Malika 11

1-10: Mat. 21, 1-9; Luk. 19, 29-38; Joh. 12, 12-10.

1Neke lino vavye vahegelidze mu-Jelusaleme, pe vadzifike na mu-Betanija, valungamye pakidunda ikimono, neke baho lino Jesu avatumage avańigendwa vakwe vavili,

2neke atigilage: muhelelage kukâja, je fidońeńine jila; pe mudzifikile, apo musidzihava pakujivona indzana ja mbûnda, vajikungile, je asina ajipanda munu nambi ponu. Je mukajavule, mukandetele kuno.

3Neke ngana muvwene umunu jumwi akuvavudza itigila: mwikwavula ja kiki? apo mukatigilage: umutwa ajigulwime, akujipiluhidza kuno kangi kisatu. Apo mulavona asihāva ukuvapela. 14, 14.

4Neke baho vahelelage neke vavonage e hiji indzana ja mbûnda, vakungile pivala pamulyango. Neke baho vajavulage.

5Neke baho avangi avimile baho neke vatigilage: ńe va, kiki? mwikwavula ja kiki indzana ja mbûnda ijo?

6Neke avene valongage lulo, lwe avalongye Jesu, neke baho vavalekage.

7Neke baho indzana ja mbûnda neke vajiletage kwa Jesu. Neke baho valage nimyênda gyanavo pakyâńa pambûnda, neke baho umwene ahovage pajene.

8Neke avangi avanu avolofu neke valage imyênda gyanavo mwikasi, neke avangi valage amahamba ga mabiki, ge vapańulaga kudâsi.

9Neke baho vonda, navalongwe nava mumbele, neke vimbage ulwîmbo neke vatigilage: hosijana mufuńwa, je ikwadzila mwitavwa lya mutwa.

10Vufuńwa na vu vutwa vwa dadisu, uvwa Davidi, uvwikwadza, hosijana na kukyâńa.

11-24: Mat. 21, 12-22; Luk. 19, 46-48.

11Neke baho Jesu akafikage mu-Jelusaleme neke akingilage mutembele. Neke lino, ayye alolesidze ponda, neke baho avonage vuhwe. Neke baho anumage neke baho ahelelage mu-Betanija navańigendwa vakwe vańikyumi navavili.

12Neke lino pamilayo, pe vahumile mu-Betanija, neke baho umwene avonage adagine indzala.

13Neke lino, avye aguvwene umudzombe gulembwe amahamba amolofu, neke baho ahelelage atigye alole, nde akudzivona imeke. Neke lino baho, avye adzifike, neke baho avonage gulembwe ga mahamba gene; ndivwene umwêdzi gwa madzombe gwali gwave.

14Neke baho umwene Jesu neke alongage kumubiki atigilage: swe lino, ifipeke fyako asilavuja alye munu mbêpali. Neke avańigendwa vakwe neke valupulikage. v. 20.

15Neke baho yahelelage mu-Jelusaleme neke umwene Jesu akingilage mutembele neke baho akole mukuvadaga vonda, avagudzaga navagulaga mutembele, neke nifitagala fyanavo, avakovoṅasaga ulupija nifīkalilo fya vańa-kugula ingundya neke afitagasage.

16Neke avakanage navatigilaga, tugendele ija pa tembele, pe vańamwe ifikoṅolo.

17Neke avavulanidzage atigilage: silyolilwe pahâte ilya kuta: „ińumba jangu jilatambulika ukuta ja kulapangilila vonda avapivala?“ neke uńeńe mujidzusidze manga ja vagonadâsi.

18Neke ulu valupulikage navatekedzi avavina navakagulihâte, neke baho viganisage idza kumuvulagila; vavwene vamogopaga, vavwene nililugu lya vanu vonda, lwe ilonga, vadzumaga.

19Mbêpali avonaga vuhwe, neke ahumage mukâja jijo neke akagonage kungi.

20Neke pakilavu ikingi, vavye vidzumbanidza, neke vavonage umudzombe gula gumile na ga madela. v. 14.

21Neke baho ivusage u-Petele neke atigilage: mwiganidzi, lolage umudzombe, gwe ukagulekye indeko gula, gumile.

22Neke baho Jesu apilusage atigilage: muvedzage nulufuvo ulwifu-vwa kwa Nguluvi.

23Ndakyene ndikuvavula nditigila: ngana ujungi ilonga kukidunda iki itigila: ukunamukage, vwisope muńandza, neke atane nukwiganisa munumbula iakwe neke afuvwage lwe ilonga ukuta lwikwadza, apo alavona lwadzile. Mat. 17, 20.

24Kye ndilesile ndiva-vūlage nigilage: fyonda, fye mwilapangila pakuńilika, mulufuvwage ulwa kuta twikwanukila, apo ndakyene mulanukila. Mat. 7, 7; Joh. 14, 13.

25Neke ngana mwimile mukulapangila, apo mujivodzage umunu inôngwa jakwe, je avahokye, apo najuńe udadińo kukyâńa aladzivodza idzeńo inôngwa. Mat. 5, 23.

26(Neke uńeńe, ngana musikudzivodza inôngwa avajińu, apo najuńe uda-dińu asilavodza idzeńo.) Mat. 6, 14. 15.

27-33: Mat. 21, 23-27; Luk. 20, 1-8.

27Neke baho kangi vakafikage mu-Jelusaleme. Neke avye ikwigendza-gendza patembele, neke vahegēlelage ukwakwe navatekedzi avavina navakagulihâte navandzagila kisina.

28Neke vatigilage: dzonda, dze vwilima idzi, vwimye kwani, akutavulye ani uvutavulilwe uvu, je atigye ulimilage idzi?

29Neke umwene Jesu apilusage atigilage: najune ndikuvavudza ilidzwi limwi, ngana mundongye, apo najune ndikuvavula, kwe vuhumile uvutavulilwe, vwe ndilimila idzi.

30Uludzabiko lwa Johana lwahumile kwi, vona lwahumile kukyâńa, ene vuli valuvonise avanu hela? Mumbule.

31Neke baho vilondzage vatigilage: ngana twitigila lwahumile kukyâńa, apo umwene alatigila: ino mwali nakiki ukulufuvwa?

32Vona tutigilage vāvonise avanu hela? hamu! pakuva avene vogopaga kuvanu, pakuva u-Johana kuvanu vamutigilaga, je muvidzi ndakyene.

33Neke baho vakapilusage kwa Jesu neke vakatigilage: hamu tusiludzelye. Neke baho na ju Jesu neke nave apilusage atigilage: apo humbi najune sindikuvavula, kwe vuhumile uvutavulilwe, vwe ndilimila idzi.

Currently Selected:

Malika 11: II

Highlight

Copy