Luka 20

Muli zo wulajilize wa Yesu

(Mat 21:23-27; Mlk 11:27-33)

1Kukawa mwi'zuwa linji, lono yawejizaga wanhu mu Nyumba yo Mulungu, no kuganula Luganuzi Luswanu, Wakohani wawaha ne wejizi wo Wulajilize ne wanyamhala wakamuziza, 2wakatya, “Wucilonjele ta! Wukuzinoza zizi ko wulajilizeci?” 3Yesu yakawatya, “Nane nomuwuzenyi nghani monga, 4u wulajilize wa Yohana wo kubaputiza, walawa kuli Mulungu hamba kuli wanhu?” 5Wakanza kulongana weneco wose wakatya: “Hono citye walawa ku wulanga, mwene kotya, ‘Alo so cici si mwamwihuwila?’ 6Na hono citye, walawa kuli wanhu, wanhu wose wocitowanga ne mabwe, hambi wose nha wehuwiye vyono Yohana yali muwizi.” 7Hodu, wakamutya, “Sicimanyile wulajilize wuwo kono walawa.” 8Nayo Yesu yakawatya, “Hamba na nene si nomulonjelenyi, ko wulajilizeci wono wukuleka nghunoza zizi.”

I cihwanicizo co mugunda we Mizabibu ne walimi

(Mat 21:33-46; Mlk 12:1-12)

9Yesu yakajendelela kuwalonjela wanhu cihwanicizo cici. “Munhu yunji yalima mugunda wa mizabibu, yakawika walimi, mwene yakabita ku yisi yinji ya kutali, yakekala kuko vilo vinji. 10Mwipango lyo wupilo we mizabibu, yuyo munhu yakatuma mwitumami wakwe kuli wawalya walimi, wamupele mikalo ya mu mugunda we mizabibu, ninga walimi wakamutowa, wakamuwinga yali bwete. 11Yuyo munhu yakatuma mwitumami yunji kanyhi; nayo wakamutowa nhavivilya no kumutendela vibi, wakamuwinga yali bwete. 12Yakatuma sunga na we kadatu; nayo wakamutamisa no kumutaga kunze.” 13Ayulya munya mugunda yakehwesa; “Alu notenda wule? Nomutuma mwanangu mwendece, lunji yuyo womogopa.” 14Ninga walimi waza muwona, wakalongana weneco wose, wakutya, “Ayu yo muhazi, alenyi 'nye cimuwulaje, wuhazi wuwe wetu.” 15Wakamulavyaniza mu mugunda we mizabibu, wakamuwulaga. Yesu yakawawuza, “Alu u munya mugunda konoza nhawule kuli wawo walimi? 16Kolokuza yawawulaje walimi wawo, no mugunda we mizabibu, kopela walimi wanji.” I wanhu waza kuzihulika i zinghani zizo, wakabeza wakatya, “Siyosumika hamba hadodo.”

17Ninga Yesu yakawalanga, yakawatya, “Mandiko gaga gono Gelile, alu gena nhunizo ci?

‘Ilibwe lyono walilema Wazenji,

Alu lyonozwa kuwa yiwaha lyo musinji!’

18Munhu wo wose mono kogwila mucanyha ye libwe lilyo, kobenanjika-benanjika, na hono limugwile munhu wo wose, lyomutijinha tici-tici.”

I Nghani yo kulipa kodi

(Mat 22:15-22; Mlk 12:13-17)

19I wejizi wo Wulajilize ne Wakohani wawaha, wakatanga vyono cihwanicizo cici, cali ciwadomile weneco, na ku soko yiyo, wahilaga wamwibate baho baho, ninga wakogopa wanhu. 20Holeka wakawa wakulondola-londola cilejeho cono cikwiliye. Wakawafupa wanhu wanji, wenoze nha wanhu waswanu, wakawa kuwatuma wabite wamugwizize Yesu mu wulonje wakwe, ho wasume kumwibata no kumutegula ku wawaha we Selekali. 21Wawo watandizi, wakamuwuza wakutya, “Ati Mwijizi, cimanyile vyono wukulonga kanyhi wukwijiza nghani ze mbeka; cimanyile vyono si kulangaga lilumbo lya munhu, langa kwijizaga mu mbeka nzila yo Mulungu. 22Ale cilonjelaje ta, hono viswanu kuli ase kumulipa kodi Kayisali, hamba ng'o?” 23Ninga Yesu yakatanga wusugu wawo, yakawatya, 24“Ndajilenyi pesa, wulenyi, yina hwani ya nani no lwandiko lwa nani?” 25Nawo wakatya, “Vya Kayisali.” Yesu yakawatya, “Ale mumulavizye Kayisali vyakwe Kayisali, no Mulungu vyakwe Mulungu.” 26Hamba si wasuma kumugwiziza nghani yiyi baho hali wanhu, holeka wakanyamala twii, wakwizina lipitulo lyakwe.

I nghani yo wuzuce

(Mat 22:23-33; Mlk 12:18-27)

27Hanyuma, Wasadukayo, wawo wono watezaga, wafu si wazukaga; wakamuziza Yesu wakamuwuza wakutya. 28“Ati Mwijizi, Musa yacandicila, vyono munhu hono yafwilwe no muwahawe mono yali yatolile mugolece, no kumuleka mugolece yuyo yasina wana, u mwanakwawe yamutole yuyo mugolece ho yamutujile muwahawe wana. 29Ale, kwali na wanhu mupunghati walume, wana wa munhu yumonga, u mulongozi yakatola mucekulu, hanyuma yakafwa si yaleka mwana. 30Nayo wekejete [yakamutola mucekulu yuyo, nayo yakafwa,] 31na we kadatu nhavivilya. Zikawa nha vivyo sunga kuli wose vyono wali mupunghati, na wose wakafwa hamba kuleka wana. 32Hanyuma u mucekulu yuyo nayo yakafwa. 33Alu mwizuwa lyono wafu wolozuka, mucekulu yuyu kolowa mugolece wa wahayi muli wawa? Hambi wose mupunghati nha wali wamutolile.”

34Yesu yakawatya, “I wanhu wa kononze yiyi, watolaga, watolwaga, 35ninga awalya wono Mulungu kowapela kulificila lizuwa lyo wuzuce we wafu, si wolotola hamba kutolwa. 36Na mbeka hamba si wolofwa kanyhi yaye, hambi nha wokwihwana ne wamalayika; nawo wo wana wo Mulungu, vyono wazukulwa kulawa mu wafu. 37Ninga wafu vyono wazukaga, sunga na Musa yayilajila nghani yiyo mu Mandiko gono Gelile, za ha cititika cono cakaga moto, lono yakumucema Muwaha, yakumutya, u Mulungu wa Abulahamu, Isaka na Yakobo. 38Holeka mwene si Mulungu we wafu, langa Mulungu wa awalya iwomi. Hambi wose nha wakuwumipila muli mweneco.”

39Wanji wa muli Wejizi wo Wulajilize wakatya, “Mwijizi, kulonga viswanu muno muno.” 40Hamba si wejelela kumuwuza nghani yinji kanyhi.

I nghani ya Kilisito

(Mat 22:41-46; Mlk 12:35-37)

41Yesu yakawawuza, “Nhawule yikutegwa vyono Kilisito yo mwana wa Dawudi? 42Hambi Dawudi mweneco nha yakulonga mu citabu ce Zabuli,

‘U Muwaha yamutya Muwaha wangu

Wikale ha muwoko wangu wo kulume,

43Sunga kolo nghuwanoza iwalugu wako wawe nha

yigoda lyo kuwicila migulu yako.’

44Dawudi vyo yakumucema mwene, ‘Muwaha,’ alu ho kawa mwanagwe nhawule kanyhi?”

Yesu yakuwakaga wejizi wo Wulajilize

(Mat 23:1-36; Mlk 12:38-40)

45Ne wanhu wose lono wali wamuhulicize, Yesu yakawalonjela wejizwa wakwe, ha mwande ye wanhu wose, 46“Musuguce kuli wejizi wo Wulajilize wono wendile kujenda ako na ako wavwalile kanzo. Na kanyhi wendile kulamuswa kwa cogopo ne wanhu mu zisokoni, kanyhi wendile kwikala hanhu hatambule, mu matang'anilo go wuhembelo, no kwikala hanhu hatambule ha zindigwa ze zisikukuu. 47Wene wakuwewonela iwacekulu wafwile, no kuwasolela ivinhu vyawo, akuno wakwinoza nha waswanu, so wulomba wulombe wutali muno ko wukoci. Wawo wotuga wulipicizwe wuwaha muno muno mwizuwa lye ning'aniza.”

Currently Selected:

Luka 20: LLKWW

Highlight

Copy