Johana 11
11
1Neke lino umunu jumwi, u-Lasale uva mu-Betanija, atamike mukâja, je vavujilaga na va-Malija numamye Malita. Luk 10, 38. 39.
2Neke umwene Malija uju je jula, je amubakaga imono umutwa, je amufyangulilaga nifwili dzakwe mundzajo; u-Lasale, je atamike, ali muhadzave. 12, 3.
3Neke baho avahadzave neke vatumage umulomo kwa Jesu ugwa kutigila: ve mutw’ave, ulolage umujago, je umwendile, atamike.
4Neke umwene Jesu, avye apulike, neke atigilage: ikyene ikitamwa kisigelela ukufwa nda, kińa-kolosa indolo dza Nguluvi, na ju muswamuve va Nguluvi nave ukuta avonekelage mumo indolo. 9, 3.
5Neke umwene Jesu vali vudzēla na Malita na Malija, umunuṅuve, na Lasale.
6Neke avye apulike ukuta atamike neke ahwedzage ifigono fivili pakivungu kikyo, kye agendaga.
7Neke lino baho avalongelage avańigendwa vakwe neke atigilage: mudzûko, tuhelelage mu-Judaja kangi.
8Neke baho avańigendwa vakwe vatigilage: ve labi, ava-Juda vagane vakutodzeledzage lino hela, kangi vwitigila kwe vwihelela kuko! 8, 59; 10, 31.
9Neke Jesu apilusage atigilage: utuvalilo twa sala pakigono kimwinga tusili likyumi na tuvili? Ngana umunu igenda pamûńi, asikwikuvadza, pakuva akuluvona ulumuli lwa ńi iji. 9, 4. 5.
10Neke umunu umuge-ndakilo, ujo akwikuvadza, pakuva ulumuli simoluli umwakwe. 12, 35.
11Adzovagavo. Neke avavulage nukuvavula ukuta umujisu Lasale agonelye itulo neke lino kwe ndihelela mukumusisimusa. Mat. 9, 24.
12Neke baho avańigendwa vakwe neke vatigilage: ve mutw’ave, ngana agonelye itulo, apo hujo.
13Neke umwene Jesu alongaga ku kufwa, neke avene pamihodzehedze vatigilage vona ilonga lu lwa kugona itulo.
14Neke baho Jesu neke avalongelage kyedzamutima neke atigilage: Lasale afwe.
15Neke lino ndikēla, ndikuvakēlelela juńe ulwa kuva mulafuvwa, pakuva unene si kwe ngali. Neke lino mudzûko, tuhelelage ukwakwe.
16Nebe baho Toma, je vatigilaga muńalujungu, neke alongage kuvańigendwa vajagwe neke atigilage: mudzûko, tukafwilanile pamwinga numwene.
17Avye adzifike Jesu neke akavonage ahwe fitaji mumombwe.
18Neke ijene ikâja ija mu-Betanija fyafudiṅine na Jelusaleme, jali pamelo dzińikyumi na dzihanu.
19Neke vahelye volofu ava-Juda kwa Malita na kwa Malija, vatigye tukakivilidzage ulwa muha-dzavanavo.
20Malita pe apulike ukuta Jesu adzile, neke baho amutaṅanidzage. Neke umwene Malija neke ikalage muńumba.
21Neke baho Malita alongage na Jesu neke atigilage: ve mutw’ave, ukali uvedzage ve vwi baha uveve, apo umuhadzavangu ngali asifwe.
22Neke na lino ndiludzelye ukuta fyonda, fye vwińilika kwa Nguluvi uveve. Nguluvi akukupēla.
23Neke umwene Jesu neke amulongelage atigilage: umuhadzavo idzulubuka.
24Neke umwene Malita neke atigilage: ulo ndiludzelye najune, ukuta aladzulubuka, pe valava vidzulubuka avanu vonda pakigono kya kududzihidza. 5, 29; 6, 40; Luk. 14, 14.
25Neke baho Jesu atigilage: je nene nde kudzulubuka nde vûmi, umuńakūfuvwa unene, je alavedza mûmi, na pe ifwa.
26Kangi vonda avańa-kūfuvwa kyali vûmi, ve vasilafwa ponu. Uveve vwifuvwa idzen’idzi? 8, 51.
27Neke atigilage: ena, mutw’ave, unene ndifuvwa ukuta uveve vwi Kilisiti, ve muswamuve va Nguluvi umuńa-kwadza kwen’eńi kuno. 6, 69.
28Neke lino, avye alulongile ulu, neke ahelelage mukumukemela u-Malija umunuṅuve kukińele neke atigilage: umwiganidzi afike, akukukemela.
29Neke umwene avye apulike, neke image kisatu neke ahelelage kwa mwene.
30Umwene Jesu tândi ali ave ukufika mukâja, tândi ali pakivungu, kye vatańanikye na Malita. v. 20.
31Neke avene ava-Juda, avali lumwi muńumba, avamukivilidzaga, pe pavwene u-Malija ikwima kisatu ihumila pivala, neke baho vamuninilage, vahambulaga: ihelela kumombwe mukuvembela eko.
32Neke umwene Malija, avye adzifike, bahe ali Jesu, pe amuvwene, neke baho agwilage mumagulu ga Jesu neke atigilage: ukali uvedzage ve vwi baha, apo ngali asifwe umuhadzavangu.
33Neke umwene Jesu avye amuvwene ukuvemba, pe avavwene ukuvemba na va va-Juda, ve fyadzise, neke baho ahĕlukage mumubepo neke aheńenekage. 13, 21.
34Neke atigilage: mumuvikile pi? Neke avene vatigilage: sule ukalole.
35Neke balio Jesu avembage amohodzi. Luk. 19, 41.
36Neke baho ava-Juda neke vatigilage: mulolage ńe va, ali mwênde.
37Neke avangi vatigilage: uju je amudindwe amîho umubofu jula, kangi alemilwe kiki, ukuta atane ukufwa na juju?
38Neke baho Jesu neke kangi ahĕlukage mumubepo, neke baho akafikage pamombwe. Ijene jali manga, pamulyango vagelike iliganga. Mat. 27, 60.
39Neke baho Jesu neke atigilage: mulihedzage iliganga! Neke baho u-Malita, umuhadzave va jujo, je afwe, neke atigilage: ve mutw’ave, mańi inuṅa, ndivwene kye kigono kya vutaji neṅuli.
40Neke umwene Jesu amulongelage atigilage: sindikulongye ukuta, ngana vwifuvwa, apo ukudzivona indolo dza Nguluvi? v. 4, 23. 25. 26.
41Neke baho valihedzage iliganga. Neke umwene Jesu neke alodzage amîho kukyâńa neke atigilage: hongela, ve dada, ndihongedza ukwako, lwe undzidihidze.
42Unene kiba ndiludzelye ulwa kuta ukundzidihidza mbêpali, ndilongela pa pavanu, avanyengesidze baha ava, ukuta navo vafuvwage, ukuta je veve, je unumile. 12, 30.
43Neke lino avye alulongile ulu, neke baho akemelage nilidzwi ilikomi neke atigilage: Lasale, uhumage!
44Neke baho ahumage, je afwe neke ahumage na gi myênda, gye vamunyengile na kumagulu na kumavoko, gye vamusilye. Na kumîho nako vamunyengile nimyênda gya lifuke. Neke baho Jesu neke atigilage: mumuvopolage neke muleke agendage hela.
45Neke ava-Juda, avali vadzile kuva-Malija, neke baho vamufuvwage volofu, pe vamuvwene ukulima, lwe alimile.
46Neke avangi vahelelage kuva-Fwalisaja neke vakagotolage londa, lwe alimile.
47Neke baho avatekedzi avavina nava-Fwalisaja neke vikemelage ululundano lwa vandzagila neke vatigilage: tugitage ndavuli, pakuva umunu uju ivonesa muno ifilŏle.
48Ngana tukumuleka ndesi, apo valamufuvwa avanu vonda hela, neke apo ava-Loma valadza valapoka nińi jisu navanu visu vonda hela.
49Neke baho umujanavo jumwi, u-Kajifwa, je ali je mutekedzi umukomi pamwâka gugo, neke je avalongelage atigilage: uńeńe musivudzelye pakuhiga inôngwa,
50musikuluvona ukuta lukuvakulila uvunofu ju-ńe, ngana akuvafwila avanu umunu jumwi, ngana mwe viponela avanu ikipelela kyonda ukutipulwa. 18, 14.
51Neke lino idzene idzi asadzivwene mwene, hamu, adzivwene, pakuva ali mutekedzi umuvina pamwâka gugo, neke baho agitaga ukuvila hela, pakuva Jesu ali muńa-kuvafwila avanu ikipelela kyonda.
52Neke umwene asali muńa-kuvafwila avanu vala vene, hamu, atigilaga ndivalundasage pamwi na va vâna va Nguluvi, avatagalye konda. 10, 16.
53Neke vahumage pa pakigono kikyo neke valonganage lu lwa kuta tumuvulagage umwene.
54Neke umwene Jesu asadzungutilaga vudondya mu-ńi ja va-Juda, hamu, umwene neke ahegage kuko neke ahelelage kuńi, ijifudiṅine nuluṅalaṅala, kukâja, je vitigila mwe mu-Efeleme, neke kwe akikalage navańigendwa vakwe.
55Neke ikyene ikyâka kya pasa ja va-Juda kyahegēlye. Neke baho avanu neke vinukage avolofu, avahumaga ińi jijo neke vahelelage mu-Jelusaleme mukwijelulila, kyali jave ukufika ipasa.
56Neke vamusakulage u-Jesu. Neke vivudzage, pe vimile mutembele neke vatigilage: uńeńe mwitigila kiki? mwitigila asadza kukyâka iki hamu?
57Neke lino avene avatekedzi avavina nava-Fwalisaja valagye ukuta, ngana ejungi amudzelye, kwe kwali, avulilage, vamwavikage.
Currently Selected:
Johana 11: II
Highlight
Share
Copy
Want to have your highlights saved across all your devices? Sign up or sign in
New Testament in Bena © Bible Society of Tanzania, 1958.
