Metumo ge Watumwa 9

U wupituce wa Sawulo

(Met. 22:6-16; 26:12-18)

1Mu mapango gaga, Sawulo yali yaciziliza kuleta woga wuwaha so kuwawulaga wejizwa wo Muwaha. Yakabita kuli Mukohani muwaha, 2yakalomba yapegwe baluwa, zono zosuma kumumanyiza kuli matangʼanilo go wuhembelo ge Wayahudi ga ku Damesiki, kolo yakuwawona wanhu wono wakuyityatya i Nzila yo Muwaha i walume ne wacekulu, yawebate no kuwaleta ku Yelusalemi.

3Ninga lono yali yali mu nzila, lono yali yaza behi no kufika ku Damesiki, lo lulo wuzelu kulawa ku wulanga, wukamumulika nhinicizo mbavu zose. 4Yakagwa hasi, yakahulika lizi likumutya, “Sawulo, Sawulo, alo nhawule wukungaza?” 5Nayo Sawulo yakawuza, yakatya “Gwegwe nani Muwaha?” Nalyo lizi lililya likapitula, “Yo nene Yesu mono wukungaza. 6Ninga winukaje wukenjile mwi kaya, na kuko kolonjelwa yono yikunojeye witume.” 7Iwanhu wono wajendana na Sawulo, wakawa wemile wasina yo kulonga, walihulika ilizi lililya, ninga siwawona munhu. 8Sawulo yakenuka hasi, nayo yaza kunugula meso gakwe, hamba si yasuma kuwona co cose. Iwanhu wawalya, wakamwibata muwoko, wakamutegula sunga ku Damesiki. 9Sawulo yakekala vilo vidatu si yakuwona, na mu vilo vivyo si yalizaga hamba kungʼwa co cose.

10Ale, kuko ku Damesiki, kwali na mwijizwa yunji, itagwa lyakwe Ananiya. U Muwaha yakamulonjela mu ndoto, “Ananiya!” Nayo Ananiya yakedika, “Ane baha Muwaha.” 11Nayo u Muwaha yakamutya, “Winuce wubite ku nzila yono yicemagwa nzila yono yigoloce, wukawuze mu kaya ya Yuda, munhu yunji mono kacemagwa Sawulo, munya Taliso, nayo yakulomba, 12nayo kawona munhu itagwa lyakwe Ananiya yakwinjila, yakumuwicila imiwoko yakwe, ho yatuje kuwona.” 13Ninga Ananiya yakapitula yakatya, “Muwaha, hulikaga kuli wenji zo munhu yuyo, mabi malinga mawaha gono yawatendeye i wanhu wako wono welile kuko ku Yelusalemi. 14Sunga na bahano, kaza yena no wukombolwe wulawa kuli Wakohani wawaha, yawawope wose wono walicemelezaga litagwa lyako.” 15Ninga u Muwaha yakamutya, “Wubite du, hambi ayo, nha nimuhagula yawe ciya cangu, ho yalitegule litagwa lyangu kuli we Makungugo, ne watemi wawo, sunga na kuli wana wa Isilayeli. 16Nane no mweneco, nomulajila zi nyinji zono zimunojeye yagazwe ku soko ye litagwa lyangu.”

17Ananiya yakabita, yakenjila mu nyumba yiyo. Nayo yakamuwicila Sawulo miwoko yakwe, yakatya “Ndugu yangu Sawulo, u Muwaha Yesu, mono yakulawiye mu nzila yono waziza, yo yanhumile wutuje kuwona kanyhi, wumemywe u Muhe Mono Yelile.” 18Lo lulo lulo, vikalagala vinji kulawa mu meso gakwe vyono vihwanile kotya makaka ge zisomba, yakatuga kuwona kanyhi. Yakenuka yakabaputizwa. 19Nayo yaza kukondya kulya zindigwa, yakatuga vilungo. Sawulo yakekala vilo vicefu hamonga ne wejizwa wono wali wali kuko ku Damesiki.

Sawulo yakuganula kuko ku Damesiki

20Lo lulo lulo Sawulo yakamula kulonga mu matangʼanilo gawo go wuhembelo, vyono Yesu yo Mwana wo Mulungu. 21Na wose wono wamuhulika, wakezina muno, wakatya, “Si yo yuyu mono yawawulagaga wono walicemelezaga litagwa lili ku Yelusalemi? Na bahano kaza so nghani yiyi, ho yawawope iwanhu wawo no kuwategula kuli Wakohani wawaha!”

22Ninga Sawulo yakacila kuwa ne vilungo, yakuwakangaziza cagalanze, vyono Yesu yo Kilisito, ne Wayahudi wa kuko ku Damesiki, wakawa wacelewaye du. 23Na vyaza kupuluta vilo vinji, Wayahudi wakeheha ho wamuwulaje Sawulo. 24Ninga Sawulo, yakawamanya ze maheho gawo. Wekalaga misi ne cilo, watejeye mu milango yo kwinjilila mwi kaya ho wamuwulaje. 25Ninga i wejizwa wakwe wakamusola ne cilo, wakamulajila mu nhoto, wakamukoza mwidilisha wakamutimya hasi.

Sawulo yakuwuya ku Yelusalemi

26Sawulo yaza kufika ku Yelusalemi, yakajela kwilunza na walya wejizwa. Ninga wose wakamogopa, hamba siwehuwila vyono nayo yawa mwijizwa. 27Ninga Balanaba yakaza yakamusola Sawulo, yakamutegula kuli watumwa, yakawasimuliziza vyono Sawulo yamuwona Muwaha mu nzila, na vyono Muwaha yalongana nayo, yakawalonjela kanyhi nha vyono, Sawulo yali kuganula ku Damesiki yasina woga. 28Holeka Sawulo yakekala hamonga nawo. Yakapilima mu Yelusalemi yose yakuganula nghani yo Muwaha, akuno yasina woga. 29Yakawa kulonga, no kwisumaniza ne Wayahudi wono wakulonga ci Giliki, ninga wene wasakaga kumuwulaga. 30Ninga we zindugu waza kuyimanya nghani yiyo, wakamusola Sawulo, wakamutegula sunga ko ku Kayisaliya, wakawa kumuleka yabite ku Taliso.

31Nhondo ilikanisa lya mu Yudiya, na mu Galilaya, na mu Samaliya mose, likatuga mulamu mwidaha lilyo. Likasinyhimikwa no kuwilucila mu cogopo co Muwaha, likonjelezeka no kusindamikwa no Muhe Mono Yelile.

Ayineya yakuponywa

32Kukawa lono Petelo yagajendelaga i makaya gose, yakabita sunga kuli wanhu wo Mulungu wono wekalaga ku Lida. 33Na kuko yakagana munhu yunji litagwa lyakwe Ayineya, mono yali yagona mu citanda myaka munana, hambi nha yali yadejepe. 34Petelo yakamutya “Ayineya, Yesu Kilisito yakukuponya. Winuce witandicile citanda cako.” Ayineya yakenuka lo lulo baho. 35Na wose wono wali wekaye baho ha Lida na Shaloni, wakamuwona Ayineya, nawo wose wakamupitucila Muwaha.

Dolika yakuzukulwa

36Kwali na mwijizwa yunji we cicekulu kuko ku Yopa, litagwa lyakwe yacemagwa Tabita, mu Cigiliki Dolika, nhunizo yayo “Nzimba.” Mucekulu yuyo yali yamemile metumo maswanu, nayo yawatazaga iwaciwa vilo vyose. 37Kukawa mu vilo vivyo, yakatamwa, yakafwa. Nawo wakawuhovuga muwili wakwe, wakawuwika ku nyumba ya ku golofa kucanyha. 38Na vyono Lida yali behi na Yopa, iwejizwa waza kuhulika vyono Petelo yali kuko ku Lida, wakatuma wanhu wejete kuli Petelo wamulonjele, “Wuze kono kwetu mbela.” 39Hobaho baho Petelo yakenuka, vikabitana nawo. Nayo yaza kufika, wakamutegula ku nyumba ya ku golofa kucanyha. Ne wacekulu wafwile, wose wakamumemelela Petelo, wakulila, wakamulajila makoti ne myenda, vyono Dolika yanozaga lono yali yakali mumi. 40Baho Petelo yakawalavyaniza kunze wose, yakafugama, yakalomba. Hanyuma yakawa kuwupitucila u muwili wa malehemu Dolika, yakatya, “Tabita winuce.” Nayo yakanugula imeso gakwe, na yaza muwona Petelo, yakenuka yakekala. 41Nayo Petelo yakamwibata muwoko yakamwimya wima, hanyuma yakawa kuwacema wawalya iwanhu wo Mulungu, hamonga na walya iwacekulu wafwile, yakamuwika hali wene yeza mumi. 42Ne nghani yiyi yikamanyika mu Yopa yose, ne wanhu wenji wakamwihuwila Muwaha. 43Nayo Petelo yakekala vilo vinji kuko ku Yopa, mu nyumba ya munhu yunji Simoni, munoza zinyhingo.

Currently Selected:

Metumo ge Watumwa 9: GOG91

Highlight

Copy