Metumo ge Watumwa 11

Zinghani za Petelo ku Kanisa ya Yelusalemi

1Iwatumwa na we zindugu wono wali ku Yudiya, wahulika vyono wanye makungugo ganji nawo wayibocela nghani yo Mulungu. 2Baho Petelo yali yeza kuwuya ku Yelusalemi, wawalya Iwayahudi wono wali wehuwila, wono wasakaga i wanhu we makungugo ganji nawo walame, wakamuhosa, wakutya, 3“Agwe wabita kwikala ne wanhu wono si walame, mukalizana nawo!” 4Ninga Petelo, yakawasimuliziza monga monga, muli zono zanozwa kulawa mwamulizo, yakatya, 5“Mwizuwa linji lono nali nili mu wulombe kuko ku Yopa, nghawona wupumulilwe, nghawona cinhu kotya yimwenda yiwaha lyono lyatimyagwa hasi likulawa ku wulanga, likawa libatwe mamhembo gayo mane, nalyo likawikwa behi na nene. 6Naza kusunjilila mugati, nghawona vilimu vye migulu mine, vilimu vya mu mbago, vilimu vyono vitambalaga ne zindeje za mucanyha. 7Hanyuma nghahulika lizi likunonjela likutya, ‘Petelo, winuce, ucinje, wulye.’ 8Ninga ane nghatya, ‘Ngʼo Muwaha, ku soko co cose cisemunwa, hamba cavu, cikali sinenjila mu mulomo wangu.’ 9Lizi lililya likahulikwa kanyhi kulawa ku wulanga, ‘Wulece kuvicema visemunwa ivinhu vyono Mulungu yavyezize.’ 10Ne nghani yiyi yikanozeka nganghulo yidatu, na ndumilizo, vyose vikagomolwa kanyhi ku wulanga. 11Ne wanhu wadatu, wono wali watumigwe kuliʼne, wono walawa ku Kayisaliya, wakaficila nhinicizo ku nyumba yono nekalaga. 12Muhe yakanyitya cibitane nawo, ndece kwihwelela. Na awa wandugu mutandatu, wakabitana nane Kayisaliya, na kuko cikenjila mu nyumba ya Kolineliyo. 13Nayo yakacisimuliziza vyono yawona Malayika yemile mu nyumba yakwe yakutya, ‘Wutume munhu yabite ku Yopa, yakamucema Simoni, mono kacemagwa litagwa linji Petelo. 14Mwene kokulonjela izinghani zono moponela, agwe na wa mu nyumba yako wose.’ 15Nali neza kwanza du kulonga, u Muhe Mono Yelile yakawatimila, nha vyono yacitimila ase bahalya ha lulongozi. 16Baho nghayikumbucila nghani yo Muwaha vyono yatya, ‘Yohana yabaputizaga na malenga, ninga anye molobaputizwa mu Muhe Mono Yelile.’ 17Alu hono Mulungu yawapela nha vivyo i wanhu we Makungugo ganji icipegwa ci cilya cono yacipela nase lono camwihuwilila u Muwaha Yesu Kilisito, alu ane waco nili nani mbi, ho sume kumwimila Mulungu?” 18Waza kuzihulika zizi, wakanyamala, wakamukumyo Mulungu wakutya “U Mulungu kawapela wanhu we Makungugo ganji cilejeho co kunena ho wawutuje wumi!”

I likanisa lya Antiyokiya

19Ku soko yo wugazwe, wono wejela mu cipango cono yawulajilwa Sitefano, wono wali wehuwila wakeyagala. Wanji wakabita sunga ko ku Foyinike, na Kupulo, na Antiyokiya, wakayiganula nghani kuli Wayahudi du. 20Ninga hali ho wali na wanji wayawo, wono walawa ku Kupulo na Kilene, nawo wakabita ku Antiyokiya, wakayiganula nghani yiyo kuli we makungugo ganji, wakuwaganulila Luganuzi Luswanu lo Muwaha Yesu. 21U Muwaha yakawataza, ne wanhu wenji wakehuwila, no kumupitucila u Muwaha. 22Inghani yiyo yikamanyika ne likanisa lyono lyali ku Yelusalemi. Nawo wakamutuma Balanaba yabite sunga ko ku Antiyokiya. 23Nayo yaza fika kuko, no kuwona vyono Mulungu yawamosizye wanhu, yakasecelela, yakawanena wose wajendelele kuwa wehuwilwa muli Muwaha. 24Balanaba vyono yali munhu muswanu, yamemilo Muhe Mono Yelile, no wihuwilo. Wanhu wenji wakonjelezeka kuli Muwaha. 25Hanyuma Balanaba yakabita ku Taliso kumulondola Sawulo. 26Nayo yaza muwona, yakamuleta ku Antiyokiya. Nawo wose vyono wejete, wakekalana ne likanisa lilyo, mu mwaka wose mututu, wakawa wakwijiza ipuga yiwaha lye wanhu. Na kuko ku Antiyokiya, wejizwa ko wamulila kucemwa Wakilisito.

27Mu vilo vivyo du, wawizi wanji wakaza ku Antiyokiya wakulawa ku Yelusalemi. 28Yakema muyawo yumonga litagwa lyakwe Agabo, na kwe vilungo vyo Muhe, yakalajila vyono yolowa nzala mbaha kononze kose. (Ne nzala yiyo yikawa mu vilo vyo mutemi Kilawudiyo.) 29Iwejizwa wose wakelumbila munhu na ha nghango yakwe, kuwategulila wutazi, we zindugu wono wekalaga mu Wuyahudi. 30Na nhavivyo vyo wanoza, wakawategulila wanyamhala we likanisa u wutazi wuwo kwe miwoko ya Balanaba na Sawulo.

Currently Selected:

Metumo ge Watumwa 11: GOG91

Highlight

Copy