Embandizo 4
4
Kaini na Abeli
1Adamu amanya Eva mukaziwe, atwara enda. Azara Kaini, agamba ati, “Omukama yambera nazara omwana w'omwojo.” 2Ashuba azara omurumuna Abeli. Abeli akaba ali mushumba w'entaama, kandi Kaini akaba ali mulimi. 3Ebiro kabyahingwireho Kaini aletera Omukama ekihongo aha byoyayelize. 4Abeli omu mizigaijo y'obuhyobwe aletaho omwana gw'entaama n'ebishaju byagwo. Omukama ashemelerwa Abeli n'ekihongokye. 5Aho Kaini anigara muno akabaraza n'obuso. 6Omukama abaza Kaini ati, “Kubaki onigaire? Isi kiki kukabaraza obuso? 7Kuba waba okozirege wakubaire noshemelerwa. Kyonkai k'olikukora kubi obufu bukuhuniire aha rwigi. Nibugonza kukukiza amani kyonkai noragirwa kubusinga.”
8Kaini agambira omurumuna Abeli ati, “Tuturuke aheru.” Orwo babaire bali aheru, Kaini achokera omurumuna Abeli, amwita. 9Aho Omukama abaza Kaini ati, “Abeli murumuna wawe alihai?” Ahorora ati, “Tindikumanya; inye ndi mulinzi wa murumuna wange?” 10Omukama amubaza ati, “Wakoraki? Obwamba bwa murumuna wawe bwemire omw'itaka nibuntakira! 11Mbwenu aha ensi eyanywa obwamba bwa murumuna wawe owo waita yakuraama. 12K'oragilimaga telikweleza kantu. Mara omu nsi omu olyenjera, oliba nyenjezi.” 13Kaini agambira Omukama ati, “Ekibonabonyio kyange kihango kushaga okwo nakukyemera. 14Leba kir'eki wambinga munu, wanchwa kanyenjera nkaba mbungezi omu nsi; mara wena wena aramboneraga okunyita.” 15Aho Omukama amugambira ati, “Tikwo, wena wena aliita Kaini alyehorozibwa emirundi mushanju.” Amutaho akabonero omuntu we na we na atalimubona akamwita. 16Aho Kaini aruga omu maisho g'Omukama, atura omu nsi ya Nodi#4:16 Nodi Nikwo kwenjera, nsi y'omwenjero. oburugaizoba bwa Edeni.
Oruzaro rwa Kaini
17Kaini amanya mukaziwe, atwara enda azara Henoki. Kaini ayombeka ekigo akyetelera eibara ly'omutabani Henoki. 18Henoki azara Iradi, Iradi azara Mehuyaeli, Mehuyaeli azara Metushaeli na Metushaeli azara Lameki.
19Lameki ashwera abakazi babili, omoi eibaralye ni Ada, ondijo eibaralye ni Sila. 20Ada azara Yabali; niwe ishenkuru abatungi b'ebitunganwa abatura omu mahema. 21Murumuna Yabali ni Yubali; niwe ishenkuru abatezi b'enanga n'emilere. 22Sila ogwo azara Tubalikaini omuhesi w'ebikwato byona by'omulinga n'ekyoma. Munyanya Tubalikaini akaba ali Nama.
23Lameki agambira bakazibe ati,
“Ada na Sila hulira eiraka lyange,
inywe baka Lameki huliliza ekigambo kyange.
Omuntu amputaize namwita,
omusigazi yantema namwihya aha mushozi.
24Ka Kaini araba ali w'okweholerwa emirundi mushanju,
aho alinyita alyeholerwa emirundi nshanju na mushanju.”
Okuzarwa kwa Seti na Enoshi
25Adamu ashuba amanya mukaziwe. Omukazi azara omwana w'omwojo, eibara amweta Seti, ati, “Ruhanga yampa omwana ondijo aha mwanya gwa Abeli owo Kaini yaisire.” 26Na Seti kwakwo azara omwana w'omwojo, eibara amweta Enoshi. Omu makiro ago abantu babanza kutakira Omukama.
Currently Selected:
Embandizo 4: RHAY01
Highlight
Share
Copy
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.