Matayo 15

I myoto ye wasetu

(Mlk. 7:1-13)

1Hanyuma i Wafalisayo ne wejizi wo Wulajilize, wakamuziza Yesu, wakulawa ku Yelusalemi, wakamuwuza wakutya, 2“Alu nhawule i wejizwa wako si wakwibata ze mejizo gono cabocela kuwulawa ku wawaha we katali? Ku soko si wakwizuguza miwoko yawo nha vyono yinojeye lono wakali si namula kulya?” 3Nayo Yesu yakawapitula, yakatya, “Alu so cici nanye mukwenda ze mejizo genyu mo weneco du, na akuno si mukwibata i malajilizo go Mulungu?” 4U Mulungu yalonga yakatya, “U wogopaje u sogo no nyina yako, na kanyhi mono yakulonga vibi kuli sogwe hamba kuli nyina, ale yuyo yimunojeye yafwe.” 5Ninga anye mwijizaga mukutya, ati, hono munhu yawe yena cinhu cono kosuma kumutaza u sogwe hambo nyina, na hono yatye, “I cinhu acino namulavizya u Mulungu, 6holeka ati hodu, siyanojeye kanyhi yamogope u sogwe! Yiyo yo yikuleka mukuyibedegala inghani yo Mulungu ku soko yo kugatyatya i mejizo genyu mo weneco.” 7Mo wakoci nye! Kumbe Isaya yaziwilila mu mbeka izenyu, lono yatya

8“U Mulungu yakutya,

Iwanhu awa wakuwa kunumba kwe milomo yawo du.

Ninga i zinhumbula zawo, zili kutali nane.

9No wuhembe wawo wono wakuhemba nene, si wukwiliye cinji,

ku soko sunga ne zinghani zono wakwijiza,

nha malajilizo ge cimunhu munhu du.”

I vinhu vyono vikumuhodanga munhu

(Mlk. 7:14-23)

10Yesu yakagacema i mapuga gagalya ge wanhu, yakawalonjela yakulya, “Ta muhulicize, kanyhi mwizuce! 11I cinhu cono cikumuhodanga munhu, si acilya cono cikumwinjila mu mulomo wakwe, langa acilya cono cikulawila mu mulomo wakwe. Cico langa co cikumuhodanga munhu.”

12Hanyuma i wejizwa wakamubitila, wakamutya, “Wule wumanyileʼmbi vyono i Wafalisayo watamiswa mu zinhumbula zawo, ku soko ye zinghani zako?” 13Ninga u mwene Yesu, yakawapitula, yakawatya, “Ibici lyo lyose lyono u Sogo yangu wa ku wulanga si yalihadice, lilyo langa lyokulwa. 14Muwalekaje wene! Hambi wene nha wabofu, kanyhi wene wakuwatonga i wabofu, no mubofu hono yamutonje u mubofu muyagwe, ale, wose vyono wejete wogwila mwikombo.” 15Baho Petelo yakawacilila, yakatya, “Ale, wucilolosezaje ta, ze cihwanicizo cico.” 16Nayo Yesu yakatya, “Wa, kumbe na nyenye si mukwizuka hongo?” 17Alu anye si mukwizuka vyono cinhu co cose cono cinjliaga mu mulomo, cibitaga kunda, na hanyuma yayo citagagwa kunze ku coloni? 18Ninga azilya zono zilawaga mu mulomo zikuwa kulawa mu nhumbula yo munhu, na zo zizo du, zono zikuwa kumuhodanga munhu, no kumupela wusemunwe. 19Ku soko mu nhumbula yo munhu nha momulawaga i mahweso mabi gono galetaga no wu wulaji, kanyhi, mulawaga u wusenyha, wuhizi, wuhomelezi wo wulambi, ne maligo. 20Ale zizino zo zikumuhodanga munhu. Ninga ku wulya i zindigwa du lono wukali si nezuguza i miwoko, ako si kosuma kumuhodanga munhu.

U wihuwilo wo mucekulu yunji we Cikanani

(Mlk. 7:24-30)

21Yesu yakawuka baho, yakabita kwikala mu zisi za Tulo na Sidoni. 22Baho, u mucekulu yunji we Cikanani wa mu yisi yiyo, yakamuziza, akuno yakuzoza yakutya, “Gwe Muwaha go Mwana wa Dawudi, wumbonelaje lusungu! U mwanangu we cicekulu yakugazwa ne licisi.” 23Ninga Yesu, hamba si yamupitula cinji ngʼo. Ale i wejizwa wakwe, wakamubitila, wakamutya, “Wumu-lonjelaje u mucekulu yuyo yabite, hambi alu nha yakucityatya tyatya du akuno yakuzoza.” 24Nayo Yesu yakapitula, yakatya, “Ane natumwa ku soko ye wanhu wa Isilayeli, alu wono wajiliye kotya zingholo.” 25Baho nayo u mucekulu yuyo, yakaza, yakafugama hamwande ya Yesu, yakatya, “Gwe, Muwaha, wunhazaje.” 26Yesu yakamupitula, yakamutya, “Si viswanu yaye kusola i zindigwa ze wana, hanyuma kuwa kuzipela i zimbwa.” 27Nayo u mucekulu yuyo yapitula yakamutya, “Yene yiyo yili mbeka Muwaha, ninga sunga ne zimbwa nazo zilizaga i vifukufuku vyono vigwizaga hasi, kuwulawa mu meza yo mutwa wawo.” 28Baho Yesu nayo yakamupitula yakatya, “Gwe yaya, u wihuwilo wako mbeka wuwaha, holeka yili ciba wunozezwe nha vyono wukuhila.” Hodu, lo lulo baho du u mwanagwe we cicekulu yakawa yapona.

Yesu yakuwaponya wanhu wenji

29Yesu yakawuka baho yakabita ku nhumbi ye lilamba lya Galilaya, yakabita kwitunda, yakekala hasi. 30Ne wanhu wenji muno muno wakamuziza, wakawaleta we vilema, iwabofu, we citewe, we cibwibwi, sunga wanji wenji muno, wono wali watamigwe, wose wawo wakawikwa ha mwande ya Yesu, nayo Yesu yakawaponya. 31I lipuga lye wanhu, likezina muno muno lono lyaza kuwawona we cibwibwi wakulonga, wono wali walemaye, alu wapona, na we citewe, alu wakujenda, sunga wono wali wali cibofu, nawo luno wakuwona, baho wakawa kumukumya u Mulungu wa Isilayeli.

Yesu yakuwalisa ndigwa iwanhu wono wacizize elufu yine

(Mlk. 8:1-10)

32Ale, Yesu yakawacema i wejizwa wakwe yakawatya, “Ane nghuwawonela u lusungu i wanhu wawa, vyono wawezana nane mu vilo vidatu, hamba siwaliye cinji. Holeka si nendile niwalece wabite akuno wadabuce, wologwa mu nzila bwete.” 33Nawo i wejizwa wakamulonjela wakatya, “Alu ahano nha cili mu nyika, alu ho coyituga hayi indigwa yono yowakwila wanhu wenji nha vivi?” 34Yesu yakawawuza yakawatya, “Alo mwina mikate mhinga?” Wakamutya, “Cina mikate mupunghati hamonga na visomba vicefu.” 35Baho Yesu yakawa kuwalonjela i wanhu wekale hasi. 36Nayo yakayisola i mikate yiyilya, mupunghati, hamonga ne visomba vivilya, yakamulumbo Mulungu, yakayibegula, yakawapela i wejizwa wakwe, nawo wakawagawila wanhu. 37Na wose wakatya wakeguta. Hanyuma wakatondoleza i vibegulwa vyono vyasigala, wakamemya nhoto mupunghati. 38Nawo wono watya, wali waficile elufu yine, walume du, ninga i wacekulu ne wana wadodo wose wono wali wali baho, wo si wawalilizwa mwiwalo. 39U mwene yakenjila mu ngalawa, yakabita ku zimbavu za Magadani.

Currently Selected:

Matayo 15: GOG91

Highlight

Copy