Luka 8

I Wacekulu wono wetyatya na Yesu

1Hanyuma ya zizo, Yesu yakakola mu makaya na mu vitumbi, yakulonga no kuganula Luganuzi Luswanu lwo wutemi wo Mulungu. Na awalya we likumi na wejete wali hamonga nayo. 2Hamonga ne wacekulu wanji wono Yesu yawaponya macisi ne zinhamwa zinji, nawo wali hamonga nayo. Wawo wo wa Malyamu mono (yacemagwa Magadalena,) muli yuyo galawa macisi mupunghati. 3Na Yowana u mugolece wa Cuza u mwitumami mulongola wa Helode, na Susana, na wanji wenji. Wacekulu wawo wawetumamilaga Yesu ne wejizwa wakwe mu sawo yawo weneco.

I Cihwanicizo co Mumiza mbeyu

(Mat. 13:1-9; Mlk. 4:1-9)

4Ipuga iwaha lye wanhu, wekongholaga, na wanhu wenji wakawa kumuziza Yesu wakulawa mu matumbi gose. Nayo yakawalonjela cihwanicizo cici, 5“U mumiza mbeyu yalawila kumiza mbeyu yakwe na lono yamizaga, zinji zikalagala mu nzila; wakola nzila wakazikanyanjila, zindeje zikazilya. 6Zinji zikalagala hono hogali mabwe, zazakota zikanyala, vyono zali zisina malenga. 7Zinji zikalagala mu mabici ge mamivya, zikawilukana hamonga ne mamivya, gakazititiliza. 8Zimbeyu zinji zikalagala mu muhangha muswanu, zikawiluka, zikalela mhece igana.” Yaza kukondya kulonga zizo, yakalonga na izi iwaha, yakatya “Holeka muhulice, hono mwina makutu.”

I Soko yo kwijiziza mu vihwanicizo

(Mat. 13:10-17; Mlk. 4:10-12)

9Ne wejizwa wakwe wakamuwuza Yesu nhunizo ye cihwanicizo cico. 10Yakawatya, “Anye mupegwa kumanya zono zihundicigwe zo wutemi wo Mulungu, ninga kuli wanji, vyo si yinha. Langa wene walonjelagwa mu vihwanicizo, hono wakuwona, ho walece kuwona, na hono wakuhulika, ho walece kwizuka.”

Yesu yakulolosa nhunizo ye cihwanicizo co Mumiza mbeyu

(Mat. 13:18-23; Mlk. 4:13-20)

11Ale, ne nhunizo ye cihwanicizo cici nha yoyi. I mbeyu yo nghani yo Mulungu. 12Zono zalagala mu nzila, zikulajila iwanhu wono wakuyihulika nghani hanyuma Setani yakuza yakuyiwusa yiyo nghani mu zinhumbula zawo, ho walece kwihuwila no kupona. 13Azilya zono zalagala hono hogali mabwe, zikulajila iwanhu wono wakuyihulika nghani no kuyibocela na nyemo. Ninga hamba nha vyono zinha zimbeyu zizo, iwanhu wawo wakuwa wasina milela, wono wehuwilaga kwa cidaha du, na kolo wakujelwa, wakuwuya ne nyuma. 14Na zono zalagala mu mabici ge mamivya, co cihwanicizo ce wanhu wono wakuyihulika nghani, ninga mu wujendelele wawo, wakuzinjilizwa ne mahwele ne zisawo, no wiyendeze we mikalile yiyi, nawo siwakulela mikalo yono yikangaye. 15Nazo zono zalagala mu muhangha muswanu wo wanhu wono wakuyihulika nghani, no kuyikamisa kwa nhumbula swanu na ye cihuliko. Nawo wakuleta mikalo mu wukangalile.

I Tala yono yigubicizwe mu nhoto

(Mlk. 4:21-25)

16“Wanhu si wakolezaga tala no kuyigubiciza, hamba kuyiwika mwivungu lye citanda; langa wayiwikaga ha wuwiko wayo, wanhu wono wakwinjila mugati, wawone wuzelu wayo. 17Nghani yo yose yono hundikwe yolokwanzalikwa, na ze cinyele zolomanyika, no kulawila kuzelu. 18Holeka mwiyihenje vyono mukuhulika. Hambi mono yena, nha kopegwa; na mono yasina, kosolelwa sunga na cono yakutya yena naco.”

U Nyina ne wanduguze wa Yesu

(Mat. 12:46-50; Mlk. 3:31-35)

19Baho, u nyina ne wanduguze wa Yesu wakamuziza, ninga si wasuma kwiwona nayo so winji we wanhu. 20Yesu yakulonjelwa, vyono u nyina ne wanduguze wali kunze, wakusaka kumuwona. 21Ninga Yesu yakawalonjela wanhu wose, “Yaya ne wandugu zangu, wo walya wono wakuyihulika nghani yo Mulungu no kuyitumama.”

Yesu yakuyitacila mbeho ne lilenga vinyamale

(Mat. 8:23-27; Mlk. 4:35-41)

22Kukawa mwizuwa linji, Yesu yakenjila mu ngalawa mwene ne Wejizwa wakwe; yakawatya, “Cilowoce ku nhumbi nzagwe ye lilamba.” Wakatuluka. 23Ninga lono wajendelelaga mu ngalawa mwene Yesu yakebatwa na nhongo, yakagona. Likatima ikukunzo yiwaha lye mbeho mwilamba: malenga gakawa kwanza kwinjila mu ngalawa, wakawa wali mu mbali mbaha. 24Wejizwa wawalya wakamubitila Yesu, wakamusinhusa wakutya “Muwaha, Muwaha, ceza kufwa!” Yesu yakasinhuka, yakavitacila imbeho ne mawingo mawaha ge malenga, gakatula, hakanyamala twii.

25Yakawatya i wejizwa wakwe “Wihuwilo wenyu wuli hayi mbi? Ninga wene wakezina no kogopa, wakeyitya, Alo munhu ci yuyu, sunga i mbeho ne malenga yakulonjela, vinyamale, navyo vikumuhulika!”

Yesu yakumuponya munhu mono yali yena macisi

(Mat. 8:28-34; Mlk. 5:1-20)

26Yesu ne wejizwa wakwe wakajendelela no muhinzo wakafika mu yisi ya Wagelasene, yono vidomile na Galilaya ku nhumbi ye lilamba. 27Nayo Yesu yaza kutima muʼsi viketangʼanila na munhu monga mono yali yena macisi, yakulawa mwikaya, u munhu yuyo mu vilo vinji si yavwalaga myenda, hamba si yekalaga mu kaya, langa yekalaga mu vitenjelo. 28Yaza kumuwona Yesu, yakazoza, yakagwa hali mwene, yakabalaluka na lizi yiwaha yakatya, “Alo wina nghanici nase, Yesu go Mwana wo Mulungu Mono Yalawiliciye Muli Vyose? Nghukunena wulece kungaza” 29Hambi nha yalilajiliza licisi lilawanize muli munhu. Hambi nha lyamwibataga kenji. Hamba yiwe wanhu wamuwikaga mugati no kumuwopa ne vyuma; ninga yavidumulaga viwopelo kali kenji, ne licisi lilyo lyamuwinjilaga ku nyika. 30Yesu yakamuwuza, itagwa lyako gwegwe nani? Yakatya itagwa lyangu nene “Itewa,” vyono macisi menji gali gamwinjiye munhu yuyo. 31Gago macisi gakamunena Yesu yalece kugalajiliza gawuce no kwajilila mwikombo lyono lisina mudumo.

32Kwali na itewa lya nguhi nyinji, likudima ha mwejelele we litunda. Ale gago macisi gakamunena Yesu yagakombole genjile muli zene. Nayo Yesu yakagakombola. 33Imacisi gakalawa muli munhu, gakenjila mu zingubi, nazo zingubi zikavulumucila mwilamba, zikafwila mumo mu malenga. 34I wadimi waza kuziwona zono ziweye, wakatiza wakabita kuwalonjela wanhu wa mwikaya na muʼsi. 35Wanhu wakaza wazilanje zono ziweye; wakafika kuli Yesu, wakamuwona munhu mono yali yalavywa macisi, yavwalile myenda, yena ne mahala gakwe; yekaye ha magulu ga Yesu, wakogopa muno. 36Nawo wono waziwona zizo, wakawaloloseza wanhu wawo vyono munhu yuyo yaponyigwe. 37Ne wanhu wose we yisi ya Wagelasene wakebatwa na woga wuwaha, holeka wakamunena Yesu yawuce, yabite. Nayo Yesu yakenjila mu ngalawa, yakawuka. 38Ninga u munhu mono yalavywa macisi yakamunena viwezane nayo, ninga Yesu si yamulumba, langa yakamutya. 39“Uwuye kwenyu, ukalolose zimbaha zono Mulungu yakutendeye.” Yakabita, yakaganula hanhu hose mwikaya lilyo, zimbaha zono yatendelwa na Yesu.

Mwana we cicekulu wa Yayilo no mucekulu yunji, wakuponywa

(Mat. 9:18-26; Mlk. 5:21-43)

40Nayo Yesu yaza kuwuya ku nhumbi nzagwe ye lilamba, wanhu wenji wakamubocela na nyemo, hambi nha wamulindilaga wose. 41Baho yakaza munhu, itagwa lyakwe Yayilo, nayo yali muwaha we nhangʼanilo yo wuhembelo, yakagwa ha magulu ga Yesu, yakamunena yaze kwakwe; 42hambi nha yali yena mwana wa cicekulu we ciwene, kotya wa myaka ikumi na myejete, nayo yali yeza behi no kufwa. Ninga Yesu lono yabitaga wanhu wenji wakamumemela.

43Na mumo mwipuga lye wanhu, mwali na mucekulu yunji mono yali yena wutamwa wo wuzaze we sakami kwa myaka ikumi na myejete, nayo hamba yawe yali yetumamila sawo yakwe yose mu Waganga, ninga hasina hamba yumonga mono yasuma kumuponya. 44U mucekulu yuyo, yakaziza ku mugongo wa Yesu, yakapamiza limhembo lye civwalo cakwe, na hobaho du, u wuzaze wakwe we sakami wukaduma kamonga. 45Yesu yakawuza, “Alo nani mono yamhamize?” Wakakana wose. Nayo Petelo yakatya, “Muwaha, wanhu wenji wakupilime no kukonyeceza.” 46Ninga Yesu yakatya, “Ho yuli munhu mono yamhamize, hambi nha manyile vilungo vilawa muli nene.” 47No mucekulu yaza wona vyono si kosuma kwihundika, yakelajila akuno yakucicima so woga, yakagwa hali Yesu, yakalolosa hali wanhu wose cono cilecile yakumupamiza Yesu, na vyono yakondya kuponywa kamonga.

48Yesu yakamutya, “Go muhinza, wihuwilo wako wukuponya, ubite upolile.” 49Na lono Yesu yali yakali kulonga, Yayilo yakaletelwa nghani kulawa kukaya kwakwe, vyono, “U mwanago yakondya kufwa, ulece kumugaza Mwijizi.” 50Ninga Yesu yaza kuhulika zizo, yakamulonjela Yayilo yakatya, “Ulece kogopa. Wihuwile du, nayo mwanago kopona.” 51Yaza kufika kukaya ya Yayilo si yamukombola yunji wenjilane nayo, langa Petelo, na Yohana, na Yakobo, ne walezi wo muhinza yuyo du. 52Wanhu wose, walilaga citalo, ku soko yo mwana yuyo. Ninga Yesu yakawatya, “Mulece kulila, hambi mwana nha siyafwiye, langa yagonile nhongo du.” 53Nawo wakamuseka, hambi nha wali wamanyile vyono yafwiye. 54Ninga Yesu yakamwibata muwoko, yakacema yakutya “Go muhinza winuce.” 55Muhe wo muhinza wukawuya, yakenuka kamonga, Yesu yakalajiliza wamupele ndigwa. 56Walezi wakwe wakezina, ninga Yesu yakawalajiliza, walece kumulonjela munhu kuli zizo zono zijeye.

Currently Selected:

Luka 8: GOG91

Highlight

Copy