Metumo ge Watumwa 1

Yesu yakuwelaga i wejizwa wakwe

1Ndugu yangu Teyofilo, Mu citabu cilongozi nandika zose zono Yesu yetuma no kwijiza, ku wulawo mwamulizo wo mulimo wakwe, 2sunga mwizuwa alilya lyono yanyasulwa ku wulanga. Na lono yali yakali si nanyaswulwa ku wulanga, yawalajiliza mu Muhe Mono Yelile, wawalya iwatumwa wono yawahagula. 3Na lono, yali yatamiswa yakondya, yakelajila kuli wene vyono mumi, mu vitanjilo vinji vye vilungo, lono yejelaga kuli wene idaha lya vilo makumi maʼne. Wamuwona, nayo yakaduwana nawo muli zo wutemi wo Mulungu. 4Na lono wali wetangʼanila hamonga, yakawalonjela yakutya “Mulece kuwuka ku Yelusalemi, langa mucilindilaje icipegwa cono yehuwiza Baba, icipegwa cono mwakondya kucihulika kulawa kwangu. 5Hambi Yohana nha yabaputizaga mu malenga; ninga anye mu vilo vicefu, mobaputizizwa mu Muhe Mono Yelile.”

Yesu yakubita ku Wulanga

6Baho wene, waza kwikonghola hamonga na Yesu, wakamuwuza wakutya, “Ati Muwaha, kwinha nha vivi ho kowakombolela Isilayeli Wutemi?” 7Ninga Yesu yakawatya, “I madaha ne vilo, vili mu wulajilize wa Baba, holeka si zenyu kumanya zowa nili. 8Ninga mopegwa vilungo, kolo yakumuzizenyi u Muhe Mono Yelile, nanye mowa wahomelezi wangu mu Yelusalemi, na mu yisi yose ya Yudiya, na Samaliya, sunga ko ku mhelo ye yinze.” 9Nayo yaza kondya kulonga zizi; nawo lono wamulangaga, yakanyasulilwa ku wulanga, ivunde likamugubiciza ha meso gawo, hamba kumuwona kanyhi.

10Nawo lono wali wakali wagalamiye ku wulanga lono yabitaga, lanje, wanhu wejete wono wali wavwalile vivwalo vizelu, wakema behi nawo; 11nawo wakatya, “Nye nyo wanhu wa Galilaya, alo so cici mwimile mugalamiye ku wulanga? Ayu Yesu mono yasoligwe kuliʼnye no kubita ku wulanga, kolokuza kanyhi nhavivyo vyono mumuwene yakubita ku wulanga.”

Matiya yakuhagulwa yahalile witumami wa Yuda

12Baho Iwatumwa wakawuya ku Yelusalemi, wakulawa ku cigongo cono citezagwa ca Mizeyituni, cono cali cihinzo ca kotya kilometa monga du ku wulawa ku Yelusalemi. 13Nawo waza kufika, wakenjila mu nyumba ya ku golofa, mono wekalaga, nawo wali wa Petelo na Yohana na Yakobo na Andeleya, Filipo na Tomaso, Batolomayo na Matayo, Yakobo mwana wa Alifayo, na Simoni Umuzeloti, na Yuda mwana wa Yakobo. 14Wawa wose, waswezanaga hamonga mu wulombe ko wuhile wumonga, hamonga ne wacekulu wanji, hamonga na Malyamu u nyina wa Yesu, ne wanduguze wa Yesu.

15Hanyuma ya vilo vicefu, hakawa na mukungʼano wa wono wali wakondya kwihuwila, wali waficile nha wanhu igana limonga na makumi mejete. Petelo yakema hamwande yawo, 16yakatya “Wandugu zangu, cinojele mandiko gafisilizwe, gono yamula kulonga u Muhe Mono Yelile ko mulomo wa Dawudi, za Yuda mono yali mutonji wa wono wamwibata Yesu. 17Hambi Yuda nha yali yawalilizwe hamonga nase, hambi nha yahagulwa yahanje nase mu witumami wuwu.”

( 18Mumanyile vyono mwene yawugula mugunda, ne zipesa zizilya zono yazitujila mwitumo lyakwe ilihi. Yakagwa hasi, yakabahuka, no wutumbu wakwe wukalawila kudeha. 19Ne wanhu wose wa mu Yelusalemi, wakazihulika zizi, holeka wakawucema mugunda wuwo mu nonga yawo, wakawutya, “Hakeli Dama” nhunizo yayo “Cigundu ce Sakami.”) 20“Hambi nha yandikwa mu citabu ce Zabuli:

‘Wikalo wakwe liweze itongo,

Hamba munhu wo wose yalece kwikala mumo,’

Kanyhi yandikwe,

‘Munhu yunji yahalile u witumami wuwo.’

21-22“Holeka yinojeye munhu yunji, yawe muhomelezi hamonga nase zo wuzuce wakwe u Muwaha Yesu. Yimunojeye yawe yumonga wa muli awalya wono cijendanaga nase mu vilo vyose, vyono u Muwaha Yesu yajendanaga nase, wulawa mwipango lyono Yohana yabaputizaga, sunga lizuwa lilya lyono Yesu yanyasulilwa kuwulawa kuliʼse no kubita ku wulanga.”

23Wakatambula matagwa ga wanhu wejete; u mulongozi Yusufu mono yacemagwa Balasaba (hamba liyagwe Yusito,) na we kejete Matiya. 24Hanyuma wakalomba wakatya, “Gwe go Muwaha, mono umanyile zinhumbula ze wanhu wose, alu wulajile muli wawa vyono wejete, mono wumuhaguye, 25yahalile witumami no wutumwe wuwu, wono yawuleka Yuda, ho yabite kwakwe mweneco.” 26Baho wakatawa kula, ne kula yikamwihaga Matiya, nayo yakawalilizwa ne watumwa we likumi na monga.

Currently Selected:

Metumo ge Watumwa 1: GOG91

Highlight

Copy