Luka 16

I Cihwanicizo ca Kalani musugu

1Yesu yakawalonjela wejizwa wakwe, “Kwali na munhu yunji mugoli, mono yali yena mwitumami wakwe; yuyo mwitumami yakasonjezwa vyono yakwitumamila caka sawo yo mugoli. 2Nayo mugoli yakamucema, yakamutya, nghanici yiyi yono hulice muli gwegwe?” Ale wulavye liwalo lya vyono kubocelaga, na vyono kwitumamilaga mu sawo yangu, hambi nha si kosuma kuwa kalani kanyhi. 3Mwitumami yakehwesa mu nhumbula yakwe, alu muwaha wangu yeza kumbusa mu mulimo wo wukalani, alu nonoza cici? Vilungo vyo kulimila sina; ku wilombelezi nako kotya nili muciwa, yo nghani ya cevu. 4Aa! Alu namanya vyono notenda, kolo nawuswa mu mulimo, wanhu ho wanyhemele mu zinyumba zawo.

5Ale, yakawacema we migawa yo mutwawe wose, yakamutya mulongozi, “Wukuzijilwaci no mutwa wangu?” 6Nayo yakatya, “Mapipa yigana limonga ga mafuta ga alizeti.” Kalani yakamutya, “Sola ceti cako co mugawa, wikale mbela wandice makumi mahano.” 7Yaza kondya, yakamutya yunji, “Agwe ma nagwe, wukuzijilwaci?” Nayo yakatya, “Magunila yigana limonga ga wuhemba.” Kalani yakamutya, “Sola ceti cako co mugawa, wandice makumi munana.” 8Yuyo muwaha, yakamukumya yuyo mwitumami mono si mwihuwilwa, vyono yanoza ko wusugu. Hambi wanhu wa kononze yiyi, nha wasugu muno kuli zawo si nhe wanhu wo wuzelu.

9Nayo Yesu yakajendelela kutya. “Nane nghumutyenyi, Mwinozeze wayendi wayenyu mu wulawa mu zisawo zimbi za mononze, kolo yikumalika, ho wamubocelenyi ku wikalo we cibitilila.” 10Wo wose mono kowa mwihuwilwa mu nghani ndodo muno, yo kowa mwihuwilwa na mu nghani mbaha, na wo wose mono si mwihuwilwa mu nghani ndodo, si kowa mwihuwilwa mu nghani mbaha. 11Ale, hono si muli wehuwilwa mu zisawo zimbi za mononze, nani 'mbi mono komukozenyi zisawo ze mbeka? 12Na hono mukali nawa wehuwilwa mu sawo yono si yenyu, yo nani mono komukozenyi i zisawo ze mbeka? 13“Hasina mwitumami mono kosuma kuwetumamila watwa wejete, ku soko, lunji komusula yumonga na kumwenda muyagwe, hamba komuhulika yuyo yumonga no kumubedegala u muyagwe. Holeka si mosuma kumwitumila u Mulungu ne sawo.”

U wulonje wunji wunji wa Yesu

(Mat 11:12-13; 5:31-32; Mlk 10:11-12)

14Ninga Wafalisayo wali weza kuzihulika zizo zose, vyono wene wali wendile muno sawo, wakamubedegala Yesu. 15Nayo yakawatya, “Anye mwinozaga muli waswanu ha meso ge wanhu, ninga Mulungu yo yazimanyile zinhumbula zenyu, hambi cono cijelaga cina lukumyo hali wanhu, Mulungu yakuciwona nha takataka du.” 16U Wulajilize ne mandiko ge wawizi, vyali vili baho, sunga mwidaha lya Yohana u Mubaputizi, vyono wulawa lululya u Luganuzi Luswanu lo wutemi wo Mulungu lukuganulwa, no munhu wo wose yakuwinjila kwe vilungo. 17Ninga kupelu wulanga ne yinze kuwumalice, si nha lwandiko lumonga lwa mu Wulajilize kupatwa. 18Muli wose mono yakumuleka mugolece wakwe, no kutola yunji, yakusenyha, nayo mono yakumutola mono yapejigwe talaka no mulume wakwe, nayo yakusenyha.

U Mugoli na Lazalo

19Ale, kwali na munhu yunji mugoli, yavwalaga myenda yo wuguzi wukamu muno, myenda ye liwala lyo lugandu na bafuta swanu. Yekalaga yakumota vilo vyose. 20Hali ho yuli muciwa yunji, litagwa lyakwe Lazalo, mono yali yena vilonda mu muwili wose, nayo yali yawicigwe ha mulango wa yuyo mugoli. 21Yasulumilaga yapegwe vifukufuku vyono vyagwizaga ha wulilo wo mugoli, sunga ne mabwa, gazaga gakumunamha malonda gakwe.

22“Baho u muciwa yakafwa, wamalayika wakamusola, yakekala behi na Abulahamu, u mugoli nayo yakafwa, yakawikwa mu citenjelo. 23Yuyo mugoli, lono yali yali mu wusungu wukali kuko ku hanhu ha myuhe ye wabi, yakenula meso gakwe, yakamuwona Abulahamu, na Lazalo yali behi nayo, 24Yakacema yakatya, ‘Baba Abulahamu, wumbonele lusungu ye, wumutume Lazalo, yazabice hambe cisonje ce cidole cakwe mu malenga, yamhoze lulimi lwangu; hambi nha nghuwona wusungu mu moto wuwu.’ 25Ninga Abulahamu yakatya, ‘Mwanangu, wukumbucile vyono, lono agwe wali wukali mumi, wamotaga vyako viswanu, na Lazalo yakabocela i vibi, ninga lu baha mwene mutuzwe, nagwe wuli mu wusungu. 26Na muli zizi zose, hagati yetu na nyenye, lyawikwa likombo yitali muno, ho walece kusuma kulowoka, wakulawa akuno no kuza kuko kwenyu, hamba wa kuko kulowoka kuza kono kwetu.’ 27Yuyo mono yali mugoli, yakatya, ‘Heya baba, ale nghukulomba, wumutume Lazalo yabite ku kaya ya Baba, 28hambi nha nina wanakwetu wahano; yakawasugule, walece kuza nawo hanhu hano ha wusungu.’ 29Ninga Abulahamu yakatya, ‘Wanduguzo, wena nawo wa Musa ne Wawizi, wawahulice wawo.’ 30Ninga mwene yakatya, ‘Ng'o ye baba Abulahamu; langa hono yabite yunji kuli wene mono yazucile mu wafu, wonena.’ 31Nayo Abulahamu yakatya, ‘Hono walece kuwahulika Musa ne Wawizi, hamba yunji yenuce mu wafu, si wokwihuwila yaye.’ ”

Currently Selected:

Luka 16: LLKWW

Highlight

Copy