Matayo 9
9
Yesu yakumuponya u munhu mono yadejepe
(Mlk. 2:1-12; Lk. 5:17-26)
1Yesu yakenjila mu ngalawa, yakalowoka lilenga, yakabita mwitumbi lyakwe. 2Na baho, iwanhu wakamuletela munhu yumonga mono yali yadejepe u muwili wakwe, yali yagonile mu citanda. Nayo Yesu yaza kuwuwona u wihuwilo wawo, yakawa kumulonjela yuyo u munhu mono yali yadejepe, yakamutya, “Ale wisindamikaje mwanangu! Kunenelwa u wubi wako.” 3Wanji wa muli wejizi wo Wulajilize, wakawa kwanza kwihwesa wakutya, “U munhu ayu yakumutovula u Mulungu!” 4Nayo Yesu yakagamanya i mahweso gawo, yakawatya, “Alo so cici mukwihwesa zimbi mu zinhumbula zenyu? 5Alu ya hayi yono mhelu, yo wutya, ‘Kunenelwa uwubi wako’, hamba yo wutya, ‘Winuce wujende?’ 6Aluno nghusaka anye mumanye vyono u Mwana wo Munhu yena wulajilize wo kuwanenela iwanhu wubi mononze.” Baho yakawa kumutya u munhu mono yali yadejepe, “Winuce, wudinghule icitanda cako wubite ku kaya yako.” 7Ale, u munhu yuyo mono yali yadejepe, yakenuka, yakabita ku kaya kwakwe. 8Ne wanhu wose wono wali wali mwipuga lilyo, waza kuziwona zizo, wakezina muno akuno wakogopa, wakamukumyo u Mulungu mono yawapelile wanhu ivilungo vinha vivi.
Matayo yakucemwa
(Mlk. 2:13-17; Lk. 5:27-32)
9Yesu yakawuka kuko, na lono yajendaga mu nzila yakamuwona munhu yunji mono kacemagwa itagwa lyakwe, Matayo, yali yekaye mu hofisi yakwe yo wutowezezo we kodi. Yesu yakamutya, “Wunhyatye.” Nayo Matayo yakenuka yakamutyatya.
10Nayo Yesu lono yali yekaye mu nyumba yakulya zindigwa, iwatoweza kodi wenji, hamonga ne wanyo wubi, wakaza, wakekala hamonga nayo, hamonga ne wejizwa wakwe. 11Nawo i Wafalisayo waza kuziwona zizo, hodu wakawa kuwalonjela iwejizwa wakwe wakutya, “Alu nhawulenyi u Mwijizi wenyu yakulizana, hamonga ne watoweza kodi ne wanyo wubi?” 12Yesu nayo yaza kuwahulika, yakawatya, “Iwatamwa, wo wasakaga muganga, hamba si awalya iwaswanu. 13Holeka mwiyijizizaje mu nhunizo ye zinghani azino, ‘Ane nghusaka lusungu du, hamba si makumbiko.’ Hambi ane nha si naza ho niwaceme iwanhu waswanu, ngʼo, langa iwanhu wabi.”
Kuli zo wuleka kulya
(Mlk. 2:18-22; Lk. 5:33-39)
14Hanyuma i wejizwa wa Yohana u Mubaputizi, wakamubitila Yesu wakamuwuza wakutya, “Ase sunga ne Wafalisayo, cilekaga kulya kali kenji, Alu nhawule i wejizwa wako si wakuleka kulya?” 15Yesu yakawapitula yakatya, “Alu mukwihwesa wono walalikwe ku halusi wosuma kulila, lono bwana halusi yakali yali hamonga nawo mbi? Aa, ngʼo, langa icipango cofika cono bwana halusi kowuswa hali wene, ale mu cipango cico langa, ho woleka kulya.
16“Iwanhu si wawicilaga icilaka co mwenda u mupya, mu civwalo cihuma. Hambi icilaka cico nha cowudemula wuwo u mwenda muhuma, na baho hono hali hademuce, nhondo ho hokonjelezecela lukulu. 17Hamba iwanhu si watajilaga divayi yimhya mu mifuko ye zinyhingo zihuma. Na hono wanoze nhavivyo, imifuko yodemuka, ne divayi yomwajika, ne mifuko nayo yohodanjika. Ninga si yili nhavivyo, langa iwanhu watajilaga divayi yimhya, mu mifuko ye zinyhingo zimhya, navyo vyose vyono vyejete, divayi ne mifuko vyokwikala vitelevu.”
I cihinza co muwaha yunji hamonga no mucekulu yunji wakuponywa
(Mlk. 5:21-43; Lk. 8:40-56)
18Nayo Yesu lono yalongaga zizo, yakaza muwaha monga Muyahudi, yakamufugamila, yakutya, “Mwanangu we cicekulu katajika lulu baha. Ninga hamba nha vivyo nghukunena wuze wumuwicile muwoko wako, nayo kowumipa.” 19Yesu nayo yakawa kutuluka, hamonga ne wejizwa wakwe, wakamutyatya u muwaha yuyo. 20Umucekulu yunji nayo mono yali yena wutamwa wo wuzaze we sakami mu myaka ikumi na myejete, yakamutyatya Yesu mu nyuma, yakapamiza limhembo lyo mwenda wa Yesu. 21Yanoza nha vivyo vyono yehwesa mu nhumbula yakwe nha vyono “Hono mhamize du icivwalo cakwe, hodu nowa napona.” 22Yesu yakapituka yakamuwona, yakamutya, “Go muhinza, wisindamice! Wihuwilo wako wukuponya.” Nayo u mucekulu yuyo yakawa kupona mu cidaha cico du.
23Hanyuma Yesu yakawa kwinjila mu nyumba yo muwaha yulya. Nayo yaza kuwawona watowa zifilimbi, ne lipuga lye wanhu wono walilaga, 24yakatya, “Ta muwuce bahano! Hambi u muhinza yuyu, nha si yafwiye, langa yagonile du.” Nawo wakamusekanga muno. 25Ilipuga lye wanhu lyaza kuwuswa, Yesu yakenjila kugati, yakamwibata muhinza u muwoko, nayo u muhinza yakema. 26Ne nghani yiyo yikakumuka mu yisi yiyilya yose.
I wabofu Wejete wakuponywa
27Yesu yakawuka baho, na lono yajendaga, wabofu wejete wakamutyatya akuno wakuzoza wakutya, “Gwe go Mwana wa Dawudi, wuciwonele lusungu!” 28Nayo Yesu yali yeza kwinjila kugati, awalya i wabofu iwejete nawo wakamubitila, nayo Yesu yakawawuza yakutya, “Wulenyi, mwihuwiye mbeka nha vyono ane nosuma kumutendelenyi inghani yiyo?” Nawo i wabofu wakamutya, “Heya Muwaha.” 29Baho Yesu yakapamiza imeso gawo no kuwatya, “Ale yiwe kulinye nha vyono mwihuwiye.” 30Imeso gawo gakanuguzwa. Nayo Yesu yakawakongʼonheza ko wukali yakuwatya, “Anye, mulece kumulonjela u munhu wo wose ze nghani yiyi.” 31Ninga wene wakatuluka, wakayitandaza inghani ya Yesu mu yisi yiyilya yose.
Yesu yakumuponya we cibwibwi
32Ne wanhu lono weyagalaga wakubita ku zikwawo, wanji wakamuletela Yesu, u munhu monga mono yali yali cibwibwi, ku soko vyono yali yebatwe ne licisi. 33Ne licisi lyaza kuwa lyalavywa muli munhu yuyo we cibwibwi, lo lulo lulo yakawa kulonga kanyhi. Ne wanhu wakezina muno muno akuno wakutya, “Inghani yono yinha yiyi, yikali si nejela hamba mu Isilayeli!” 34Ninga i Wafalisayo wakawa kutya, “Ayu yakulavizye macisi mu vilungo vyo muwaha we macisi mabi.”
Yesu yakuwawonela lusungu wanhu
35Nayo Yesu yakagajendela i makaya gose ne vitumbi, yakawa kwijiza mu matangʼanilo gawo go wuhembelo akuno yakuluganula u Luganuzi Luswanu lo Wutemi wo Mulungu, hamonga no kuponya imatamwa gose go wusocele we mawala gose. 36Yaza kuwawona iwanhu mapuga na mapuga, yakawawonela lusungu muno, ku soko wali wakataye muno, akuno wehweleye kotya zingholo zono zisina mudimi. 37Baho yakawalonjela iwejizwa wakwe, yakawatya, “Ndudula yo mbaha, ninga iwetumami wo wacefu. 38Holeka mumulombaje munya mugunda, ho yatume iwaduduzi mu mugunda wakwe.”
Currently Selected:
Matayo 9: GOG91
Highlight
Share
Copy
Want to have your highlights saved across all your devices? Sign up or sign in
Cigogo New Testament © Bible Society of Tanzania, 1991.
