Embandizo 15
15
Endagano ya Ruhanga na Aburamu
1Ebyo kabyahoire, Omukama agambira Aburamu omu kubonekerwa ati, “Aburamu otatina, inye ndi ngabo yawe; emperwa yawe eliba nyingi.” 2Kyonkai Aburamu amubaza ati, “Waitu Mukama Ruhanga orantungaki? Kuba naikara ntaina mwana, omusika omwange ni Elieza owa Damasiko.” 3Ati, “Tiwantungire ruzaro. Omusika wange mwiru ayazaliirwe omwange.” 4Aho Omukama amugambira ati, “Ogu talikusikira. Mutabani wawe ow'oyezaliire niwe aliba musika wawe.” 5Amuturukya aheru amugambira ati, “Raramira eiguru, obare enyanyinyi k'oraba noshobora kuzibara.” Amara amugambira ati, “Nikwo na baijukuru bawe baliba bangi batyo.” 6Aburamu ayesiga Omukama. Omukama nawe ashemelerwa Aburamu, amusiima.
7Kandi amugambira ati, “N'inye Omukama ayakwihire Uri ey'Abakalidayo, ensi egi kugikuha obutaka.” 8Kyonkai Aburamu amubaza ati, “Waitu Mukama Ruhanga, ndamanya ntai okwo ndigitwara?” 9Ruhanga amugambira ati, “Ndetera enyana y'emyaka eshatu, emburabuzi y'emyaka eshatu, empaya y'entaama y'emyaka eshatu, ekiba n'entungurumaiba nto.” 10Ebi byona abimuletera. Ruhanga abyasamu kabili, buli rubaju arubyamika arulebeshainyie n'orundi, kyonkai ebinyonyi tiyabyasize kabili. 11Orwo ebihungu byatonyire aha mitumbi, Aburamu abibinga.
12K'eizoba lyatobeire Aburamu akwatwa oturo tw'amani n'obutini bungi. 13Aho Omukama amugambira ati, “Omanyire kimoi okwo baijukuru bawe balifurukira omu nsi etali yabo, mara baliba bairu, kandi baligingizibwa emyaka bikumi binai. 14Nawe eihanga lilibahindura bairu ndilibonabonyia. Ahanyuma orwo baliruga omu nsi egyo balija n'eitunga lingi. 15Kandi iwe wenene olifa omu milembe, olizikwa orujwi rwasindikire orundi. 16Baijukuru bawe ab'omuzarwa gwa kanai nibo baligaruka munu, enshonga Abaamori tinkababingiremu, orwo batakafakaire muno nkagoba aha kubabonabonyia.”
17Eizoba kalyabaire lyatobeire n'omwilima gwakwasire, leba orushwa rulikuchunka omwika, n'orumuli rulikurabagira bija biraba omugati y'ebichweka ebi. 18Kir'ekyo Omukama akora endagano na Aburamu nagamba ati, “Baijukuru bawe ndibaha ensi egi kwema aha Mwiga gwa Misiri kuhika aha Mwiga oguhango ogwa Efurati, 19ensi y'Abakeni, Abakenizi, Abakadamoni, 20Abahiti, Abaperizi, Abarefai, 21Abaamori, Abakanaani, Abagirigashi n'Abayebusi.”
Currently Selected:
Embandizo 15: RHAY01
Highlight
Share
Copy
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
