Zakaliya 7
7
Muwaha Mulungu si yakwendezwa no wuleka kulya wo wukoci
1Kukawa mu mwaka we kane, wa mu vilo vyo mutemi Daliyo, mwi'zuwa lye kane, na mu mwezi we licenda, mwezi wono wucemwaga ciselevu u Muwaha Mulungu yakanonjela ane Zekaliya yakatya. 2Wanhu wa ku Beteli wa wawatuma Shelezeleli na Legemumeleke, wanhu wawo, ku Nyumba yo Muwaha Mulugu we mihanga walombe wulugutizwe wo Muwaha Mulungu, 3kanyhi wawuze kuli wakohani ne wawizi i liwuzo ali, watye, “Alu cijendelele kulila mu nzila yo kuleka kulya, mu mwezi we hano kusoko yo wongomezwe we Nyumba yo Mulungu, nha vyono cetuma mu myaka minji yono yipulute?” 4Ayi yo nghani yo Muwaha Mulungu yono yanyiziza. 5Yakanonjela kanyhi yakatya wuwalonjele wanhu wa mu yisi hamonga ne wakohani vyono, lono walekaga kulya, akuno wa kulila mu mwezi we hano na wo mupunghati mu myaka yi yilya yose makumi mupunghati, wule, si yali nzila yo kulajila cogopo ca kuli'ne. 6Na lono walizaga wo kung'wa wali so wiyendeze wawo weneco du. 7Zizi zo yalonda Muwaha Mulungu, mu milomo ye wawizi walongozi mu vipango vyono na Yelusalemi, likaya lyono lyelile, lyali likali lina no lukumyo, kanyhi limemile ne wanhu. Na lono wanhu wali wenji, wono wekalaga mu makaya, gono gali galipilime likaya, sunga na mu zi'si za kutakama, na mu mwalambalo wa mu matunda ga ku lubavu lwa ku mwezi.
Wu wula cihuliko, yo soko yo wuhamywe wuhamywe
8Hobaho Muwaha Mulungu yakamulonjela Zekaliya yakatya, 9“Ane nawapela i wanhu wangu malajilizo gaga, ku wulawa katali, nghawatya, ‘Ale, mulanjilile mwitume ze ling'ani, kanyhi mweze mwina wendo no lusungu, kuli munhu no muyagwe. 10Mulece kuwawonela wafwile, hamba wana wono wasina walezi, hamba wajenzi wono mwikalane nawo, hamba munhu wo wose mono yali mu wanjile. Kanyhi mulece kuleta mahweso mabi go witamise munhu na muyagwe.’ 11Ninga i wanhu wangu wangu wakawa wali cibede siwakasaka hamba no kuhuliciza, wakadinda ne makutu gawo ho walece kuhulika, 12wakakamufya ne zinhumbula zawo zikawa nghamu ku wuhulice. Na vyono si wasaka no kugahuliciza ne mafundo, gono nawapelela muli wawizi we katali, hodu, nane nghawakolelwa muno likuwo. 13Alu vyono siwahuliciza zangu, holeka nane sinawapitula no wulombe wawo. 14Na ku soko yiyo holeka nghawafwagula, no kuwawinjila ku zi'si zo wujenzi. Ne yisi ayi swanu, yikekala nyhiwa musina munhu mono yasigala yekale mumu.”
Currently Selected:
Zakaliya 7: LLKWW
Highlight
Share
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
