LUKA 19

Zakayo

1Aho ekiingia Yeriko, akavechija ghati hewo. 2Naho hekina mntu, izina lakwe niye Zakayo, m’baha mmwe wa vareghuha kodi, naye ni mzuri. 3Uo ekiendisha kumvona Yesu iti ni mntu ani, mira vuntu vwa irivati la vantu, asiidime, ambu neki mfuhi. 4Akarongora ekisara, akakwea he mkuu, nesa amvone, ambu eneravechija he nzia iyo. 5Yesu ekinafike hala hantu akarereha na wanga, akamti, “Zakayo, sea fia, ambu yoo kinitara kuikaa he kaa yako.” 6Akasea fia, akamghuhia na kuizihirwa. 7Niho vantu vekinavone huvo, vakadughunyika, vekiti, “Aingia na kuikaa ha mntu m’banu.” 8Zakayo akaimuka, akamti Mfumwa, “Rereha Mfumwa, kibaje cha mari yangu niinka vakiva, na kari nemghumbie mntu kintu kwa kiavya, nimhunduia kantu kane.” 9Yesu akamti, “Yoo lukio lwafika he ii nyumba, ambu uu naye nire mwana Abrahamu. 10Ambu Mwana wa Mntu ezie kuenda kila chetekie na kukikija.”

Mfwanano wa mafungu

11Vekinasikie huvo, akazikateta mfwanano, ambu ekiho hafuhi na Yerusalemu, navo vakadunganya iti vufumwa vwa Mrungu vunevoneka hala indi. 12Niho akati, “Mntu mmwe wa kifumwa ekizoka he isanga la hae, nesa aghuhe vufumwa na kuhunduka. 13Akaitanga vantu ikumi he vazoro vakwe, akavainka mafungu ikumi a fedha, akavati, ‘Susurijeni najo mhaka nekineza.’ 14Mira vantu va muzi wakwe vakamvihhiwa, vakatuma ntume kumratera, vekiti, ‘Tetuenda uu atutetie.’ 15Igheri ekirahunduka aho anavona vufumwa vwakwe, akatuma iti vala vazoro veinkiwe fedha vaitangwe, nesa amanye mnesha wa kila mntu emazie he kususurija. 16Hakaza wa kuvoka, akati, ‘Mfumwa, ifungu lako lamaza mafungu ikumi kukela.’ 17Akamti, ‘Ni chedi, u mzoro wedi; kila weokie mkitengo he vintu vidori, unetetia mizi ikumi.’ 18Hakaza wa keri, akati, ‘Mfumwa, ifungu lako lamaza mafungu masano.’ 19Akamti uu naye, ‘Nawe utetie mizi misano.’ 20Hakaza ungi, akati, ‘Mfumwa, lila ifungu lako nilo ili, nekilivanzie he mhaluma. 21Ambu nakufoleka, kila we we mntu mkuji, ukughuhiha kintu wesikivikie, ufindika kintu wesikihandie.’ 22Akamti, ‘Ninekulaha kwa vya momo wako: U mzoro mvivi, wenimanyije iti mi ni mntu mtungulu, neghuha hantu nesivikie, na kufindika kintu wesihandie; 23hanini wesekivika fedha yangu he vala veinkija na mnesha, hesa nekiza niivone hamwe na mnesha wayo?’ 24Akavati vala veimuke hala hafuhi Mghumbeni ilo ifungu, muremunka ula ena mafungu ikumi. 25Vakati, ‘Mfumwa, ena mafungu ikumi.’ 26Nimutio, ‘Ula ena kintu eneinkwa, mira ula esina kintu, eneghumbwa na kila ena nacho. 27Kangi, vala vanzo vangu vesienda nivatetie, vaeteni aha muvakome mozya hangu.’”

Yesu eingia Yerusalemu kwa ngazo

(Mat. 21:1-11; Mrk. 11:1-11; Yoh. 12:12-19)

28Ekinakenje kuteta huvo, akarongora mozya ekikwea kutonga Yerusalemu.

29Igheri ekinazengelele Betfage na Betania, he ntuvi yeitangwa ya Mizeituni, akatuma veri he varateri 30ekiti, “Tongani mhaka he kala kamuzi keho mozya henyu, mwekiingia munevona ndama ya njeo yechungiwe, yesinaveka mntu na rini, ichungeni muiete aha. 31Kakicha mntu emuvwija, ‘Hanini mweichungua?’ Teteni huvu, ‘Mfumwa eienda.’” 32Vala vetumiwe vakatonga, vakavona sa vuntu evavwirire. 33Aho vekichungua ndama ya njoe, venye vakavati, “Hanini mwechungua ndama ya njoe?” 34Vakavati, “Mfumwa eienda.” 35Vakaitonja he Yesu, vakatandisha suke javo wanga he ila ndama ya njoe, vakamkweja Yesu. 36Aho vekitonga, vakatandisha suke javo nzieni. 37Aho ekizengelela ha kusea he ntuvi ya Mizeituni, irivati lose la varateri vakwe vakavoka kuizihirwa na kumkaza Mrungu na izii ibaha he vuntu vwa vila vyose vevonie erongie na nzinya, 38vakati, “Mwene lutelwedi ni mfumwa ula eza he izina la Mfumwa; mporere na ngazo uko wanga.” 39Va kumwe he Vafarisayo vekiho he luvungano, vakamti, “Mcheji, uvakanye varateri vako.” 40Akagharusha akati, “Nimuti unywi, ava vekihuja, mabwe enelonza.”

Yesu eiia Yerusalemu

41Ekifika hafuhi, akavona muzi, akauia, 42ekiti, “Nanga wekimanya hata we, he uu msi, vila vyetara mporere! Mira iki vyaviswa meso ako. 43Ambu misi ineza, vanzo vako venekujengia lukuta, lukujunguluke; venekujivirija na kukukindirija myondo yose; 44na venekugusha si, we na vana vako vewaho ndeni, vasikushighie ibwe, ni kila wasamanya igheri la kuziiwa kwako.

Yesu ezerija nyumba ya mtaso

(Mat. 21:12-17; Mrk. 11:15-19)

45Akaingia he nyumba ya mtaso, akavoka kuvafunya vala vekizorana, 46ekivati, “Cheandikwe: ‘Nyumba yangu ineoka nyumba ya kuombia,’ mira unyywi mwaighosha mpanga ya vaipato.”

47Naye kila msi akacheja he nyumba ya mtaso. Mira vabaha va vatasi na vaandiki, na vabaha va vantu, vekienda nzia ya kumkomia; 48vasivone cha kuketa, ambu vantu vose vekitonjanya naye, vekimsikija.

Currently Selected:

LUKA 19: CHSUNT67

Highlight

Copy