Yohana 11

I lifwa lya Lazalo

1Munhu yunji, itagwa lyakwe Lazalo munya Betaniya, yali yatamigwe. Icitumbi ca Betaniya, ho hanhu hono wekalaga wa Malita no mwanakwawe Malyamu. ( 2Nayo Malyamu yo yulya mono yamubaka Muwaha mafuta maswanu, kanyhi yakawa kumupata mu magulu ne zimvili zakwe. U lumbulye Lazalo yo yali yatamigwe.) 3Ale wawo walumbuze wakatuma munhu kuli Yesu, wakutya, “Muwaha, mwendece wako yatamigwe!”

4Ninga Yesu yaza hulika, yakatya, “Uwutamwa wuwu si womuwulaga yaye, langa wuli so lukumyo lo Mulungu, katamwa ho u Mwana wo Mulungu nayo yakumizywe muli wuwo.”

5Yesu yali yawendile wa Malita, no mwanakwawe Malyamu, na Lazalo. 6Yesu yaza kuhulika vyono Lazalo yatamigwe, yakajendelela kwikala baho hono yali, sunga vikapuluta vilo vyejete. 7Hanyuma yakawatya iwejizwa wakwe, “Ciwuye kanyhi ku Yudiya.” 8Iwejizwa wakamutya, “Mwijizi, vilo vivi du baha, lono Iwayahudi wasaka kukuwulaga na mabwe, nagwe wukusaka kuwuya kuko kanyhi?” 9Yesu yakapitula yakawatya, “I vipango ikumi na vyejete vye misi, alo vilikusina? Munhu hono yajende misi, si kosuma kwikobala, hambi nha yakuwuwona u wuzelu we yinze yiyi. 10Ninga munhu hono yawe kujenda ne cilo, kokwikobala, vyono wuzelu wuli musina muli mwene.” 11Yesu yaza kukondya kulonga zizi, yakawatya, “Mwendece wetu Lazalo yagonile, ninga ane nobita nghamusinhuse.” 12Iwejizwa wakwe wakamutya, “Muwaha, hono yawe yagonile kopona.” 13Wene wehwesaga vyono lunji yakulonga wugone we zinhongo, kumbe Yesu yalongaga zo wufwe wa Lazalo. 14Baho Yesu yakawalonjela, yakatya, “Lazalo yafwiza. 15Ninga nane nghusangalala ku soko yenyu, vyono ane si nali nili kuko, nanye ho mwihuwile. Alenyi le cibite kuli mwene.” 16Baho Tomaso mono yacemagwa we Matundu, yakawatya iwejizwa wayagwe, “Ale cibitenyi nase hamonga no Mwijizi, cikafwizane hamonga nayo.”

Yesu wo wuzuce no wumi

17Nayo Yesu yaza kufika kuko, yakagana Lazalo yali yakondya kugona vilo vine mu citenjelo. 18Icitumbi ca Betaniya cali cili behi na Yelusalemi, cihinzo ca kilometa idatu du. 19Ne Wayahudi wenji wali walika kwa wa Malita na Malyamu, ho wawapele pole, so lifwa lyo lumbu lyawo. 20Nayo Malita yaza kuhulika vyono Yesu yakuza, yakabita kumuhinjiliza, ninga Malyamu yakasigala mu nyumba. 21Malita yakamutya Yesu, “Muwaha, mhali wali wuwe wuli baha, u lumbu lyangu si yali yafwe ngʼo. 22Ninga sunga na lulu manyile vyono yono kosaka kuli Mulungu, u Mulungu kokupela.” 23Nayo Yesu yakamutya, “Ulumbulyo kozuka.” 24Malita yakamutya, “Manyile vyono kolozuka ku wuzuce we lizuwa lya ku ndumo.” 25Yesu yakamutya, “Ane nha yo nene wuzuce, no wumi. Nayo mono yanyihuwiye nene, hamba yafwe kowa mumi, 26nayo mono yakali mumi, hono yawe kwikala yanyihuwiye nene, si kolofwila lukulu. Wule, wihuwiye muli zizi?” 27Malita yakamutya, “Heya Muwaha! Ane nihuwiye vyono yo gwegwe Kilisito, u Mwana wo Mulungu u muza kononze.”

Yesu yakulila mahozi

28Malita yaza kukondya kulonga zizo, yakabita, yakamucema u mwanakwawe Malyamu, yakamulonjela cinyele, yakutya, “U mwijizi yali baha yakukucema.” 29Nayo yaza kuhulika, yakenuka mbela mbela, yakamubitila Yesu. ( 30Yesu yali yakali si nafika mu citumbi, ninga yali yakali yali hanhu bahalya hono Malita yamwagana.) 31Iwayahudi wono wali nayo mu nyumba, wono wamutuzaga, waza kuwona vyono Malyamu yakwinuka musunho, no kulawila kunze, wakamutyatya, watezaga mba lunji, yakubita ku citenjelo yakalilile kuko.

32Nayo Malyamu yaza kufika hono hali ho yuli Yesu, yaza muwona, yakafugama, yakamutya, “Muwaha mhali wali wuwe wuli baha, ulumbu lyangu si yali yafwe ngʼo.” 33Yesu yaza kumuwona Malyamu yakulila, ne Wayahudi wono wazana nayo, nawo wakulila, lusungu lukamukola mu nhumbula, nayo yakatamika muno, yakatya, 34“Alo mwamuzika hayi.” Wakamutya, “Muwaha wuze wulanje.” 35Yesu yakalila mahozi gakalawa. 36Iwayahudi wakatya, “Lanjenyi ta vyono yali yamwendile.” 37Ninga wanji wakatya, “Munhu ayu yasuma kumunuguze meso u munhu we cibofu, alu si yali yasume kumwimila Lazalo yalece kufwa.”

Yesu yakumuzukula Lazalo

38Yesu yakakalala kanyhi mu nhumbula, yakafika ha citenjelo, naco citenjelo cali ca mhango, naco cali cigubicizwe ne libwe. 39Yesu yakatya, “Wusenyi libwe.” Ninga Malita munghalo lumbulye mono yafwiye, yakamutya, “Muwaha, alu nha yeza kunungha, ku soko yakondya kuwa mu citenjelo vilo vine.” 40Yesu yakamutya, “Alo si nghulonjela vyono hono wihuwile, kowona lukumyo lo Mulungu?” 41Hodu, wakawa kuliwusa libwe. Nayo Yesu yakagalamila ku wulanga, yakatya, “Baba nghukulumba vyono agwe wukuhuliciza ane. 42Nane manyile vyono wukuwa kuhuliciza ane nhondo zose. Ninga ku soko ye wanhu wono wali baha, holeka nonjile, ho nawo wehuwile, vyono yo gwegwe mono wanhuma.” 43Nayo yaza kukondya kulonga zizo, yakacema kwa yizi iwaha, yakutya, “Lazalo, wulawile kononze!” 44Nayo mono yali yafwiye, yakalawila kunze, akuno vyo muwopwe ne sanda mu magulu ne mawoko no wusu wakwe wugubicizwe. Yesu yakawatya, “Mumuwopole mumulece yabite.”

Wihehe wo kumuwulaga Yesu

(Mat. 26:1-5; Mlk. 14:1-2; Lk. 22:1-2)

45Holeka Wayahudi wenji wono wali wazize kuli Malyamu, waza kuziwona zizo zono Yesu yetumile, wakamwihuwila. 46Ninga wanji wayawo wakabita kuli Wafalisayo, wakawalonjela zono Yesu yetumile. 47Holeka i Wakohani wawaha, ne Wafalisayo wakekonghola hamonga, wakatya, “Alu conoza nhawule? Hambi munhu ayu nha yakunoza vitanjilo vinji muno. 48Na hono cimuleceleze nha vivi, wanhu wose womwihuwila, nawo Walumi wokuza wayihodanje Nyumba yetu yo Mulungu, hamonga ne nghungugo yetu yose!” 49Ninga yunji muyawo mono yakucemwa Kayafa, mono yali yo Mukohani muwaha mu mwaka wuwo, yakawatya, “Anye si mumanyile cinji hamba hadodo!” 50Wulenyi, si mukuwona vyono yimunojeye munhu yumonga yafwe, ku soko ye wanhu, si nho kwajiliza likungugo lyose. 51Mwene si yazilonga zizi mu mahala gakwe mweneco, langa vyono mwene yo yali Mukohani muwaha mu mwaka wuwo, yakawila vyono Yesu kolifwila likungugo lyawo. 52Kanyhi hamba si likungugo lyawo du, langa ho yasume kuwakongholela hamonga iwana wo Mulungu wono wali weyagaye.

53Nawo vyono walawa lizuwa lililya, i walongola we Wayahudi wakawa kulondola nzila ho wamuwulaje Yesu. 54Holeka nayo Yesu si yasuma kujenda ciwonelela hamwande ye Wayahudi Ninga yakawuka kuko, yakabita sunga ku yisi yono yili behi na ku nyika, kwitumbi lyono lyacemagwa Efalemi. Yakekala kuko hamonga ne wejizwa wakwe.

55Ale, Isikukuu ye Wayahudi yo ye Pasaka, yali yeza yili behi, na wanhu wenji wakabita ku Yelusalemi, ho weyeze lono sikukuu yiyo yikali. 56Nawo wakawa wakumulondola Yesu, nawo lono wali wekongholela mu Nyumba yo Mulungu, wakewuza, weneco wose, wakutya, “Alu wulenyi, sikokuza ku sikukuu ye Pasaka?” 57Iwakohani wawaha hamonga ne Wafalisayo, wali walajilize vyono, hono munhu yawe yamanyile Yesu hono hoyuli, ale yawalonjelaje, ho wamwibate.

Currently Selected:

Yohana 11: GOG91

Highlight

Copy