhika orwo ndamara kulya n'okunywa?’ 9Nasiima omwiruwe aha rw'okukora ebyo yamuragira? 10Kityo nainywe kutyo. Kamulimara kukora ebyo muragiirwe, mugambe muti, ‘Ichwe tuli bairu abatalikugasha; shana ekiliho twahikya oburagirwa bwaitu.’ ”

Yesu nakiza ababembe ikumi

11Yesu kayabaire nagya Yerusalemu, yaraba omu rubibi rwa Samaria na Galilaya. 12Kayatahire omu kyaro atanganwa ababembe 10. Bemelera haraimu kake 13batungika amaraka bati, “Yesu, Rugaba, batuganyire.” 14Kayababoine abagambira ati, “Mugende mweyoleke abakuhani.” Kababaire nibagenda bakira ebibembe. 15Omuli bonene omoi kayaboine okwo yakira, akubuka nasingiza Ruhanga n'eiraka lihango. 16Agwa Yesu omu maguru, amusiima. Mara akaba ali Musamaria. 17Nikwo Yesu kubaza ati, “Eikumi tilyakira bibembe? Isi omwenda balihai? 18Taliho n'omoi yagaruka kusingiza Ruhanga shana omunyamahanga ogu?” 19Aho agambira Omusamaria ogwo ati, “Imuka okwate omuhanda otahe; okwesiga kwawe kwakukiza.”

Ebilibaho omu biro by'amaheleruka

(Mat 24:23-28,37-41)

20Abafarisayo babaza Yesu amakiro ago obukama bwa Ruhanga buliiziraho. Abahorora ati, “Obukama bwa Ruhanga tibulikwija na bubonero bwa kubumanyiraho. 21Nangu kugir'oti baligamba bati, ‘Leba, buli aha!’ Anga, ‘Buli kulinya!’ Obukama bwa Ruhanga buli omuli inywe.”

22Amara agambira abegesibwa ati, “Ebiro biliija orwo muligonza kubona Omwana w'Omuntu, kyonkai timulimubona. 23Balibagambira bati, ‘Leba ali kulinya.’ Mutaligyayo handiki kubahondera. 24Nk'okwo orurabyo rurabya eiguru kwema rubaju oru kuturuka rubaju orusigaire hakabona, nikwo n'Omwana w'Omuntu alija. 25Kyonkai naragirwa kubanza kushasha nibamutura ebintu bingi, n'omuzarwa ogu gumwange. 26Okwo byabaire bili omu makiro ga Noa, nikwo biliba n'omu makiro g'Omwana w'Omuntu. 27Balyaga, banywaga, bashweraga, bashwerwaga, kuhika orwo Noa yatahire omu bwato, omutunga gwalemwa gwaija gwabaita bona. 28Kutyo okwo byabaire bili omu makiro ga Loti, balyaga, banywaga, baguzaga, baguraga, babyaraga, bayombekaga, 29Kyonkai kiro ekyo Loti yaruga Sodoma, omuliro n'obuganga bikaruga omw'iguru nk'enjura byabokya bona. 30Nikwo biliba bityo kiro ekyo Omwana w'Omuntu aliiziraho. 31Kir'ekyo omuntu aliba ali aha rushwi rw'enju, atalisongoka kwihya bintubye mu nju. Kutyo n'aliba ali omu ndimiro ataligaruka. 32Mwijuke muka Loti! 33Aliitanira oburora bulimufera, kandi aliferwa oburora alibubona. 34Mbagambire, omw'itumbi elyo baliba bali babili aha kitabo: Omoi balimutwara, ondijo asigareho. 35Abakazi babili balishangwa nibasa: Omoi bamutware, ondijo asigareho. [ 36Abashaija babili balishangwa bali omu ndimiro: Omoi bamutware, ondijo asigareho.]” 37Abegesibwa bamubaza bati, “Nkahai, Mukama?” Wenene abahorora ati, “Mbali omutumbi guliba guli, niho na kagoma ziliteranira.”

Currently Selected:

Luka 17: RHAY01

Highlight

Copy