Hagayi 2

U wuswanu we Nyumba 'mhya yo Mulungu

1Mwi'zuwa lye makumi mejete na monga, lyo mwezi wo mupunghati, mu mwaka wuwo, Muwaha Mulungu yalonga kanyhi mu nzila yo muwizi Hagayi. 2Yakamulonjela Hagayi, yalonje na Zelubabeli u mulongola we yisi ya Yuda, na kuli Yoshuwa Mukohani Muwaha, na kuli wanhu, yawalonjele yatye. 3“Wulenyi, koyuli yunji muli'nye mono yakumukumbucila wuswanu we Nyumba yo Mulungu vyono wali winha? Alu ninga wulenyi, mukuyiwona yinha wule zuwali? Yidahile kwijela nha cinhu ca caka caka du. 4Ninga hamba nhavivyo, yunji yalece kutukuwika mutima. Langa anye mwitumaje du mulimo muhidimbaye, hambi ane nha nili hamonga nanye. 5Nanye lono mwawukaga ku wulawa Misili, ane nghamwihuwizenyi nha vyono cipango cose nowa hamonga nanye, sunga nalu ane nghali nili hamonga nanye. Holeka mulece kogopa.

6“Hanyuma nosinjisa wulanga ne yinze, yisi ne lilenga. 7Nane nogacicimya makungugo gose, no wugoli wawo wose, wolosolwa no kuletwa bahano, ne Nyumba yo Mulungu yolomemywa no wugoli. 8Fweza zose na zahabu za mono yinze, nha zangu. 9Nyumba 'mhya yo Mulungu, yolowa swanu muno muno kuciza yinongozi. Nane baho nolowapela wanhu wangu wumoteswe no mulamu.” Vyo yakutya Muwaha Mulungu we Mihanga.

I wanhu wose wavufywe

10Mwi'zuwa lye makumi mejete na yine, lyo mwezi we licenda, mu mwaka we kejete wo wutemi wa Daliyo, u Muwaha Mulungu kanyhi yalonga kuli muwizi Hagayi. 11Yakatya, “Wuwawuzaje ta Wakohani wulajilize vyono wukutya mu nghani ayino. 12Hono munhu yunji yasole nyama yono yelile ku wulawa mu cikumbicilo, no kuyidinghula mwi'mhembo lyo mwenda wakwe. Na hono yaleceleze mwenda wakwe wupamize mukate, hamba ndigwa yono nhelece, hamba divayi, hamba mafuta ge mizeyituni, hamba ndigwa yo yose, wule! Ndigwa yiyo nayo yowa yanozwa yelile?”

Ne liwuzo lilyo lyali lyeza kuwuzwa kuli wakohani, nawo i wakohani wakatya, “Aa ng'o si yonozwa yelile.” 13Hanyuma Hagayi kanyhi yakawawuza yakutya, “Ma, hono yiwe munhu yeyavufya ku soko yo kuwupamiza muvimba. Na hono yapamize cinhu co cose ca muli zindigwa zizo, wule, kowa yazitajila wavufywe zindigwa zizi?” Nawo i wakohani wakapitula wakatya, “Heya, kowa yavitajila wavufywe.”

14Hobaho Hagayi yakawatya, “U Muwaha Mulungu yakutya, azi vyo zinha kuli wanhu we likungugo lili, na kuli vilimwa vyose vyono wakuvilima, na kuli vinhu vyose vyono wakundavizya mu cikumbicilo, vyose vyakondya kwavufywa.”

Muwaha Mulungu yakuwehuwiza wulugutwe wakwe

15Muwaha Mulungu yakutya, “Ma, simwawona zono zejela kuli'nye?” Lono mwali mukali nanza kuyizenga kanyhi Nyumba yo Mulungu, 16mwabita ku migunda kududula wuhemba, akuno mukulanjilila vyono motuga kilo magana mejete, ninga wono wali wuli baho, wali kilo yigana limonga du. Kanyhi mwabita ho muneje divayi lita yigana mu zinjilo, ninga mwatuga lita makumi mane du. 17Nategula mbeho yono yanyaza, ne mvula ye mabwe, yikavihodanga vinhu vyose vyono mwahilaga kuviwilusa. Ninga hamba nhavivyo, si mwanena yaye. 18Zuwali lye 'zuwa lye makumi mejete na yine, lya mu mwezi we licenda, ku wulawa lizuwa lyono musinji we Nyumba yo Mulungu wakondelecela. Alu mulanjilile cono cokwijela ku wulawa lulu sunga hanyuma yayo. 19Hamba nha yiwe aluno musina wuhemba wono wusigaye mu madongha genyu, ne zizabibu, ne mikuyu ne mikomamanga, ne mizeyituni nayo si yikulela, ninga ku wulawa lulu, ane nomulugutizenyi.

Wihuwizo wo Muwaha Mulungu kuli Zelubabeli

20Mwi'zuwa lilyo lye makumi mejete na yine, lyo mwezi, Muwaha Mulungu yamupela Hagayi nghani lwe kejete. 21Yabite yakamulonjele Zelubabeli u mulongola we yisi ya Yuda yamutye, “Ane nowucicimya wulanga ne yisi, 22kanyhi nowuwusa no wutemi wose, no kuvidumya vilungo vyayo. Noyibidusa mituka yawo yo wulugu, hamonga na wono wakuyijendya. Zifwalasi nazo zofwa, hamonga na wono wakuzijendela, wokwiwulaga weneco wose. 23Mwi'zuwa lilyo, nokusola agwe Zelubabeli go mwitumami wangu, nokuhagula wuteme mwi'tagwa lyangu. Hambi nha yo gwegwe du mono nghuhaguye.” Vyo yakutya Muwaha Mulungu we Mihanga.

Currently Selected:

Hagayi 2: LLKWW

Highlight

Copy