Matayo 17

Yesu yakupituka i futa yakwe

(Mlk. 9:2-13; Lk. 9:28-36)

1Vyaza kupuluta vilo mutandatu, Yesu yakawasola wa Petelo, Yakobo na Yohana u nduguye, yakabitana nawo wali wene sunga ko kwitunda litali. 2Na lono wali wamulanjile, u mwene Yesu yakawa kupituka i futa yakwe, u wusu wakwe wukangʼalala nhe lizuwa, ne vivwalo vyakwe, vikawa vizelu swe, kotya nha wuzelu we lizuwa. 3Hobaho wa Musa na Eliya wakawalawila wakawa wakulongana na Yesu. 4Baho Petelo yakamutya Yesu, “Alu Muwaha, ane nghuwona yowa viswanu muno muno vyono cili baha, Holeka hono wende, ane nozenga vibanda vidatu bahano, cimonga cako, na cimonga ca Musa, na cimonga ca Eliya.” 5Nayo lono yali yakali kulonga nha vivyo du, livunde yizelu likawa kuwagubika, ne lizi likahulikwa likulawilila mwivunde lilyo, likutya, “Ayu yo Mwanangu, u mwendece wangu, mono nyendezwe nayo, holeka mumuhulikaje.” 6Nawo i wejizwa wali weza kuzihulika zizo, wakagwa gubama, akuno wakogopa muno muno. 7Nayo Yesu yakawabitila, yakawapamiza yakawatya, “Mwinukaje le, mulece kogopa!” 8Nawo waza kwinula i meso gawo, si wawona yunji, langa wakamuwona Yesu yali wene du.

9Nawo lono watimaga wakulawa mwitunda, Yesu yakawakongʼonheza muno, yakutya, “Alu mulece kumulonjela yunji muli zono muziwene sunga kolo u Mwana wo Munhu yakuzukulwa kulawa muli wafu.” 10Baho i wejizwa wakamuwuza wakutya, “Alu i wejizi wo Wulajilize nha wakutya, ati yinojeye Eliya yo yamule kuza?” 11Nayo Yesu yakawapitula yakatya, “Heya mbeka, Eliya kokuza kuziwikaniza zose.

12“Ninga nghumutyenyi, vyono Eliya yakondya kuza, ninga iwene hamba si wamutanga yaye, langa wene wakamunoza nha vyono wasakaga iweneco. U Mwana wo Munhu nayo, kogazwa nha vivyo mu miwoko yawo.” 13Baho nhondo i wejizwa ho wakatanga vyono yawalonjelaga za Yohana u Mubaputizi.

Yesu yakumuponya u mwana mono yena licisi

(Mlk. 9:14-29; Lk. 9:37-43a)

14Nawo wali weza kwitangʼanila kanyhi ne lipuga lililya lye wanhu, munhu yunji yakamubitila Yesu, yakamufugamila, 15yakatya, “Gwe Muwaha, wumuwonelaje lusungu mwanangu, hambi nha yena cinzilisa, kanyhi yakugazika muno, na kali kenji mwene kagwizaga mu moto na mu malenga. 16Nane nghamuleta kuli wejizwa wako, ninga hamba si wasuma kumuponya.” 17Yesu yakamupitula yakamutya, “Anye mo lulelo lono lusina u wihuwilo, lulelo lono lwajiliye! Alu nokwikalana nanye sunga nili? Hamba nojendelela kumukangalililenyi sunga nili? Ale mundetele ta umwana yuyo ahano.” 18Waza kumuleta, Yesu yakalitacila lilyo licisi, nalyo likawa kuwuka, no mwana yuyo, yakapona mwidaha lilyo du.

19Hanyuma iwejizwa wakwe, wakawa kumubitila Yesu cinyele wakamuwuza wakatya, “Alu nhawule ase si casuma kulilavya i licisi lilyo?” 20Yesu yakawatya, “Ku soko yo wihuwilo wenyu wucefu. Nghumulonjelenyi mbeka, hono muwe mwina u wihuwilo wudodo du nha vyono yinha yi mbeyu ya haladali, mosuma kulilonjela i litunda lili, mukutya, ‘Wuwuce ahano, wubite ahalya,’ nalyo mbeka lyobita. Hasina nghani yo yose yono yali yiwe si yisumice kuliʼnye. [ 21Ne licisi lye liwala lilino, si lyosumika kuwingwa, langa hono si ko wulombe no wuleka kulya.]”

Yesu yakulonga kanyhi ze lifwa lyakwe na zo wuzuce wakwe

(Mlk. 9:30-32; Lk. 9:43b-45)

22Na lono wajendaga wakubita ku Galilaya, Yesu yawalonjela yakatya, “U Mwana wo Munhu kotajilwa mu miwoko ye wanhu. 23Womuwulaga, ninga mwizuwa lye kadatu, kozukulwa.” Nawo wejizwa wakakalala muno muno.

Kulipa kodi ye Nyumba yo Mulungu

24Nawo waza kufika ku Kapelanawumi, iwanhu wono wakongholaga izipesa ze kodi ye Nyumba yo Mulungu, wakamubitila Petelo wakamuwuza wakutya, “Alu u Mwijizi wenyu nayo kalipaga izipesa ze kodi?” 25Nayo Petelo yakatya. “Heya kalipaga.” Nayo Petelo yaza kwinjila mu nyumba, na lono yali yakali hamba si yanalonga nghani yinji, Yesu yakamuwuza, yakatya, “Alu gwe Petelo, agwe wukuwona nhawule? Iwatemi wa mono yinze, wakongholaga kodi kuwulawa kuli wa hayi? Kuwulawa kuli iwana wawo, hamba kuwulawa kuli iwajenzi?” 26Nayo Petelo yakapitula yakatya, “Kuwulawa kuli wajenzi.” Yesu yakamutya, “Holeka kumbe iwana si walavyaga. 27Ninga alu ho cilece kuwakobaza, ale wubite kwilenga, wukayitajile ndowano, nagwe nhondo wusole yi somba yinongozi yono koyibata, hanyuma wuyahamulaje mulomo wayo, na mugati koziwona zipesa zono zikwiliye so kodi. Ale wuzisolaje wubite wukawapele, ku soko yangu na gwegwe!”

Currently Selected:

Matayo 17: GOG91

Highlight

Copy