Maluko 5

Yesu yakumuponya munhu we licisi lyavu

(Mat. 8:28-34; Lk. 8:26-39)

1Ale, wakafika ku nhumbi nzagwe ye lilenga, muʼsi ye Wagelasene. 2Yesu yaza kutima mu ngalawa, hobaho viketangʼanila na munhu yunji mono yali yena icisi lyavu, yakulawa ku vitenjelo. 3U munhu yuyo yekalaga mu vitenjelo, hamba hasina munhu mono yasuma kanyhi kumuwopa ne manyolo. 4Hambi nha kali kenji wamuwopaga ne zipingu hamonga ne manyolo, ninga mapango gose yasumaga kugadumula manyolo gago, no kuzibenanga zipingu zizo, hamba hasina munhu mono yasuma kumwimila. 5Na mu misi ne cilo, yekalaga mu vitenjelo, na mu matunda, yakuzoza no kwidemulanga ne mabwe.

6Nayo yaza kumuwonela Yesu kutali, yakamumanyhilila, yakamuhemba, 7akuno yakulonga kweʼzi waha yakutya, “Gwe, Yesu, go Mwana wo Mulungu Mono yalawiliciye, alu wina nghanici nane? Mwitagwa lyo Mulungu, nghulomba ulece kungaza!” 8(Nayo yalonga nha vivyo vyono Yesu yali yamulonjela yatya, “Go licisi lyavu, wulawile muli munhu ayu.”)

9Holeka Yesu yakamuwuza, yakutya, “Alu litagwa lyako gwegwe nani?” Nayo yakapitula, yakutya, “Litagwa lyangu nene ‘Itewa’ hambi ase nha cili wenji.” 10U munhu yuyo yakamunena Yesu, yalece kugawinga gago macisi mavu muʼsi yiyilya.

11Ale kwali neʼtewa yiwaha lye zingubi likudima ha mwejelele we litunda. 12Ale, imacisi gago gakamunena, gakutya, “Ucitegulaje ku zingubi zizo, cikenjile muli zene.” 13Nayo yakagakombola. Ale, gago macisi mavu gakalawila, gakenjila mu zingubi zizilya. Ne litewa lyose lye zingubi elufu nyejete likavulumucila he weta sunga zikenjila mwilenga, no kufwila mumo.

14Nawo wadimi we zingubi zizo wakatiza, wakayiganula i nghani yiyo kwi kaya na mu migunda. Iwanhu wakaza ho wawone nyhici yono yiweye. 15Wakamuziza Yesu, wakamuwona no munhu yuyulya mono yali yena litewa lye macisi yekaye hasi, yavwalile ne myenda, yena ne mahala gakwe, yatulile, nawo wakogopa muno. 16Ne wanhu wono waziwona zizo, wakawaloloseza wanhu wanji vyono yimuweye u munhu mono yali yena macisi, na ze zingubi zizilya. 17Nawo, wakanza kumunena yawuce muʼsi yawo.

18Na lono Yesu yenjliaga mu ngalawa, u munhu yuyulya mono yali yena imacisi, yakamunena yawezane nayo. 19Ninga Yesu siyamuvumila. Langa yakamutya, “Ubite ku kaya yako, ku wanduguzo, ukawalonjele zimbaha zose zono u Muwaha yakutendeye na vyono yakuwoneye lusungu.” 20Ale, munhu yuyo yakabita, yakanza kuganula kuko ku Dekapoli i zimbaha zose zono Yesu yamutendela, ne wanhu wose wakezina muno muno.

U muhinza wa Yayilo no mucekulu yunji, wakuponywa

(Mat. 9:18-26; Lk. 8:40-56)

21Nayo Yesu yakalowocela kanyhi mu ngalawa ku nhumbi nzagwe ye lilenga. Ne lipuga yiwaha lye wanhu likekongholela ha mwande yakwe, nayo yakawa yemile ha nhumbi ye lilenga. 22Baho yakaza yunji wa muli wawaha we nhangʼanilo yo wuhembelo, itagwa Iyakwe Yayilo. Nayo yaza kumuwona Yesu, yakagwa hamwande ye magulu gakwe, 23yakumunena muno yakutya, “Umuhinza wangu mudodo yatamigwe, yali behi no kufwa. Cibite nghukunena, wukamuwicile miwoko yako, ho yapone no kuwumipa!” 24Ale, Yesu yakabitana nayo. Ne liwuta yiwaha lye wanhu likamutyatya, likawa limufinhile mbavu zose.

25Na muli wene mwali moyuli mucekulu yunji mono yali yena wutamwa wo wuzaze we sakami kwa myaka ikumi na myejete. 26Umucekulu yuyo yali yagazika muno ne waganga wenji. Na hamba yawe yali yakondya kwitumamila sawo yakwe yose so wulagulwe, ninga siyatuga ciba hamba hadodo, langa wutamwa wakwe ho wukacila kuwa wubi muno muno. 27Yali yakondya kuzihulika zinghani za Yesu, holeka yakaziza ku mugongo wa Yesu, yakekokomeza mu mwinji we wanhu wono wali wumufinhile Yesu mbavu zose, 28akuno yakwiyitya. “Hono mhamize civwalo cakwe du, nopona.” 29Hodu yakawa kucipamiza i civwalo ca Yesu, no wuzaze wakwe we sakami, wukawa kuduma lwa kamonga, nayo yakehulika mu muwili wakwe nha vyono yaponywa wutamwa wakwe. 30Nayo Yesu yakamanya kamonga vyono vilungo vya muli mwene vyalawa. Ale, yakalipitucila lipuga lye wanhu, yakawuza, yakutya, “Alo nani mwene mono yamhamize i civwalo cangu?” 31Iwejizwa wakwe wakamutya, “Wukuwona vyono wanhu wenji wakufinhile mbavu zose, alu nhawule wukuwuza wukutya nani mwene mono yakupamize?”

32Ninga Yesu yakajendelela kulanga langa kose kose ho yamuwone yuyo mono yanozize nha vivyo. 33Baho umucekulu yuyo, vyono yali yamanyile zono zimuweye, yakaza akuno yakucicima so woga, yakagwa hamwande ya Yesu no kulonga ze mbeka zose. 34Nayo Yesu yakamutya, “Go muhinza, wihuwilo wako wukuponya. Wubite wupolile, no wutamwa wako wuponele lukulu.”

35Na lono Yesu yali yakali yakulonga, iwanhu wakaza kulawa ku kaya yo muwaha we nhangʼanilo yo wuhembelo, wakamutya, “Umuhinza wako yakondya kufwa. Alu nhawule wukali wukumugaza Mwijizi?”

36Ninga Yesu hamba siyacelelela cono walonga, langa yakamutya muwaha we nhangʼanilo yo wuhembelo, “Wulece kogopa, wihuwile du.” 37Hamba siyaleka munhu yunji wo wose vibitane nayo, langa Petelo du, na Yakobo na Yohana u mwanakwawe wa Yakobo. 38Wakafika ku kaya yo muwaha we nhangʼanilo yo wuhembelo, nayo Yesu yakahulika izozo, cililo ne vitalo. 39Yakenjila ku gati, yakawatya, “Alu nhawule mukuzoza no kulila? U muhinza nha siyafwiye yaye, langa yagonile du.” 40Ninga wene wakamuseka. Nayo, yakawalavyaniza wose kunze, yakawasola usogwe no nyina wo muhinza yuyo, hamonga na wawalya iwejizwa wakwe, wakenjila kugati kono kwali kowuli u muvimba wo muhinza yuyo. 41Yesu yakamwibata muwoko, yakamutya, “Talita kumi.” Nhunizo yayo, “Go muhinza nghukulonjela, winuce!” 42Lo lulolulo umuhinza yakenuka, yakanza kujenda. (Yali yena myaka ikumi na myejete.) Baho, iwanhu wakezina muno muno kuciza. 43Nayo Yesu yakawakongʼonheza muno, walece kuyitandaza inghani yiyo kuli wanhu. Hanyuma yakawa kuwalonjela wamupele muhinza zindigwa.

Currently Selected:

Maluko 5: GOG91

Highlight

Copy