MATAYO 7
7
Musilahe vaghenji
(Luk. 6:37-38, 41-42)
1“Musilahe, nesa na unywi musirelahwa. 2Ambu mlaho mwelaha nawo, nirewo na unywi mwenelahiwa; na ngero ila mwenegerira, nireyo mwenegerirwa. 3Hanini werereha kasanu keho he iziso la mndughu wako, na mghamba weho he iziso lako we mwenye wesiurereha? 4Kana unemtize mndughu wako, ‘Cheki ning’ole kasanu he iziso lako,’ uko he iziso lako we mwenye hena mghamba? 5We mlung’ong’o! Rongang’ola uo mghamba he iziso lako niho wenevona nezo, na kung’ola kasanu he iziso la mndughu wako.”
6“Musiinke maguro kila chezerire, neri musitaghe lulu jenyu he nguve, jisirejivatira na maghu ajo, jikagharuka na kumung’arura.”
Ombani muneinkwa
(Luk. 11:9-13)
7“Ombani muneinkwa; endani munevona; kokontani munejuvuiwa. 8Ambu kila eomba einkwa, na ula eenda evona, na ula ekokonta enejuvuiwa. 9Kana henyu hena mntu, mwanawe ekimwomba kijo enemunka ibwe? 10Kana ekimwomba samaki enemunka nyoka? 11Ana ukinakiche unywi mwe vavivi, mwemanyije kuinka vana venyu vintu vyedi, Vava wenyu wa uko wanga tekazike kuvainka vyedi vala vemwomba?
Maandiko ezerire
(Luk. 6:31)
12Heicho vyose mweenda kuketiwa ni vantu, na unywi vaketieni huvo, ambu icho nicho myomongwa na varoti.”
Nzia mbiri
(Luk. 13:24)
13“Ingiiani he mpenge sisiri; ambu mpenge aramu na nzia aramu, vitonja he kuteka, na vareingia he iyo mpenge ni vajinki. 14Ambu mpenge ni sisiri, na nzia ni fufuji yetonja he nkalamo, na vareivona ni vaghere.”
Idi na mongo
(Luk. 6:43-44)
15“Kucheieni he varoti va mongo, vemuzia vedokie mikota ya magonji, mira uko ndeni ni maghinga makai. 16Munevamanyija he ntunda javo. Hena mntu etunda zabibu he mivwa; kana nkuu he midangu? 17Nirehuvo, kila mti wedi ugera ntunda jedi, na mti mvivi ugera ntunda mbivi. 18Mti wedi teuidima kugera ntunda mbivi, neri mti mvivi teuidima kugera ntunda jedi. 19Kila mti wesigera ntunda jedi, unetemwa ugerwe he moto. 20Heicho munevamanyija he ntunda javo.”
Viteto na mihiro
(Luk. 6:46; 13:25-27)
21“Si kila mntu eniitanga Mfumwa, Mfumwa, eneingia he vufumwa vwa uko wanga, esire ula eronga vila vyekundiwe ni Vava wangu wa uko wanga. 22Ula msi vajinki veneniti, ‘Mfumwa, Mfumwa, teturotie na izina lako, na he izina lako kufunya mpepo, na kuronga virumo vijinki he izina lako?’ 23Niho nenevavwira boo iti, ‘Na too simumanyije unywi; vukani hangu unywi varehira vivivi.’”
Misingi miri
(Luk. 6:47-49; Mrk. 1:22)
24“Heicho, kila mntu esikia ivyo viteto vyangu na kuronga huvo, enefwanyanywa na mntu echee, ejengie nyumba yakwe wanga he mrarabwe. 25Mvua mbaha ikagwa, beria ikasea, nkungu ikafefeta, vyose vikakusha ila nyumba, isigwe, ambu msingi wayo wejengiwe wanga he mrarabwe. 26Na kila esikia ivyo viteto vyangu esironga huvo, enefwanyanywa na mntu erundie, ejengie nyumba yakwe he mshangaga. 27Mvua ikagwa, beria ikasea, nkungu ikafefeta, vyose vikakusha ila nyumba, ikagwa, kigwire chayo kikaoka kibaha.”
28Yesu ekikenja ivyo viteto vyakwe, luvungano lukakugha vuntu vwa michejire yakwe, 29ambu evachejije nezo sa mwenye nzinya, si sa vaandiki vavo.
Currently Selected:
MATAYO 7: CHSUNT67
Highlight
Share
Copy
Want to have your highlights saved across all your devices? Sign up or sign in
Chasu New Testament © Bible Society of Tanzania, 1967.
